ދިވެހި ފަންނުވެރިންގެ އުފެއްދުންތައް އިސްތިހާރުކުރުމަށްޓަކައި މެލޭޝިޔާގައި މި އަހަރު ޙަރަކާތެއް ބާއްވާނެ: ވަޒީރު ސައީދު

ދިވެހި ފަންނުވެރިންގެ އުފެއްދުންތައް އިސްތިހާރުކުރުމަށްޓަކައި މެލޭޝިޔާގައި މި އަހަރު ޙަރަކާތެއް ބާއްވާނެ ކަމަށް އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

އިއްޔެ ކުރިއަށް ދިޔަ ކްރިއޭޓާސް ކޮންފްލުއެންސްގެ ފަހު ސެޝަންގެ ބައިވެރިންގެ ސުވާލުތަކަށް ޖަވާބު ދެއްވަމުން ވަޒީރު ސައީދު ވިދާޅުވީ ދިވެހި ފަންނުވެރިންނަށް ހާއްސަ އެކްސްޕޯއެއް މިއަހަރުގެ ތެރޭގައި ބާއްވަން ނިންމާފައިވާ ކަމަށެވެ. އަދި އެ އެކްސްޕޯ އަކީ ފަންނުވެރިންގެ ހުނަރާއި މަސައްކަތްތެރިކަން ވާދަވެރި މާހައުލެއްގައި ދައްކާލެވޭނެ އެކްސްޕޯއަކަށް ވާނެ ކަމަށާއި އެފަދަ އިތުރު އެކްސްޕޯތައް ވެސް ބޭއްވުމަށް ހަމަޖެހިފައިވާ ކަމަށް ވަޒީރު ވިދާޅުވިއެވެ.

ވަޒީރު ސައީދު ވިދާޅުވީ މިއީ ދިވެހި ފަންނުވެރިންނަށް ބައިނަލްއަގުވާމީ މާކެޓުން ޖާގަ ހޯދައިދޭން ސަރުކާރުން ކުރާ މަސައްކަތުގެ ތެރޭގައި ކުރުމަށް ހަމަޖެހިފައިވާ ކަމެއް ކަމަށެވެ.

އިކޮނޮމިކް މިނިސްޓްރީ އާއި ބިޒްނަސް ސެންޓަރ ކޯޕަރޭޝަން (ބީސީސީ) ގުޅިގެން ބޭއްވި ބީސީސީގެ ކްރިއޭޓާސް ކޮންފުލުއެންސަކީ، ރާއްޖޭގައި ފަންނުވެރި އިގްތިޞާދެއް ބިނާ ކުރުމަށް ސަރުކާރުން ފެށި މަސައްކަތުގައި ފަންނުވެރިންގެ ހިޔާލާއި މަޝްވަރާ ހިމެނުމާއި، ބީސީސީން ގާއިމުކުރަން މަސައްކަތް ކުރާ "ކްރިއޭޓާ ހަބް"ގައި ގާއިމްކުރާ ވަސީލަތްތަކަކީ ފަންނުވެރިންގެ ހިޔާލާއި މަޝްވަރާއާއެކު ގާއިމްކުރާ ވަސީލަތްތަކަކަށް ހަދަން ބޭއްވި ބައްދަލުވުމެކެވެ.

މި ކޮންފްލުއެންސް އިއްޔެ ހެނދުނު ހެނދުނު 10:00 ޖެހި އިރު ފަށައި، ނިންމާލީ ރޭ 10:00 ޖެހި އިރު އެވެ. މި ކޮންފުލުއެންސްގައި އެކި ދާއިރާތަކުގައި ހަރަކާތްތެރިވާ ޒުވާނުންނާއި ދާއިރާގެ ތަޖުރިބާކާރުން ބައިވެރިވެ ހިޔާލާއި މަޝްވަރާ ވަނީ ދީފައެވެ.

ރާއްޖޭގައި ފަންނުވެރި އިގްތިސާދެއް ބިނާ ކުރުމަކީ ރައީސް ޑރ. މުހައްމަދު މުއިއްޒުގެ އަމާޒެކެވެ. މިގޮތުން  މިކަން ހާސިލު ކުރެއްވުމަށް އެމަނިކުފާނުގެ މެނިފެސްޓޯގައި ހިމަނުއްވާފައިވާ ކަންކަމުގެ ތެރޭގައި ފަންނުވެރިންނަށް ބައިނަލްއަގުވާމީ މައިދާނުގައި ފަހި ފުރުސަތު ހޯދައިދިނުމާއި، ބައިނަލްއަގުވާމީ އެކި ޕްލެޓްފޯމްތަކުގައި ކުރާ ފައިސާގެ މުއާމަލާތްތައް ފަސޭހައިން ކުރެވޭނެ މަގު ފަހި ކޮށްދިމާއި، ފަންނުވެރިންނަށް ހަރަކާތްތެރި ވެވޭނެ ފަހި ވެއްޓެއް ގާއިމް ކޮށްދިނުން ހިމެނެއެވެ.