މި ސަރުކާރުން، ކައުންސިލްތަކުގެ މެދުގައި ތަފާތު ކުރުމެއްނެތި އެއްބާރުލުން ދޭކަން އެ ދަނީ ހާމަވަމުން: އާދަމް ޝަރީފް

މި ސަރުކާރުން ކައުންސިލްތަކުގެ މެދުގައި އެއްވެސް ތަފާތުކުރުމެއް ނެތި ފުރިހަމަ އެއްބާރުލުން ދެމުންދާކަމަށް ސިޓީތަކާއި އިދާރީ ދާއިރާތައް ހިންގުމާބެހޭ ވުޒާރާގެ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.

އެކްސް ގައި ކުރެއްވި ޕޯސްޓެއްގައި ވަޒީރު އާދަމް ޝަރީފް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލާމަރުކަޒީ ނިޒާމު ހަރުދަނާކޮށް، ކައުންސިލްތައް މާލީގޮތުން ބާރުވެރިކުރުމަށް ގެންދަވަނީ ހަރުދަނާ ސިޔާސަތުތަކެއް އެކަށައަޅުއްވައި، ތަންފީޒު ކުރައްވަމުން ކަމަށެވެ.

މިގޮތުން، ކައުންސިލްތަކަށް ފަޅުރަށްތައް ލިބޭނެ އުސޫލެއް އެކުލަވާލައްވައި، އެ އުސޫލުގެ ދަށުން ކައުންސިލްތަކުން މިހާރު އަންނަނީ ފަޅުރަށް ހޯދުމަށް ޕްރޮޕޯސަލް ހުށަހަޅުއްވަމުންނކަމަށާ މި ޕްރޮޕޯސަލްތައް މިހާރު މުރާޖަޢާ ކުރަމުންދާ ކަން ވަޒީރު ފާހަގަކުރެއްވިއެވެ.

މީގެ އިތުރުން، ވަޒީރު ފާހަގަކުރެއްވި ގޮތުގައި، ރަށުން ނަގާ ޓެކްސްގެ 10% ކައުންސިލްތަކަށް ލިބޭނެ ނިޒާމެއް ރައީސް ވަނީ އިޢުލާނު ކުރައްވާފައެވެ.

އަދި ކައުންސިލްތަކުގެ ޢުމްރާނީ ޙާލަތު އަމިއްލަފުޅަށް ބައްލަވައި 50 ކައުންސިލް އިދާރާ އެޅުއްވުމަށް ދަނީ ތައްޔާރުވަމުން ކަމަށާ، ކޮންޓްރެކްޓަރ ފައިނޭންސްގެ ދަށުން 55 ކައުންސިލް އެޅުމަށް ހުށަހަޅާފައިވާ ޕްރޮޕޯސަލް މުރާޖަޢާކޮށް، އިކޮނޮމިކް ކައުންސިލަށް ހުށަހަޅާފައިވާ ކަމަށް ވަޒީރު ވިދާޅުވިއެވެ.

ވަޒީރު އާދަމް ޝަރީފް އިތުރަށް ވިދާޅުވީ، ލާމަރުކަޒީ ނިޒާމު ހަރުދަނާ ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމަށެވެ. އަދި ތަފާތު ކުރުމެއް ނެތި މި ސަރުކާރުން ހުރިހާ ކައުންސިލްތަކަށް ފުރިހަމަ އެއްބާރުލުން ދީ، ކައުންސިލްތަކުގެ ޤާނޫނީ ޒިންމާ އަދާކުރުމުގެ މަގު ފަހިކޮށްދޭކަން މީޑިއާގައި ހާމަވަމުންދާ ކަމަށް ވިދާޅުވިއެވެ.