މާލޭގައި 500 ހައުސިންގް ޔުނިޓް އެޅުމަށް ޗައިނާއާއެކު އެއްބަސްވުމެއްގައި ސޮއިކޮށްފި

މާލެ ސިޓީގައި 500 ސޯޝަލް ހައުސިންގް ޔުނިޓް ތަރައްޤީކުރުމަށް ދިވެހި ސަރުކާރާއި ޗައިނާ ސަރުކާރާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ 2026 އޭޕްރިލް 21 އިން 22 އަށް ޗައިނާގެ ބެއިޖިންގްގައި ބޭއްވުނު "ތާޑް ހައި-ލެވެލް ކޮންފަރެންސް އޮން ގްލޯބަލް އެކްޝަން ފޯ ޝެއާޑް ޑިވެލޮޕްމަންޓް" ކޮންފަރެންސްގެ ހަވާސާގައެވެ.

ހައުސިންގް މިނިސްޓްރީން ހާމަކޮށްފައިވާ ގޮތުގައި، މި މަޝްރޫޢަކީ ޗައިނާ ސަރުކާރުން ދިނުމަށް ހަމަޖެހިފައިވާ އިންޓްރެސްޓް-ފްރީ (އިންޓްރެސްޓް ނުހިމެނޭ) ފެސިލިޓީއެއްގެ ދަށުން ކުރިއަށްގެންދާ މަޝްރޫޢެކެވެ.

މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް އިބްރާހީމް ތޮޢާމް މުޙައްމަދެވެ. ޗައިނާ ސަރުކާރުގެ ފަރާތުން ސޮއިކުރެއްވީ ޗައިނާ އިންޓަރނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ (ސީ.އައި.ޑީ.ސީ.އޭ) ގެ ވައިސް ޗެއާމަން ލިއު ޖުންފެންގް އެވެ.

މީގެ އިތުރުން، މި ދަތުރުގެ ތެރެއިން ސީ.އައި.ޑީ.ސީ.އޭ އާއެކު ބޭއްވުނު ބައިލެޓްރަލް ބައްދަލުވުމެއްގައި، ރާއްޖެއަށް ބޭނުންވާ ހިލޭ އެހީގެ އެކި މަޝްރޫޢުތަކާ ގުޅޭގޮތުން ދެޤައުމުގެ ދެމެދުގައި ފުޅާދާއިރާއެއްގައި މަޝްވަރާކުރެވުނު ކަމަށް އެ މިނިސްޓްރީން ބުނެއެވެ.