މަޖިލިސް މެމްބަރުންނާ އެކު ފުރާ އެންމެނަށް ވީއައިޕީ ނުދިނުމަށް ފާސްކޮށްފި

ރައްޔިތުންގެ މަޖިލީހުގެ މެންބަރުންގެ އިތުރުން އެބޭފުޅުންނާ އެކު ފުރާ ހުރިހާ އެންމެންނަށް ވެސް ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ ވީއައިޕީ ލައުންޖުން ޚިދުމަތްދޭން ކޮމެޓީން ފާސްކުރުމަށްފަހު އަނެއްކާ ވެސް އެ އުސޫލު ބޭރުކޮށް, ވީއައިޕީ ނުދިނުމަށް ފާސްކޮށްފިއެވެ.

ސަރުކާރު މެންބަރުންގެ އަޣުލަބިއްޔަތުން, މެންބަރުންނާއެކު ފުރާ ހުރިހާ އެންމެނަކަށް ވީއައިޕީ ލައުންޖުން ޚިދުމަތްދޭ ގޮތަށް ފާސްކޮށްފައިވަނީ، ބުދަ ދުވަހު މެންދުރު ބޭއްވި މަޖިލީހުގެ 7 ވަނަ އާންމު ކޮމިޓީގެ ބައްދަލުވުމުގައެވެ.

ނަމަވެސް ބުދަ ދުވަހުގެ ރޭ ބޭއްވި އާންމު ކޮމިޓީގެ ބައްދަލުވުމުގައި މި އުސޫލު ވަނީ ބޭރުކޮށްލާފައެވެ. އަދި މި ބައްދަލުވުމުގައި ވަނީ ކުރިން ނިންމި ނިންމުން މުރާޖައާކޮށް މަޖިލީހުގެ މެންބަރުންނާއި މެންބަރުންގެ އާއިލާއަށް އެކަނި އެ ޚިދުމަތް ލިބޭގޮތަށް ބޭއްވުމަށް ނިންމާފައެވެ.

މެންބަރުންނާއެކު ފުރާ ހުރިހާ އެންމެނަކަށް ވީއައިޕީ ލައުންޖުން ޚިދުމަތްދޭ ގޮތަށް ފުރަތަމަ ފާސްކުރުމާއި ގުޅިގެން ކަނޑިތީމު ދާއިރާގެ މެންބަރު އަމީން ފައިސަލް ވަނީ މި ނިންމުމުގައި އެމްޑީޕީގެ ބައިވެރިވުމެއް ނޯންނާނެ ކަމަށާއި، މިނިންމުން ނިންމާފައިވަނީ އެމްޑީޕީގެ ތާއީދާއި ވޯޓާ ނުލައި ކަމަށް ވިދާޅުވެފައެވެ. އަދި މިއީ ކުރަންހެޔޮވާވަރުގެ ކަމެއްނޫންކަމަށް ވިދާޅުވެ މެންބަރު ފައިސަލް ވަނީ ވަރަށްބޮޑަށް ފާޑު ވިދާޅުވެފައެވެ.

މެންބަރުންގެ އިތުރުން އެހެން ބޭފުޅުންނަށްވެސް ވީއައިޕީ ލައުންޖުން ޚިދުމަތް ދިނުމަށް ކުރިންވެސް މަޖިލީހަށް ހުށަހެޅުމުން މި ހުށަހެޚުމާމެދު ވަރަށް ގިނަ ރައްޔިތުން ނުރުހުން ފާޅުކޮށްފައިވާކަން ފާހަގަކޮށްލެވެއެވެ. އެގޮތުން 2021 ގެ ސެޕްޓެންބަރު މަހު، މެންބަރުންނަށާއި އެ މެންބަރެއްގެ އާއިލާއަށް އިތުރުން އިތުރު ދެ މީހަކަށް ވީއައިޕީ ލައުންޖުގެ ޚިދުމަތް ދިނުމަށް ނިންމާފައިވީ ނަމަވެސް، އާންމުންގެ ފާޑުކިޔުމާ ގުޅިގެން ނިންމީ، އެ ނިންމުން މުރާޖަޢާކުރުމަށެވެ.