ސަރުކާރުން ލާމަރުކަޒީ ނިޒާމަށް ދީފައިވާ ބާރާއި އިހްތިޔާރު، ރައްޔިތުން މިއަދު ބަލައިގަނޭ: އިހްސާން

އަދުގެ ސަރުކާރުން ލާމަރުކަޒީ ނިޒާމަށް ދީފައިވާ ބާރާއި އިހްތިޔާރު, ރައްޔިތުން މިއަދު ބަލައިގަންނަކަމަށް ދާހިލީ ވަޒީރު އަލީ އިހްސާން ވިދާޅުވެއްޖެއެވެ.

ވެރިކަން ކުރާ މައިޕާޓީ، ޕީއެންސީން ކުރިއަށްއޮތް ލޯކަލް ކައުންސިލް އިންތިހާބަށް ވަމުންދާ ތައްޔާރީތަކާ ގުޅޭގޮތުން ނޫސްވެރިންނަށް މައުލޫމާތުދިނުމަށް ބޭއްވި ބައްދަލުވުމުގައި އިހުސާން ވިދާޅުވީ ކުރިއަށްއޮތް ލޯކަލް ކައުންސިލް އިންތިހާބު ވެގެންދާނީ ރާއްޖޭގެ ތާރީހުގައިވެސް ފާހަގަކޮށްލެވޭފަދަ އިންތިހާބަކަށް ކަމަށެވެ. އެގޮތުން އެއްޕާޓީއަކުން އިންތިހާބެއްގައި އެންމެގިނަ ކެނޑިޑޭޓުން ފެނިގެންދާ ޕާޓީއަކަށް ޕީއެންސީ ވެގެންދާނޭކަން މިނިސްޓަރު އިހުސާން ފާހަގަކުރެއްވިއެވެ.

އިހްސާން ވިދާޅުވީ ލޯކަލް ކައުންސިލް އިންތިހާބުގައި ޕީއެންސީގެ ފަރާތުން ގިނަ ކެނޑިޑޭޓުންތަކެއް ފެނިގެންދާއިރު އެކަމުން ދައްކުވައިދެނީ ލާމަރުކަޒީ ނިޒާމަށް ސަރުކާރުން ދީފައިވާ ބާރާއި އިހްތިޔާރާމެދު ރައްޔިތުން ކުރާ އިތުބާރުކަމަށެވެ.

ރާއްޖޭގެ ތާރީޚުގަ ވެސް މިފަދަ އިންތިޚާބަކަށް ކުރިމަތިލާ އެންމެ ގިނަ އަދަދެއްގެ މެންބަރުން ކަމަށް އަޅުގަނޑު ގަބޫލުކުރަނީ މިފަހަރު މި ކުރިމަތިލާފަ ތިބީ. މިކަމުން މި ދައްކުވައިދެނީ މި ނިޒާމް، ސަރުކާރުން މިހާރު ދެއްވާފަ އެވާ ބާރާ، އިޚްތިޔާރާ އަދި މި ޕާޓީގެ ވެރިކަމުގަ ލާމަރުކަޒީ ނިޒާމެއްގެ ތެރެއިން ގަވަރނެންސް ހިންގުމަށް މިދޭ އަހައްމިއްޔަތުކަން މީހުން ބަލައިގަންނަ ކަން

ދާހިލީ ވަޒީރު އަލީ އިހްސާން

އިހްސާން ވިދާޅުވީ އަދުގެ ސަރުކާރުން ލާމަރުކަޒީ ނިޒާމަށް ގެންނަމުންދާ ހެޔޮ ބަދަލުތައް ރައްޔިތުން ބަލައިގަންނަ ކަމަށާއި، ދައުލަތް ހިންގުމުގެ ނިޒާމުގެ ތެރެއިން ލިބޭ ފަހި ފުރުސަތުތައް ހޯދުމަށް ގިނަ ފަރާތްތަކަކުން ބޭނުންވާކަމަށެވެ. އަދި އިންތިހާބަށް ގިނަ އަދަދެއްގެ މެމްބަރުން ބައިވެރިވުމަކީ ސަރުކާރަށް އޮތް ތާއީދު ދައްކުވައިދޭ ކަމެއްކަމަށްވެސް އިހްސާން ވިދާޅުވިއެވެ.

ކުރިއަށްއޮތް ލޯކަލް ކައުންސިލް އިންތިހާބަށް ޕީއެންސީގެ ފަރާތުން ރެކޯޑް އަދަދަކަށް ކެނޑިޑޭޓުން ނިކުންނާނޭކަމަށް އިހްސާން ވިދާޅުވިއިރު، މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީ ޕީޖީ ގްރޫޕްގެ ލީޑަރު އިބްރާހިމް ފަލާޙް މިއަދު ވިދާޅުވީ، އިންތިހާބާ ދިމާކޮށް އެޕާޓީއާ ގުޅޭ މެމްބަރުންގެ އަދަދު އިތުރުވަމުންދާކަމަށެވެ. އެގޮތުން ޕާޓީ މެމްބަރުންގެ އަދަދު 70،000 ހާހަށް އަރާއިރު، ގުޅެންތިބި މެމްބަރުންނާއެކު އެއަދަދު 75،000 މީހުންނަށް އިތުރުވާނޭކަމަށް ބެލެވޭކަމަށް ފަލާހް ފާހަގަކުރެއްވިއެވެ.