ޝައިޚް ފަރީދުގެ މައްޗަށް ކަށުނަމާދުކޮށް ފަސްދާނުލައިފި

މަޝްހޫރު ދީނީ އިލްމުވެރިޔާ އައްޝައިޚް އިބްރާހީމް ފަރީދު އަހުމަދުގެ ޖަނާޒާ މެލޭޝިއާގައި ބާއްވައި، ފަސްދާނުލައިފިއެވެ.

ޝައިޚް ފަރީދުގެ މައްޗަށް ކަށުނަމާދު ކޮށްފައިވަނީ މިއަދު މެންދުރު ނަމާދަށްފަހު، މެލޭޝިއާގެ ސައިބަޖާޔާގައި ހުންނަ ރާޖާ ހާޖީ ފީސަބީލިالله މަސްޖިދުގަ އެވެ. އިމާމްވެ ކަށުނަމާދު ކުރެއްވީ ޝެއިޚް ފަރީދުގެ ކޮއްކޮ އަދި އައްޝައިޚް އަލީ ޒައިދެވެ.

ޝެއިޚްގެ ޖަނާޒާގައި ޢާއިލާގެ ބޭފުޅުންގެ އިތުރުން ގިނަ އަދަދެއްގެ ދިވެހިން ބައިވެރިވެފައިވެއެވެ.

ޝެއިހް ނިޔާވި މިމަހު ނުވަވަނަ ދުވަހު މެލޭޝިޔާއަށް ވަޑައިގެންނެވިތާ މާ ގިނައިރެއް ނުވެ އެއާޕޯޓްގަ އެވެ.

އާއިލާ އިން ފުރަތަމަ މަސައްކަތް ކުރީ ޝެއިހްގެ ހަަށިގަނޑު ރާއްޖެ ގެނެސް ޖަނާޒާގެ ކަންކަން ކުރިއަށް ގެންދިއުމަށެވެ. ނަމަވެސް މެލޭޝިޔާގެ އުސޫލު އޮންނަ ގޮތުން ނިޔާވެފައިވާ މީހަކު ގެނެވެނީ ޕޯސްޓްމޯޓަމް ހަދައިގެންނެވެ. އެހެން ކަމުން ޝެއިހްގެ އާއިލާ އިން ނިންމީ ޖަނާޒާގެ ކަންކަން މެލޭޝިޔާގައި ކުރިއަށް ގެންދާށެވެ.

ޝެއިހް ނިޔާވީ އުމުރުން 53 އަހަރުގަ އެވެ. ޝެއިހަކީ ރާއްޖޭގައި ދީނީ ހޭލުންތެރިކަން އިތުރުކުރުމަށް އެންމެ ބުރަކޮށް މަސައްކަތް ކުރެއްވި އިލްމުވެރީންގެ ތެރޭގައި ވަރަށް ފާހަގަ ކޮށްލެވޭ ބޭފުޅެކެވެ.

އަދި ޝެއިޚްގެ މައްޗަށް ކަށުނަމާދު ކުރުމަށް ރާއްޖޭގެވެސް ގިނަ ބަޔަކު އެދެމުންދާތީ ހުކުރު ދުވަހު ހުކުރު ނަމާދަށްފަހު، ރާއްޖޭގައި ހުކުރު ކުރާ ހުރިހާ މިސްކިތެއްގައި ޝެއިޚްގެ މައްޗަށް ޣައިބަށް ކަށުނަމާދު ކުރުމަށް އިސްލާމިކް މިނިސްޓްރީން ވަނީ ނިންމާފައެވެ.