އިިދިކޮޅުގެ އެއްވުން ރޫޅާލައި 10 މީހުން ފުލުހުންގެ ބެލުމުގެ ދަށަށް!

1988ވަނަ އަހަރުގެ ނޮވެމްބަރ މަހުގެ ތިންވަނަ ދުވަހު ދިން އުދުވާނީ ހަމަލާ ފާހަގަކުރުމަށް އިދިކޮޅު ޕްރޮގްރެސިވް ކޯލިޝަނުން ބާއްވަމުންދާ އެއްވަމުން ރޫޅާލުމުގެ މަސައްކަތް ފުލުހުން ކުރަމުން އެބަދެއެވެ.

ޕީޕީއެމްގެ އޮފީސް ކުރިމަތީގައި ހިނގަމުންދާ އެއްވުން ރޫޅާލުމުގެ ތެރޭގައި ފުލުހުން ވަނީ 10 ފަރާތެއް ހައްޔަރުވެސް ކޮށްފައެވެ.

މީގެ ތެރޭގައި ޑީއާރްޕީގެ ރެޖިސްޓަރ އަދި ކުރީގެ މަޖިލިސް މެންބަރު އަބްދުﷲ ރިފާއު (ބޮޗޭ) އަދި މިހާރު ސަންގުޓީވީގައި ނޫސްވެރިއެއްގެ ގޮތަށް މަސައްކަތްކުރަމުންދާ އިބްރާހިމް ސައީދު (ކޭޑް)ވެސް ހިމެނޭކަމަށް ވޮއިސްއަށް ވަނީ މައުލޫމާތުލިބިފައެވެ.

ފުލުހުން ވަނީ މި އެއްވުން ރޫޅާލާނެކަމުގެ އިންޒާރު ކުރިންވެސް ދީފައެވެ. މިވަގުުތު އެއްވުމުގެ ގިނަ ބައިވެރިން ތިބީ މަގުމަތީގައި އިށީނދެގެންނެވެ.

ފާހަގަކޮށްލެވޭ ގޮތުގައި މި ހަރަކާތާއި ގުޅިގެން ޕީޕީއެމްގެ ސެކްރެޓަރީ ޖެނެރަލް މުހައްމަދު ޝަކީލް ވަނީ ފުލުހަށް މިއަދު ހާޒިރުކޮށްފައެވެ. ޝަކީލް ފުލުހަށް ހާޒިރުކުރުމަށްފަހު މިރޭ ބާއްވާ އެއްވުމަކީ ގާނޫނާއި ޚިލާފު އެއްވުމެއްކަމަށް ވަނީ ބުނެފައެވެ. އަދި މި އެއްވުން ހުއްޓުވާނެކަމުގެ އިންޒާރުވެސް ފުލުހުން ވަނީ ދީފައެވެ.

21:45: މިވަގުތު އެސްއޯ ފުލުހުން ދަނީ ޝީލްޑްތައް ބޭނުންކޮށްގެން މި އެއްވުން ރޫޅާލުމުގެ މަސައްކަތް ކުރަމުންނެވެ. ފުލުހުން ދަނީ އަޑުގަދަކުރާއިން މި އެއްވުމުގެ ބައިވެރިން އެ ސަރަހައްދު ދޫކޮށް ދިއުމަށް އެެދެމުންނެވެ.

22:00: ބަޑި ބުރާސްފަތި ނަމުގައި އިދިކޮޅު ޕްރޮގްރެސިވް ކޯލިޝަނުން ބޭއްވި އެއްވުން ނިންމާލައިފިކަމަށް އިއުލާންކޮށްފިއެވެ. އެއްވުން ނިންމާލަމުން ވަނީ 5ނޮވެމްބަރ ވަނަ ދުވަހު އޮންނަ ކުރީގެ ރައީސް އަބްދުﷲ ޔާމީންގެ ޝަރީއަަތަށް ކްރިމިނަލް ކޯޓު ސަރަހައްދަށް ވީހާވެސް ގިނަ ބަޔަކު ޖަމާވުމަށް އެދިފައެވެ.