ހުޅުމާލޭގައި އެސްޓޭޓް ސެކިއުރިޓީގެ ހިދުމަތް ތައާރަފުކޮށްފި

ހުޅުމާލޭގެ މަގުތަކާއި އާންމު ތަންތަނާއި އިމާރާތްތަކުގެ ސެކިއުރިޓީ 24 ގަޑިއިރު ބެލެހެއްޓުމަށް 'އެސްޓޭޓް ސެކިއުރިޓީ ސާވިސް' ގެ ހިދުމަތެއް އެޗްޑީސީން ރޭ ތައާރަފުކޮށްފިއެވެ.

އެޗްޑީސީން ސޯޝަލް މީޑިއާގައި ކުރި ޕޯސްޓެއްގައި ބުނީ ފަރުކޮޅުފުށީގައި ރޭ ބޭއްވި "ސޭފާ ހުޅުމާލެ" އިވެންޓުގައި ފެށިގެން ދިޔަ މި އައު ޚިދުމަތަކީ ހުޅުމާލޭގެ ރައްކާތެރިކަން ކަށަވަރު ކުރުމަށް އެޅިގެން ދިޔަ މުހިންމު ފިޔަވަޅެއްކަމަށެވެ.

އެޗްޑީސީގެ މެނޭޖިން ޑިރެކްޓަރު އަލީ ޒުހައިރު ވިދާޅުވީ އެޗްޑީސީއިން އަބަދުވެސް މަސައްކަތް ކުރާނީ ޒަމާނަށް އަންނަ ބަދަލުތަކާއި އެއްގޮތަށް ހިދުމަތުގެ ފެންވަރު ރަގަނޅު ކުރުމަށް ކަމަށާއި، ކުރިއަށް އޮތްތަނުގައިވެސް ހުޅުމާލޭގެ ރައްކާތެރިކަން ކަށަވަރުކުރުމަށް ފުލުހުންނާއި ގުޅިގެން އިތުރު ޕްރޮގްރާމްތަކެއް ހިންގާނެ ކަމަށެވެ. ޒުހައިރު ވިދާޅުވާގޮތުގައި "އެސްޓޭޓް ސެކިއުރިޓީ ސަރވިސް"އިން މިހިދުމަތް ދެމުންދާނީ އެންމެ ޒަމާނީ ފެންވަރުގެ ވަސީލަތްތައް ބޭނުންކޮށްގެންނެވެ.

"ފުރަތަމަ ފިޔަވަޅު މިއަދު އެޅިގެން މި ދިޔައީ. އެސްޓޭޓް ސެކިއުރިޓީގެ ގޮތުގައި ރަސްމީ ބްރޭންޑެއް އުފެދިގެން މި ދިޔައީ އަޅުގަނޑުމެންގެ ސެކިއުރިޓީއަށް،"

އެޗްޑީސީގެ މެނޭޖިން ޑިރެކްޓަރު އަލީ ޒުހައިރު

ޒުހައިރު އިތުރަށް ވިދާޅުވީ ތަޢާރަފް ކުރެވިގެން މިދިޔަ ޚާއްސަ ޚިދުމަތުގެ ސަބަބުން ހުޅުމާލޭގެ ރައްކާތެރިކަން އެހެން ހަރުފަތަކަށް ކުރިއަށް ޖެހިގެންދާނެކަމަށެވެ.

އޭނާ ވިދާޅުވި ގޮތުގައި، ހުޅުމާލޭގެ މަގުތަކާއި އާންމު ތަންތަނާއި އިމާރާތްތަކުގެ ސެކިއުރިޓީ ބެލެހެއްޓުމުގެ މަސައްކަތުގައި 24 ގަޑިއިރު، ސެކިއުރިޓީ ގާޑުންނާއި ސެކިއުރިޓީ އޮފިސަރުން މަސައްކަތްކުރާނެ އެވެ. އަދި މުވައްޒަފުން ތިބޭނީ އެކަމަށް ހާއްސަ ޔުނީފޯމުގައި އެއީ ކޮންބައެއްކަން އެނގޭނެ ގޮތަށް ކަމަށާއި، ހުޅުމާލޭގެ ސެކިއުރިޓީ ބަލަހައްޓަން މިހާރު ގާތްގަނޑަކަށް 50 މީހުން ހަރަކާތްތެރިވާކަމަށް އޭނާ ވިދާޅުވިއެވެ. ފަރުކޮޅުފުށީގައި ރޭ ބޭއްވި އިވެންޓުގައި ވަނީ ހުޅުމާލޭގެ "އެސްޓޭޓް ސެކިއުރިޓީ ސާވިސް"ގެ މުވައްޒަފުންގެ ޔުނީފޯމް ވެސް ވަނީ އާއްމުންނަށް ދައްކާލައިފައެވެ.

އެޗްޑީސީން މިހާރު ދޭ ސެކިއުރިޓީގެ ހިދުމަތުގެ ފެންވަރުގެ ރަނގަޅު ކުުރުމަށް ވަރަށް ގިނަ ފިޔަވަޅުތަކެއް އަޅައި، ރިފޯމްކުރުމުގެ މަސައްކަތް ވެސް ކުރަމުން އަންނަ ކަމަށް ޒުހައިރު ވިދާޅުވިއެވެ.