ރައީސް ޞާލިޙް، ކެންޑިޑޭޓުންނާއި އެކު ދޮރުން ދޮރަށް ހިންގަވަނީ

ކުރިއަށް އޮތް މަޖިލިސް އިންތިހާބުގައި ވާދަކުރައްވާ އެމްޑީޕީގެ ކެންޑިޑޭޓުންނަށް ތާއިދު ހޯއްދެއްވުމަށްޓަކައި ކުރީގެ ރައީސް އިބުރާޙިމް މުހައްމަދު ޞާލިޙް ދޮރުން ދޮރަށް ހިންގަވަން ފައްޓަވައިފިއެވެ.

އެގޮތުން ރައީސް ޞާލިހް މިއަދު ވަނީ މާފަންނު އުތުރު ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓް، އިފްހާމް ހުސެއިންއާ އެކު އެ ދާއިރާގެ ގެތަކަށް ދޮރުން ދޮރަށް ހިންގަވާފައެވެ.

މިހަރަކާތުގައި ރައީސް ޞާލިޙްވަނީ އެދާޢިރާގެ ގެތަކަށް ވަޑައިގެން އިފްހާމްއަށް ތާއިދު ހޯއްދައި ދެއްވުމަށްޓަކައި އެގޭގޭގައި ދިރިއުޅުއްވާ ފަރާތްތަކާއި ބައްދަލު ކުރައްވާ ވާހަކަފުޅުދައްކަވާ ހައްދަވާފައެވެ.

ރައީސް ޞާލިހް މިއަދު ދޮރުން ދޮރަށް ހިންގަވާ ކެންޑިޑޭޓުންނަށް ތާއީދު ހޯއްދެވުމުގެ މަސައްކަތް ފައްޓަވާފައިވައިރު އެމްޑީޕީން މަޖިލިސް އިންތިހާބުގެ ކެންޕެއިން ރަސްމީކޮށް ފަށާފައިވަނީ ރޭ އާޓިފިޝިއަލް ބީޗުގައި ބޭއްވި ބޮޑު ޖަލްސާއެއްގައެވެ. ރޭގެ އެ ޖަލްސާގައި ވަނީ އެމްޑީޕީގެ ފަރާތުން މިފަހަރު މަޖިލހުގައި ވާދަކުރައްވާ ހުރިހާ ކެންޑިޑޭޓުންވެސް ޕާޓީ ބަދަލު ނުކުރާނެކަމަށް މާﷲ ގަންދީ ހުވާކޮށްފައެވެ.

ކުރިއަށް އޮތް 20 ވަނަ ރައްޔިތުންގެ މަޖިލީހުގައި 93 ދާއިރާއަށް މެންބަރުން އިންތިހާބު ކުރުމަށް ހަމަޖެހިފައިވާއިރު އެމްޑީޕީން ވަނީ 89 ދާއިރާއަށް ވާދަކުރުމަށް ނިންމާފައެވެ.

މަޖިލިހުގެ އިންތިޚާބު ބާއްވަން އިލެކްޝަން ކޮމިޝަނުން ކަނޑައަޅާފައި ވަނީ މިއަންނަ މަހުގެ 17 ވަނަ ދުވަހެވެ. ނަމަވެސް ރައްޔިތުންގެ މަޖިލިހުން މިހާރު ވަނީ ރޯދަ މަސް ނިމޭތާ 10 ދުވަސް ފަހުން އިންތިޚާބު ބާއްވަން ޖެހޭގޮތަށް ޤާނޫނު އިސްލާހުކޮށްފައެވެ. އިންތިހާބާއި ބެހޭ ޤާނޫނަށް މި ގެނައި އިސްލާހް ތަސްދީޤްކުރުމަށް ރައިސުލްޖުމުހޫރިއްޔާއަށް ފޮނުވުމުން މިހާރު ވަނީ އެބިލް އަބުރާ މަޖިލިހަށް ފޮނުވާފައެވެ.