މަނާކުރި ފަހުން އެތެރެކުރަން އުޅުނު ވޭޕްގެ އެންމެ ބޮޑު ޝިޕްމަންޓް އަތުލައިގެންފި، އަގު 2.7 މިލިއަނަށް އަރާ

ގަވާއިދާ ޚިލާފަށް ރާއްޖެ އެތެރެކުރަން އުޅުނު އެތައްހާސް ވޭޕް ކާޓްރިޖެއް މޯލްޑިވްސް ކަސްޓަމްސް ސާވިސް އިން އަތުލައިގެންފި އެވެ.

އެ ތަކެތި އަތުލައިގަތުމަށް ކަސްޓަމްސް އިން ހިންގި ކާމިޔާބު އޮޕަރޭޝަންގެ މަައުލޫމާތު މިއަދު ވަނީ ހާމަކޮށްފަ އެވެ. ކަސްޓަމްސްގެ ސްޕްރިޓެންޑެންޓް މުހައްމަދު އަފްޒަލް ވިދާޅުވި ގޮތުގައި ކަނޑުމަގުން ރާއްޖެ ގެނައި މުދާ ޝިޕްމަންޓެއް ގަވާއިދާ ހިލާފު ތަކެތި އެތެރެކުރަން އުޅޭ ކަމަށް ލިބުނު މައުލޫމާތަކާއި ގުޅިގެން މި މަހުގެ ހަތަރުވަނަ ދުވަހު ވަނީ ހާއްސަ އޮޕަރޭޝަނެއް ހިންގާފަ އެވެ.

އެ އޮޕަރޭޝަންގައި މުދާ ޝިޕްމަންޓް ބަލާ ފާސްކުރިއިރު ފޮރުވާފައި ހުއްޓާ އެތައް ހާސް ވޭޕް ކާޓްރިޖެއް ވަނީ ހޯދާފަ އެވެ. އަފްޒަލް ވިދާޅުވި ގޮތުގައި ޖުމްލަ 10,800 ވޭޕް ކާޓްރިޖް ވަނީ އަތުލައިގެންފަ އެވެ.

މި ތަކެތީގެ އަގު 2.7 މިލިއަން ރުފިޔާއަށް އަރާނެ ކަމަށްވެސް ވިދާޅުވި އެވެ. އަދި މިއީ ރާއްޖޭގައި ވޭޮޕް މަނާކޮށް ރާއްޖެއަށް އެތެރެކުރުން މަނާކުރުމަށް ނޮވެންބަރު 15 ގައި ނިންމި ފަހުން މިހާތަނަށް އެތެރެކުރަން އުޅެނިކޮށް އަތުލައިގަތް އެންމެ ބޮޑު ވޭޕް ޝިޕްމަންޓެވެ.

އަފްޒަލް ވިދާޅުވި ގޮތުގައި އެ ތާރީހުން ފެށިގެން މިހާތަނަށް 66,000 ވުރެ ގިނަ ވޭޕް ކަސްޓަމަސް ސާވިސް އިން ވަނީ ހިފަހައްޓާފަ އެވެ.

ކަސްޓަމްސް އިން ވަނީ ވޭޕް އެތެރެކުރުން ފަދަ ގާނޫނާއި ހިލާފު ކަންކަން ނުކުރުމަށާއި ކަސްޓަމްސްގެ މަސައްކަތްތަކަށް އެހީތެރިވުމަށް އެދިފަ އެވެ.