ކޮޅުވެއްޓި ބަންޑުންޖަހާލި ހާދިސާ: އެކަކު މަރުވެ، 2 މީހަކު އަދިވެސް ނުފެނޭ

ރޭ ދަންވަރު މާލެއިން ރީތިރަށް ރިސޯޓަށް ދަތުރުކުރަމުންދިޔަ "އަލްމާކް ފިޔަ" ނަމަކަށް ކިޔާ ކޮޅުވެއްޓި ބަންޑުން ޖަހާލި ހާދިސާގައި ކަނޑުވި މީހުންގެ ތެރެއިން 2 މީހަކު އަދިވެސް ނުފެންނަކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ ކޮޅުވެއްޓި ބަންޑުން ޖަހާލިއިރު އޭގައި 7 މީހުން ތިބި ކަމަށެވެ. އޭގެ ތެރެއިން 4 މީހަކު ސަލާމަތްކުރެވުނުއިރު، ގެއްލުނު 3 މީހުންގެ ތެރެއިން މިހާތަނަށް ފެނިފައިވަނީ އެންމެ މީހެކެވެ. އެމީހާ ފެނިފައިވަނީ ކަނޑުގެ އަޑިން ކޯސްޓްގާޑުގެ ޑައިވަރުންނަށެވެ. އެމީހާ ކަނޑުން ނެގިއިރުވެސް އޮތީ މަރުވެފައިކަމަށް ފުލުހުން ވަނީ ބުނެފައެވެ. މަރުވެފައިވަނީ ގއ.ދާންދޫއަށް ނިސްބަތްވާ އުމުރުން 38 އަހަރުގެ އަހުމަދު ޝިފާން އެވެ.

ބަންޑުން ޖަހާލި ކޮޅުވެއްޓި މިހާރު އޮތީ ކަނޑު އަޑީގައެވެ. އެމްއެންޑީއެފުން އަދިވެސް ދަނީ ގެއްލުނު މީހުންގެ ހަބަރެއް ވޭތޯ ބަލަމުންނެވެ.

މިދުވަސްވަރަކީ މޫސުން ގޯސް ދުވަސްވަރެއްކަމުން ކަނޑުމައްޗަށް އެރުމުގެ ކުރިން މޫސުމާ ބެހޭ އެންމެފަހުގެ މައުލޫމާތު ހޯދުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ.