“ފަލަސްތީން މިނިވަން ދައުލަތެއްގެ ގޮތުގައި ބަލައިގަތުމަށް ކުރާ މަސައްކަތުގައި ރާއްޖެއިން އަބަދުވެސް އެއްބާރުލުންދޭނެ”

ފަލަސްތީން މިނިވަން ދައުލަތެއްގެ ގޮތުގައި ބަލައިގަތުމަށް ކުރާ މަސައްކަތުގައި ރާއްޖެއިން އަބަދުވެސް އެގައުމާއިއެކު ވާނެ ކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ.

ޒަމީރު މިފަދައިން ވިދާޅުވެފައިވަނީ، އދ ގެ އާއްމު މަޖިލީހުގެ ބައްދަލުވުމުގައި ފަލަސްތީނުގެ ހައްގުގައި ހައުސިންގ މިނިސްޓަރ ޑރ އަލީ ހައިދަރު އަހުމަދު ދެއްކެވި ވާހަކަފުޅުތަކަށް އަލި އަޅުވާލައްވައި އެކްސްގައި ކުރެއްވި ޕޯސްޓެއްގައެވެ.

ފަލަސްތީން އދ ގެ މެންބަރެއްގެ ގޮތުގައި ހެދުމަށް ނެގުނު ވޯޓު، އެންމެ ގައުމެއްގެ ވީޓޯ ވޯޓުގެ ސަބަބުން ހުއްޓުވުމާއި ގުޅިގެން، އެކަމާމެދު ބަހުސް ކުރުމަށް ބޭއްވުނު އދ. ގެ އާންމު މަޖިލީހުގެ 78 ވަނަ ބައްދަލުވުމުގައި ޑރ ހައިދަރުގެ އިއްވެވި ބަޔާނުގައި ވަނީ އދ. ގެ ސަލާމަތީ މަޖިލީހުން ފަލަސްތީނުގައި ހައްގުގައި ފިޔަވަޅު އެޅުން އެންމެ ގައުމެއްގެ ވޯޓުން ހުއްޓުވޭނެ މަގު އޮތުމަކީ ލަދުވެތިކަމެއް ކަމަށް ވިދާޅުވެފައެވެ.

"ފަލަސްތީނަށް އިންސާފު ހޯދައި ދިނުމަށް ގަދަ އަޑުން ގޮވަމުންދާ ގޮވެލީގެ އަޑު، އެންމެ ވޯޓަކުން ކަނޑުވާލުމަކީ ވަރަށް ވެސް ލަދުވަތި ކަމެއް. (އެ އަޅާނުލީ) އދ ގެ އާއްމު މަޖިލީހުގެ 140 މެންބަރުން ( ސެކިޔުރުޓީ ކައުންސިލްގެ 12 މެންބަރ ސްޓޭޓް ހިމެނޭހެން) ގޮވާލި ގޮވެއްޔެއް. އެއީ ޔުނިވާސިޓީ ތަކުގަޔާއި، މަގުތަކުގަޔާއި، މުޅި ދުނިޔޭގެ އެކިކަންކޮޅުތަކުގައި ސުލްހަވެރި އިހްތިޖާޖު ތަކުގައި ގޮވާލި ގޮވެއްޔެއް. އދ ގެ 193 މެންބަރު ގައުމު ތަކުގެ ތެރެއިން އެންމެ ގައުމެއްގެ ވޯޓުން ދެކޮޅު އެ ހެދުނީ، އިންސާފަށް އެދި ގޮވަމުން ދިޔަ ގޮވެލި، ބަލައިގަތުމަށް ގޮވަމުން ދިޔަ ގޮވެލި، އަމިއްލަ ހައިސިއްޔަތެއް އޮތުމަށް ގޮވަމުން ދިޔަ ގޮވެލި. އެ 1 ވޯޓުގެ ސަބަބުން އދ ގެ ސަލާމަތީ މަޖިލިސް އަނެއްކާވެސް ފެއިލް ވެއްޖެ. އެ 1 ވޯޓުގެ ސަބަބުން އދ ގެ ސަލާމަތީ މަޖިލިސް އިސްރާއީލްގެ ގަތުލު އާއްމު ހުއްޓުވުމަށް ފެއިލް ވެއްޖެ.

