އެމްޕީއެލް އިންޓާންޝިޕް ޕްރޮޮގްރާމް: ބައިވެރިވުމުގެ ފުރުސަތު އަދިވެސް އެބައޮތް

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ސާނަވީ ތަޢުލީމް ފުރިހަމަކޮށްފައިވާ 18 އަހަރުން ދަށުގެ ޒުވާނުންނަށް އަމާޒުކޮށްގެން ކުރިއަށް ގެންދާ އިންޓާރންޝިޕް ޕްރޮގްރާމްގައި ބައިވެރިވުމުގެ ފުރުސަތު އަދިވެސް އެބައޮތްކަމަށް އެކުންފުނިން ބުނެފިއެވެ.

މި ޕްރޮގްރާމްގައި ބައިވެރިވުމަށް ޝައުގުވެރިވާ ފަރާތްތަކަށް 25 އޮކްޓޫބަރ 2025 ވާ ހޮނިހިރު ދުވަހުގެ މެންދަމު 12:00 ގެ ނިޔަލަށް ކުރިމަތިލެވޭނެއެވެ.

ދިވެހިރާއްޖޭގެ އިގްތިސާދުގެ މައި ދޮރާށި ކަމުގައިވާ އެމްޕީއެލްއިން މި އިންޓާރންޝިޕް ޕްރޮގްރާމް ފަރުމާކޮށްފައިވަނީ ޒުވާނުންނަށް ވަޒީފާގެ މާހައުލުގެ ތަޖުރިބާ ހޯދައިދިނުމަށާއި، ބަނދަރުގެ މަސައްކަތްތަކާ ގުޅޭ ދާއިރާތަކުން ކެރިއަރ ބިނާކުރުމުގެ ފުރުސަތު ފަހިކޮށްދިނުމުގެ މަޤްޞަދުގައެވެ.

އެމްޕީއެލްއިން ބުނާ ގޮތުގައި މި ޕްރޮގްރާމަކީ އދ. ގެ ސަސްޓެއިނަބަލް ޑިވަލޮޕްމަންޓް ގޯލްސް (އެސް.ޑީ.ޖީ) އާ އެއްގޮތްވާ ގޮތުގެ މަތިން، ޒުވާނުންނަށް ފެންވަރު ރަނގަޅު ތަޢުލީމާއި ތަމްރީނު ފޯރުކޮށްދިނުމަށް ކުރިއަށްގެންދާ މުހިންމު މަސައްކަތެކެވެ.

2022 ވަނަ އަހަރު ފަސް ދާއިރާއަކަށް ހުޅުވާލެވުނު މި ޕްރޮގްރާމް މިހާރު ވަނީ 9 ދާއިރާއަކަށް ފުޅާކުރެވިފައެވެ. މީގެ ތެރޭގައި މާކެޓިންގ އެންޑް ޕީއާރް، އެޑްމިން، ފައިނޭންސް، ޕްރޮކިއުމަންޓް، މެރިން އިންޖިނިއަރިންގ، މެކޭނިކަލް އިންޖިނިއަރިންގ، އިލެކްޓްރިކަލް އިންޖިނިއަރިންގ، ސިވިލް އިންޖިނިއަރިންގ އަދި އިންފޮމޭޝަން ޓެކްނޮލޮޖީ ހިމެނެއެވެ.

އެމްޕީއެލްގެ ފަރާތުން ކޮންމެ ޑިޕާޓްމަންޓަކުންވެސް ތަޖުރިބާކާރު މެންޓަރުން ކިޔަވައިދޭން ތިބޭނެއެވެ. ކޮންމެ ކުއްޖަކަށް ވަކި މެންޓަރެއް އެސައިންކުރެވޭނެއެވެ. އިންޓަރންޝިޕްގެ މުއްދަތުގައި ފަސްޓް އެއިޑް، ބިޒްނަސް ރައިޓިންގ އިންގްލިޝް، މައިކްރޮސޮފްޓް އޮފީސް އަދި ވަޒީފާގެ އިންޓަވިއުއަށް ތައްޔާރުވުމުގެ ތަމްރީނުތައްވެސް ހިމެނެއެވެ.

ޕްރޮގްރާމްގައި ބައިވެރިވާން ބޭނުންވާ ފަރާތްތަކުން ލިންކް މެދުވެރިކޮށް ފޯމު ހުށަހެޅުމާއެކު، ދިވެހި ރައްޔިތެއްކަން އަންގައިދޭ ކާޑުގެ ކޮޕީ، ވަނަވަރު، ސްކޫލް ލީވިން ސެޓްފިކެޓް އަދި ބެލެނިވެރިޔާގެ އިޢުތިރާޟެއް ނެތްކަމުގެ ލިޔުން ހުށަހަޅަންވާނެއެވެ.

އިތުރު މަޢުލޫމާތު ހޯދުމަށް އެމްޕީއެލްގެ ލަރނިންގ އެންޑް ޑިވެލޮޕްމަންޓް ޑިޕާޓްމަންޓްގެ ނަންބަރު 3039638 ނުވަތަ 3039636 އަށް ގުޅުއްވުމަށް ނުވަތަ [email protected] އަށް އީމެއިލްކުރެއްވުމަށް އެދިފައިވެއެވެ.