އަލީ ހަމީދުގެ ކުންފުންޏަށް ދިން އެޑްވާންސްގެ ސަބަބުން އާސަންދަ އަށް 40 މިލިއަން ރުފިޔާގެ ގެއްލުމެއް!

ހަ ބުރީގެ ހޮސްޕިޓަލެއްގެ އެޑްވާންސް ފައިސާގެ ގޮތުގައި ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެންބަރު އަލީ ހަމީދުގެ ކުންފުންޏަށް ދޫކުރެވުނު އެޑްވާންސް ފައިސާގެ ސަބަބުން އާސަންދަ ކުންފުންޏަށް 40 މިލިއަން ރުފިޔާގެ ގެއްލުމެއް ލިބިފައިވާކަން ހާމަވެއްޖެއެވެ.

ކުރީގެ ރައީސް އަބްދުالله ޔާމީންގެ ސަރުކާރުގައި ހަމީދުގެ ކުންފުނި، ނޯތު ކޯސްޓް ކޮންސްޓްރަކްޝަނަށް، ހަ ބުރީގެ ހޮސްޕިޓަލް އިމާރާތެއް އެޅުމަށް ހަވާލުކުރީ 61 މިލިއަން ރުފިޔާއަށެވެ.

ނަމަވެސް ފަހުން އެ ޕްރޮޖެކްޓް މަޑު ޖައްސާލާފައިވާއިރު، ގެއްލުމުގެ ބަދަލެއްގެ ގޮތުން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ އިތުރު 44 މިލިއަން ރުފިޔާ އެ ކުންފުންޏަށް ދީފައެވެ.

މި ފައިސާ އަލީ ހަމީދަށް ދީފައިވަނީ 2023 ވަނަ އަހަރުގެ ޖެނުއަރީ މަހުގެ 25 ވަނަ ދުވަހުއެވެ. އޭގެ ދެމަސް ފަހުން އޭޕްރީލް 3 ވަނަ ދުވަހު އަލީ ހަމީދު ވަނީ، މަޖިލީހަށް އޭނާ ހޮވުނު ޖުމްހޫރީ ޕާޓީ ދޫކުރައްވައި އެމްޑީޕީއާ ގުޅިވަޑައިގެންފައެވެ.

ބަދަލާއެކު އަލުން ހަމީދުގެ ކުންފުންޏާ އެ ޕްރޮޖެކްޓު ހަވާލުރީ ހުޅުމާލޭގައި 10 ބުރީ އިމާރާތުގެ ހޮސްޕިޓަލެއް އަޅާގޮތަށެވެ. އެ ޕްރޮޖެކްޓް ހަވާލުކުރީ މޭ 7، 2023 ގަ އެވެ. އެ ޕްރޮޖެކްޓްގެ ފައިނަލް ކުރެހުން އެޗްޑީސީން އެފްރޫވް ކޮށް، އިމާރާތް އެޅުމަށްޓަކައި ބިން ނުރަސްމީކޮށް ހަވާލުކުރި ނަމަވެސް، އޭގެ މަސައްކަތްތަކެއް ކުރިއަކަށް ނުދެ އެވެ.

އެ މައްސަލަ މިދިޔަ އަހަރު ރައްޔިތުންގެ މަޖިލީހުގެ މާލިއްޔަތު ކޮމިޓީން ވެސް ބަލާފައިވާއިރު، މައްސަލައިގެ ޖިނާއީ ތަހުގީގު އަވަސް ކުރަން ޕްރޮސެކިއުޓާ ޖެނެރަލް (ޕީޖީ) އޮފީހުން ވަނީ މިދިޔަ ޑިސެމްބަރު މަހުގައި ފުލުހުންނަށްވެސް އަމުރު ކޮށްފައެވެ.