ޑރ އަލީ ހައިދަރު އަހުމަދު

ހައިދަރު ވިދާޅުވީ، އދ ގެ އާއްމު މަޖިލީހުގެ ޖަލްސާގައި ވާހަކަ ދެއްކެވެމުން ދިޔަ އެވަގުތުވެސް ފަލަސްތީނުގައި ގަތުލް އާއްމު ހިންގަމުންދާ ކަމަށެވެ. ފަލަސްތީނުގައި މީގެ ކުރިންވެސް ިއސްރާއިލް ހިންގާފައިވާ އަނިޔާވެރި  ޖަރިމާތައް މިހާރުވެސް ތަކުރާރުވަމުންދާކަމަށާ، އިމާރާތް ތަކުގެ ދަށުން ފަލަސްތީނުގެ ކުދި ބޮޑު ރައްޔިތުންގެ ފުރާނަނެތް ހަށިތައް ނަގައި މިހާރުވެސް   ވަޅުލަންޖެހުފައިވާ ކަމަށް ހައިދަރު ވިދާޅުވިއެވެ. އަދި އެކަން ކަމަކީ އަޅާނުލައި ދޫކޮށްލެވޭނެ ކަން ކަމެއް ނޫން ކަމަށްވެސް ވަޒީރު ވިދާޅުވިއެވެ.

މިއާއެކު ސަލާމަތީ މަޖިލީހަށް ވެސް އެކަން އަޅާނުލައި ދޫކޮށް ނުލެވޭނެކަން ފާހަގަކުރައްވައި، ހައުދަރު ވިދާޅުވީ ސަލާމަތީ މަޖިލީހުން ފިޔަވަޅު އެޅުމަށް ނުކުޅެދުމުގެ ސަބަބުން، އިޒްރޭލުގެ ޖަރީމާތައް އާދައިގެ ކަމަކަށް ވެފައިވާކަމަށެވެ.

އެހެންކަމުން، މިއީ އދ ގެ އާއްމު މަޖިލީހުން ވީޓޯ ވޯޓަށް ނޫނެކޭ ބުނަންވީ ވަގުތު. އެ ވީޓޯގެ ސަބަބުން އިސްރާއިލުން ދަނީ ހުއްޓުމެއްނެތި ގަތުލްއާއްމު ހިންގަމުން. ހުއްޓުމެއްނެތި ބިން ފޭރި ގަދަކަމުން ވަޒަންވެރިވަމުން. އެ (ވީޓޯ ވޯޓް) ވެގެން ގޮސްފައިވަނީ ގަތުލްޢާއްމު ކުރިއަށް ގެންދަން ދީފައިވާ ހަތިޔާރަކަށް ވެއްޖެ.

ޑރ އަލީ ހައިދަރު އަހުމަދު

މީގެ އިތުރުންވެސް ހައިދަރު ވަނީ ގަތުލް އާއްމު ހުއްޓާލާ ނުހައްގުން ފޭރިފައިވާ ބިންތައް އޭގެ ހައްގުވެރިންނަށް ދިނުމަށް ޔަހޫދީ އިސްރާއީލަށް ގޮވާލާފައެވެ. އަދި ފަލަސްތީން މިނިވަން ދައުކަތެއްގެ ގޮތުގައި ކަނޑައަޅަންޖެހޭ ކަން ފާހަގަކުރައްވައި ޑރ ހައިދަރު ވަނީ އެކަމަށް އޮތް އެންމެ ބޮޑު ހުރަހަކީ ވީޓޯ ކަމަށް ވިދާޅުވެފައެވެ.