ސިޔާމް، ގާސިމް އަދި ނާޒިމް ވާދަ ކުރައްވާ ގޮނޑިތަކަށް ޕީޕީއެމް/ޕީއެންސީން ކުރިމަތި ނުލާން ނިންމައިފި

ކުރިއަށް އޮތް 20 ވަނަ ރައްޔިތުންގެ މަޖިލީހުގައި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) ގެ ލީޑަރު އަހްމަދު ޝިޔާމް މުހައްމަދާއި ޖުމްހޫރީ ޕާޓީ (ޖޭޕީ) ގެ ލީޑަރު ޤާސިމް އިބްރާހިމް ގެ އިތުރުން މޯލްޑިވްސް ނޭޝަނަލް ޕާޓީ (އެމްއެންޕީ) ގެ ލީޑަރު މުހައްމަދު ނާޒިމް ވާދަކުރައްވާ ގޮނޑި ތަކަށް ޕީޕީއެމް އަދި ޕީއެންސީން ކުރިމަތި ނުލުމަށް ނިންމައިފިއެވެ.

ޕީޕީއެމް ޕީއެންސީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ޕީއެންސީގެ ޗެއާޕާސަން އަބްދުއްރަހީމް އަބްދުالله ވިދާޅުވީ މި ތިން ޕާޓީގެ ލީޑަރުން ކުރިމަތިލައްވާ ދާއިރާތައް އެ ބޭފުޅުންނަށް ދޫކޮށްލާފައިވާ ކަމަށާއި އެދާއިރާއަށް ޕީޕީއެމް އަދި ޕީއެންސީގެ ކޯލިޝަނުން ކުރިމަތި ނުލާނެ ކަމަށެވެ.

އެގޮތުން ޕީޕީއެމް އަދި ޕީއެންސީން ކުރި މަތި ނުލުމަށް ނިންމާފައިވަނީ މިވަނީ ދ.މީދޫ ދާއިރާ އާއި އދ.މާމިގިލި ދާއިރާ އަދި އދ.ދަނގެތި ދާއިރާ އަށެވެ.

"އަޅުގަނޑުމެން ނިންމާފައި މިއޮތީ އެމްއެންޕީގެ ލީޑަރު ރިޓަޔަލް ކާނަލް ނާޒިމް ވާދަކުރައްވާ ދާއިރާއަކަށް އަޅުގަނޑުމެން ޕްރައިމަރީ އަކަށް ނުލާނަމޭ. އަޅުގަނޑުމެން އެޕާޓީގެ ލީޑަރަށް އިހުތިރާމް ކުރުމުގެ ގޮތުން އަޅުގަނޑުމެން ވާދަނުކޮށް، އަޅުގަނޑުމެން އެ ގޮނޑިއަށް ވާދަކުރުމުގެ ފުރުސަތު ނާޒިމަށް އަޅުގަނޑުމެން ދޭނީއޭ. ހަމަ އެގޮތަށް އެމްޑީއޭގެ ލީޑަރު ވާދަ ކުރައްވަނީ ދާލު އަތޮޅު މީދޫ ދާއިރާއަށް. މީދޫ ދާއިރާވެސް އަޅުގަނޑުމެން ދޫކޮށްލީ އަޅުގަނޑުމެން އެމްޑީއޭއަށް. ޝިޔާމް ވާދަކުރައްވަން. މާމިގލި ދާއިރާއަށް ވާދަކުރައްވަނީ ގާސިމް އިބްރާހިމް. ގާސިމް އިބްރާހިމަށް އަޅުގަނޑުމެން އެ ދާއިރާ ދޫކޮށްލީ. އެހެންވީމަ އެ ތިން ޕާޓީންވެސް އެބަ ވާދަކުރައްވާ. "

އައްބުއްރަހީމް ވިދާޅުވިއެވެ.

މީގެ އިތުރުންވެސް އަބްދުއްރަހީމް ވަނީ ކުރިން ވެސް އެ ކޯލިޝަނުން ނިންމާފައިވާ ގޮތަށް ހުރިހާ ދާއިރާ އަކަށް ވާދަ ކުރާނެ ކަމަށާއި، މި އިންތިހާބުގައި ވާދަ ކުރަނީ މި ގޮތަށް ވިސްނައިގެން ކަމަށް ވިދާޅުވެފައެވެ.