އދ. އިން ކުރި މިނިވަން ތަޙްޤީޤު: އިޒްރޭލު، ކުށްވެރިކުރެވޭ އެތައް ޖަރީމާތަކެއް

އދ. އިން ކުރި މިނިވަން ތަޙްޤީޤުން، އިޒްރޭލުގެ މައްޗަށް، ފަލަޞްޠީނުގައި ބޮޑެތި އެތައް ޖަރީމާތަކެއް ހިންގުމުގެ ކުށް ސާބިތުވާކަމަށް އދ. އިން ބުނެފިއެވެ.

ފަލަޞްޠީނުގެ ޣައްޒާގައި އިޒްރޭލުން ހިންގަމުންދާ ލާއިންސާނީ ޖަރީމާތައް، މިނިވަން ދެ ފަރާތަކުން ތަޙްޤީގު ކުރުމަށްފަހު، މިއަދު ނެރުނު ރިޕޯޓުގައި ވަނީ އިޒްރޭލު، އެތައް ގޮތަކުން ކުށްވެރިވާކަމަށް ބުނެފައެވެ.

އެގޮތުން، ހަމައެކަނި، މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން، އެ އަހަރު ނިމުމާ ހަމައަށް، އަލިއަޅުވާލާފައިވާ މި ރިޕޯޓުގައި ވަނީ، އެ 12 ހަފްތާގެ ތެރޭގައި މީހުން މެރުމާއި، ޖިންސީ އަނިޔާ ކުރުމާއި، ގަދަ ކަމުން މީހުން އެއް ތަނުން އަނެއް ތަނަށް ބަދަލުކުރުވުމާއި، ގަސްތުގައި އަނިޔާ ކުރުން، އަދި މުޖުތަމަޢެއް ނައްތާލަން މަސައްކަތް ކުރުން ފަދަ އެތައް ޖަރީމާ ތަކެއް ހިންގި ކަން ސާބިތުކަމަށް، ބުނެފައެވެ.

މި ރިޕޯޓާ ގުޅިގެން، އދ. ގެ ކޮމިޝަން އޮފް އިންްކުއަރީ (ސީއޯއައި) އިން، ބުނެފައިވަނީ، އިޒްރޭލުން، ޣައްޒާއަށް ދެމުންދާ ހަމަލާތައް ވަގުތުން ވަގުތަށް ހުއްޓާލަން ޖެހޭ ކަމަށެވެ. އަދި ހަނގުރާމައަށް ނިމުމެއް ގެނެވޭނީ، ޙައްޤު އަދަބު ދެވުމުން ކަމަށްވެސް އެ ކޮމިޝަނުން ވަނީ ބުނެފައެވެ.

މީގެ އިތުރުން، އދ. އިން މިނިވަން ތަޙްޤީގު ކުރިއަށް ގެންދިޔަ އިރު، އެމީހުންގެ ތަޙްޤީގަށް އިޒްރޭލުން ހުރަސް އަޅަމުންދިޔަ ކަމަށްވެސް ސީއޯއައި އިން ވަނީ ބުނެފައެވެ. އެގޮތުން، އިޒްރޭލާއި ފަލަޞްޠީނުގައި ހަރަކާތްތެރިވުމަށްވެސް އިޒްރޭލުން ހުރަސް އަޅަމުން ދާކަން ކޮމިޝަނުން ވަނީ ފާހަގަކޮށްފައެވެ.

އދ. އިން މިއަދު ނެރުނު ރިޕޯޓާ ގުޅިގެން އިޒްރޭލުން ވަނީ، ރިޕޯޓާމެދު ނުރުހުން ފާޅުކޮށް، އެއީ ސީދާ އިޒްރޭލާ ދެކޮޅަށް އދ. ގެ ކޮމިޝަނުން ނެރުނު ރިޕޯޓެއް ކަމަށް ބުނެފައެވެ. އދ. ރިޕޯޓުގައި، ޙަމާސް ވެސް ކުށްވެރިކޮށްފައިވާއިރު، މި ރިޕޯޓާ ގުޅިގެން، ޙަމާސްއިން އަދި ބަހެއް ބުނެފައެއް ނުވެއެވެ.

ޣައްޒާގެ މައުޞޫމް ކުޑަކުދިންނާއި މެދު ހިންގަމުންދާ ލާއިންސާނީ ޢަމަލުތަކުގެ ސަބަބުން ޔަހޫދީންގެ ޣައިރު ގާނޫނީ ދައުލަތް، އިސްރާއީލް، އދ އިން ވަނީ މީގެ ކުރިން ބްލެކް ލިސްޓްވެސް ކޮށްފައިކަން ފާހަގަކޮށްލެވެއެވެ.

އިސްރާއީލުން ފަލަޞްޠީނުގައި ހިންގަމުންދާ ލާއިންސާނީ ޖަރީމާ ތަކުގައި، މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް ހަމައެކަނި ޣައްޒާއިން ވަނީ 37,202 މީހުން ޝަހީދުވެފައެވެ. މީގެ ތެރޭގައި 15,000 އަށް ވުރެ ގިނަ ކުޑަކުދިން ހިމެނެއެވެ. އިސްރާއީލުން ހުއްޓުމެއްނެތި ދެމުންދާ ޙަމަލާ ތަކުގައި، ޣައްޒާއިން 84,932 މީހުން ޒަޚަމް ވެފައިވާއިރު، ގެއްލިފައިވާ މީހުންގެ ޢަދަދު ވަނީ 10،000 އިން މައްޗަށް ގޮސްފައެވެ.