ޗައިނާ ކުންފުނިން ރަސްމާލެ ހިއްކުމުގެ މަސައްކަތް މިއަދު ފަށައިފި

ރަސްމާލެ ހިއްކުމަށް ފަށާފައިވާ މަޝްރޫޢުގެ ދަށުން ޗައިނާ ހާބާރ އިންޖިނިއަރިން ކުންފުންނާ ހިއްކަން ހަވާލުކުރި ބައިގެ މަސައްކަތް މިއަދު ފަށައިފިއެވެ.

ރަސްމާލެ ހިއްކުމަށް ޗައިނާގެ ހާބާރ އިންޖިނިއަރިން ކުންފުންޏާއެކު ސޮއިކޮށްފައިވަނީ މިހިނގާ އޮގަސްޓްމަހުގެ 2 ވަނަ ދުވަހުއެވެ. އެޗްޑިސީން ބުނީ ޗައިނާގެ އެ ކުންފުނިން ބިން ހިއްކުމަށް ބޭނުންކުރާނީ، ތްރެއިލަރ ސަކްޝަން ހޮޕަރ ދްރެޖަރެއްކަމަށްވާ ޖުން ޔަންގް އެވެ. މި ޑްރެޖަރުގެ ކެޕޭސިޓީއަކީ 21،000 ކިއުބިކް މީޓަރ އެވެ. މި ޑްރެޖަރަކީ ރަސްމާލެ ހިއްކުމަށް މިހާތަނަށް ބޭނުންކުރި ޑްރެޖަރަށްވުރެ ދެގުނަ ބޮޑު ޑްރެޖަރެއްކަމަށް އެޗްޑީސީން ބުނެއެވެ.

ރަސްމާލެ ހިއްކުމަށް ކުރަމުންގެންދާ މަސައްކަތުގެ ދަށުން ފުށިދިއްގަރުފަޅުން ހިއްކުމަށް ހަމަޖެހިފައިވާ 1009 ހެކްޓަރުގެ ތެރެއިން މިހާތަނަށް ނިމިފައިވަނީ 129.60 ހެކްޓަރެވެ. މިއީ 12.84 އިންސައްތައެވެ. މި ސަރަހައްދުން ހިއްކުމަށް ހަމަޖެހިފައިވާ ސަރަހައްދުތަކުން 21،641 މުރަކަ ރައްކާތެރިކަމާއެކު ނެގުމަށްފަހު ވަނީ ބެންހާފަރާއި، ކ.މަނިޔަފުށީގެ އިތުރުން ބައެއް ރިސޯޓްތަކުގެ މުރަކަ އާލާކުރުމުގެ ޕްރޮގްރާމުތަކަށް ބަދަލުކޮށްފައެވެ.

ރަސްމާލެ ސައިޓް ޖޭގެ 29 ހެކްޓަރު ހިއްކައި ނިންމާފައިވާއިރު، މިހާރު ކުރިއަށްދަނީ، ގޮނޑުދޮށް ހިމާޔަތްކުރުމުގެ މަސައްކަތް ފެށުމަށް ވާންޖެހޭ ތައްޔާރީތައް ވުމުގެ މަސައްކަތްކަަމަށް އެޗްޑީސީން ބުނެއެވެ. މީގެ އިތުރުން މޯހަން މުތާއަށް ހިއކްނަ ްހަވާލުކުރި 394 ހެކްޓަރުގެ ތެރެއިން 100.60 ހެކްޓަރު ހިއްކައި ނިމިފައިވާއިރު، ޑްރެޖަރުގެ މެއިންޓަނަންސް ނިމުމާއެކު ބާކީބައި ހިއްކުމުގެ މަސައްކަތް ފަށާނޭކަމަށްވެސް ބުނެއެވެ.

ރަސްމާލެ ހިއްކަނީ ހުޅުމާލެއަށްވުރެ ބިންގަނޑު އުސްކޮށެވެ. ހުޅުމާލެ ހިއްކާފައިވަނީ ކަނޑުގެ ލޮނުގަނޑަށްވުރެ 2 މީޓަރު އުސްކޮށް ކަމަށްވާއިރު، ރަސްމާލެ ހިއްކަނީ 2.5 މީޓަރު އުސްކޮށެވެ. ފުށިދިއްގަރުފަޅު ހިއްކައިގެން ރަސްމާލެ ތަރައްގީ ކުރުމުގެ މަޝްރޫއަކީ މި ސަރުކާރުން ބޯހިޔާވަހިކަން ކަށަވަރުކޮށްދިނުމަށް އިއުލާނުކުރި އެންމެ ބޮޑު މަޝްރޫއެވެ. މި މަޝްރޫއުގެ ދަށުން 1200 ހެކްޓަރުގެ ބޮޑު ސަރަހައްދެއް ހިއްކާ 11900 އަށްވުރެ ގިނަ ގޯއްޗާއި 26000 ފްލެޓު ދިނުމަށް ސަރުކާރުން ވަނީ ނިންމާފައެވެ.