ރޯދަމަހަށް އަމާޒުކޮށް ފިޔާ، އަލުވި އަދި ބިސް އެސްޓީއޯ އިން ބާޒާރަށް ނެރެފި

ކުރިއަށް އޮތް ރޯދަމަހަށް އަމާޒުކޮށް އެސްޓޯއިން ފިޔާ، އަލުވި އަދި ބިސް ބާޒާރަށް ނެރެފިއެވެ.

މިކަން އިއުލާނުކޮށް އެސްޓީއޯއިން މިއަދު ބުނީ ރޯދަމަސް ނިމެންދެން މިތަކެތި އަގުހެޔޮކޮށް ބާޒާރުން ލިބެން ހުންނާނެ ކަމަށެވެ. އެގޮތުން ފިޔާ ކިލޯއެއް 20ރ. އަށް ލިބޭނެށާއި، އަލުވި ކިލޯއެއް 15ރ. އަށް އަދި ބިހެއް 1.75 ރުފިޔާ އަށް ބާޒާރުން ލިބޭނެ ކަމަށް އެސްޓީއޯއިން ބުނެއެވެ.

އެސްޓީއޯއިން އިތުރަށް ބުނެފައި ވަނީ އަންނަ ރޯދަމަހަށް އެއްވެސް ދަތިކަމެއް ނެތި، އެ ބާވަތްތައް ލިބެން ހުންނާނެ ކަމަށެވެ. އޭގެ އިތުރުން އެސްޓީއޯގެ ފިހާރަތަކުން ރީޓެއިލްކޮށް އަދި ހޯލްސޭލްކޮށް ވެސް ފިޔާ އާއި އަލުވި އަދި ބިސް ލިބޭނެ ކަމަށް އެ އެސްޓީއޯއިން ބުނެފައިވެއެވެ.

ކޮންމެ އަހަރަކުވެސް ރަމަޟާންމަހާއި ދިމާކޮށް ތަކެތީގެ އަގު ބާޒާރުގައި އިންތިހާއަށް މައްޗަށް އުފުލިގެން ދިޔަނަމަވެސް ، މިފަހަރު އެސްޓީއޯއިން ބުނަނީ ކުރިއަށް އޮތް ރޯދަމަހު ތަކެތީގެ އަގު ހިފެހެއްޓޭނެ ކަމަށެވެ.

އެގޮތުން އެސްޓިއޯއިން ދަނީ ބާޒާރުގައި އާއްމުކޮށް އަގުއުފިލިގެންދާ ގިނައެއްޗެހި ބާޒާރަށް ނެރެ އަތްފޯރާފަށުގައި ރައްޔިތުންނަށް ފޯރުކޮށްދިނުމަށް މަސައްކަތް ކޮށްދެމުންނެވެ.

އެސްޓީއޯއިން މިފަދައިން ބުނެފައިވާ އިރު ސަރުކާރުން ބުނެފައިވަނީ ކާޑުގެ ބާވަތްތައް މިހާރަށްވުރެ އަގުހެޔޮކޮށް ލިބޭނެފަދަ ގޮތަކަށް ވޭތޯ ބެލުމަށް މަސައްކަތް ކުރަމުން އަންނަ ކަމަށެވެ. އެގޮތުން މިހާރު ސަރުކާރުންވަނީ ތުރުކީވިލާތުން ކާޑުގެނައުމުގެ އިންތިޒާމް ހަމަޖައްސާ އެކަމުގެ އަމަލީ މަސައްކަތް ފަށާފައެވެ.