ގަވާއިދާ ޚިލާފަށް ވިޔަފާރި ކުރާ ބިދޭސީން ހޯދަން އޮޕަރޭޝަނެއް؛ ފެނުނު މީހުން ޑީޕޯޓުކޮށްލަނީ!

ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން އިއްޔެ ހިންގި އޮޕަރޭޝަންގައި އަމިއްލަ ވިޔަފާރި ކުރާ ބިދޭސީން ފެނިފައިވާ ކަމަށާއި އެ އެންމެން ވެސް ޑީޕޯޓްކޮށްލާނެ ކަމުގައި އިމިގްރޭޝަން ކޮންޓްރޯލަރު މުހައްމަދު ޝަމްއާން ވިދާޅުވެއްޖެއެވެ.

ޝައްމާން ރޭ "އެކްސް" ގައި ކުރެއްވި ޕޯސްޓެއްގައި ވިދާޅުވީ ރާއްޖޭގައި ގަވައިދާ ހިލާފަށް ވިޔަފާރި ކުރާ ބިދޭސީން ހޯދުމަށް ފަށާފައިވާ އިމިގްރޭޝަނާއި، ފުލުހުން ގުޅިގެން އޮޕަރޭޝަނެއް ހިންގާ، ގިނަ އަދަދެއްގެ ބިދޭސީން އިމިގްރޭޝަންގެ ބެލުމުގެ ދަށަށް ގެނެވިފައިވާ ކަމަށެވެ.

މި މީހުންގެ ތެރޭގައި ސައްހަ ހުއްދައެއް ނެތި އަދި ހުއްދަ ދޫކުރެވިފައިވާ މަސައްކަތުގެ ބޭރުން އަމިއްލައަށް ވިޔަފާރި ކުރާ މީހުން ދެނެގަނެވިފައިވާ ކަމަށާ، އުސޫލުގެ ތެރެއިން މި ފަރާތްތައް ރާއްޖެއިން ޑީޕޯރޓްކޮށް ފޮނުވާލެވޭނެ ކަމަށް ވެސް ޝައްމާން ވިދާޅުވިއެވެ.

ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރެއްވުމަކީ ރައީސް ޑރ. މުހައްމަދު މުއިއްޒުގެ ވައުދުފުޅަކަށްވީ ހިނދު، މި މަސައްކަތުގައި އިމިގްރޭޝަންގެ ފުރިހަމަ ޒިންމާ އަދާ ކުރަމުންދާނެ ކަމުގެ ޔަގީންކަން އެންމެހާ ފަރާތްތަކަށް އަރުވަން. .

އިމިގްރޭޝަން ކޮންޓްރޯލަރު މުހައްމަދު ޝަމްއާން

ޝައްމާން މިހެން ވިދާޅުވިއިރު، މާލޭގައި ގަވައިދާ ހިލާފަށް އުޅެމުން ދިޔަ 50 ބިދޭސީން އިމިގްރޭޝަނާ ވަނީ ހަވާލުކޮށްފައިވާ ކަމަށް ފުލުހުންގެ އިސް ތަރުޖަމާނު އަހުމަދު ޝިފާން ވަނީ އިއްޔެ ވިދާޅުވެފައެވެ.

އަދި ފުލުހުން ހިންގި އޮޕަރޭޝަންގައި މި މީހުން އަތުލައިގަތީ ލޯކަލް މާރުކޭޓާއި މާލޭގައި ހިންގަމުން އަންނަ އެހެން މާރުކޭޓުތެރޭގައި ވިޔަފާރި ކުރަން ތިއްބައި ކަމަށްވެސް ބުންޏެވެ.