ފްލެޓްތަކުގެ މައްސަލާގައި އޭސީސީން ޕޮލްކޯއަށް ވަދެއްޖެ

ފުލުހުންނަށް ހާއްސަކޮށްގެން ތަރައްޤީކުރި ފްލެޓްތަކުގެ މައްސަލާގައި އެންޓި ކޮރަޕްޝަން ކޮމިޝަނުން މިއަދު ފުލުހުންގެ ވިޔަފާރި ކުންފުނި، ޕޮލިސް ކޯޕަރޭޓިވް ސޮސައިޓީ (ޕޮލްކޯ) އަށް ވަދެއްޖެެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނެފައިވަނީ ފްލެޓްތަކުގެ މައްސަލައާ ގުޅޭގޮތުން ކުރާ ތަހުޤީޤަކަށް އޭސީސީގެ ޓީމެއް ޕޮލްކޯއަށްވަދެ ހަރަކާތްތެރިވަމުންދާކަމަށެވެ. މިކަމާ ގުޅޭ އިތުރު ތަފްސީލެއް ފުލުހުން ހާމައެއް ނުކުރެއެވެ.

ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން ޕޮލްކޯއާ ހަވާލުކުރީ 2013 ވަނަ އަހަރެވެ. ފުލުހުންގެ ފްލެޓްތަކުގެ މައްސަލާގައި އޮޑިޓަރ ޖެނެރަލް ނެރުއްވި ރިޕޯޓްގައިވަނީ އެ މަޝްރޫޢުއާ ގުޅޭގޮތުން އެތައް މައްސަލަތަކެއް ފާހަގަކޮށްފައެވެ. އެގޮތުން ޕޮލްކޯއާ ހާވަލުކުރުމުން އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެފައިވާ ކަމަށާ، އެ މަޝްރޫޢު ހިންގާފައިވާ ގޮތުން ދައުލަތަށް 354.7 މިލިއަން ރުފިޔާ ގެއްލުން ވެފައިވާކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

އޮޑިޓުގައި ބުނީ އެ މަޝްރޫއުއަށް މިހާތަނަށް 1.06 ބިލިއަން ރުފިޔާ ހަރަދުކޮށްފައިވާ ކަމަށާ އެއީ، އަކަފޫޓަކަށް 1،851 ރުފިޔާ ކަމަށެވެ. އެހެން ނަމަވެސް އާންމު ގޮތެއްގައި ކޮންސްޓްރަކްޝަން މަސައްކަތް ކޮށްދޭ އަމިއްލަ ކުންފުނިތަކުން އަކަފޫޓަކަށް 1،300 ރުފިޔާއާއި 1،500 ރުފިޔާއާ ދެމެދުގެ އަގެއްގައި އެ ފަދަ ކޮންސްޓްރަކްޝަން މަސައްކަތް ކޮށްދޭ ކަމަށް ރިޕޯޓްގައިވެއެވެ. އަދި އެ ރޭޓުތަކަށް ބަލާނަމަ، އެ މަޝްރޫއުގެ އަގަށް ޖެހެނީ 745.3 މިލިއަން ރުފިޔާ ކަމަށާ އެންމެ ބޮޑުވެގެން ވެސް 859.9 މިލިއަން ރުފިޔާއަށް އެ މަޝްރޫއު ނިންމާލެވޭނެ ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.

ފުލުހުންގެ ފުލެޓުތަކަށް މިހާތަނަށް ޚަރަދުކޮށްފައިވާ ފައިސާ:

އެޗްޑީސީއަށް ބިމުގެ އަގުގެ ގޮތުގައި - 15،458،529 ރުފިޔާ

އެޗްޑީސީއަށް ޖޫރިމަނާގެ ގޮތުގައި - 151،282 ރުފިޔާ

ނޫމަޑިއަށް - 76،065،692 ރުފިޔާ

އައިލެންޑް އެކްސްޕާޓަށް ދައްކާފައިވާ ފައިސާ - 432،049،000 ރުފިޔާ

އައިލެންޑް އެކްސްޕާޓުގެ ސަބް ކޮންޓްރެކްޓަރުންނަށް ދެއްކި ފައިސާ - 199،427،161 ރުފިޔާ

ދެ ކޯމަސްއަށް ދެއްކި ފައިސާ - 4،176،508 ރުފިޔާ

ދެ ކޯމަސްގެ ސަބް ކޮންޓްރެކްޓަރުންނަށް ދެއްކި ފައިސާ - 10،049،268 ރުފިޔާ

ހާއޯ ކުންފުންޏަށް ދެއްކި ފައިސާ - 10،282،364 ރުފިޔާ

އަމީން ކޮންސްޓްރަކްޝަން ހައުސިން މިނިސްޓްރީން ދެއްކި ފައިސާ - 310،517،974 ރުފިޔާ

ޖުމުލަ - 1،042،719،249 ރުފިޔާ [ނުދައްކާ ހުރި 18 މިލިއަން ރުފިޔާއާ އެކު 1.06 ބިލިއަން ރުފިޔާ]

އޮޑިޓް ރިޕޯޓުގައި ބުނީ، އެ މަޝްރޫއު ހިންގާފައިވަނީ ކަނޑައެޅިގެން ނޫމަޑީގެ ރެޕްރެޒެންޓޭޓިވަށް ފައިދާވާ ގޮތަށް ކަމަށެވެ. އަދި އެ ފަރާތަކީ ނޫމަޑީގެ ރެޕްރެސެންޓަޓިވް، އައިލެންޑް އެކްސްޕާޓްގެ މެނޭޖިން ޑިރެކްޓަރު އަދި ދެ ކޯމަސްގެ މެނޭޖިން ޑިރެކްޓަރާ އާއިލީ ގުޅުން އޮންނަ މީހެއް ކަމަށް ބެލެވޭ ކަމަށްވެސް ބުނެފައިވެއެވެ. އެ މީހާއަށް ސީދާ ގޮތުންނާއި ނުސީދާ ގޮތުން 682 މިލިއަން ރުފިޔާ ދައްކާފައިވާ ކަމަށް އޮޑިޓް ރިޕޯޓުގައި ބުންޏެވެ.

ފުލުހުންގެ ފްލެޓްތައް ހަދަމުންދާތާ 11 އަހަރަށްވުރެ ގިނަ ދުވަސްވީނަމަވެސް ފްލެޓްތައް މުޅިން ނިމުމަކަށް އައިސްފައެއް ނުވެއެވެ.