އެއާ އިންޑިއާގެ ބޯޓެއް ވެއްޓުން: އެކަކު ސަލާމަތްވި

242 މީހުންނާއެކު ދަތުރުކުރަމުން ދިޔަ އެއާ އިންޑިއާގެ މަތިންދާބޯޓެއް ވެއްޓި މިއަދު ހިނގި ނުރައްކާތެރި ހާދިސާ ގައި ބޯޓުން ދަތުރުކުރި އެކަކު ސަލާމަތްވި ކަމަށް އިންޑިއާގެ ކަމާބެހޭ އިދާރާތަކުން ބުނެފި އެވެ.

މި ހާދިސާ ހިނގީ ބޯޓް ނައްޓާލިތާ ކުޑައިރުކޮޅެއްގެ ތެރޭގަ އެވެ. މިއީ އިންޑިއާގެ އަހުމަދުއާބާދުން އިނގިރޭސި ވިލާތުގެ ލަންޑަނަށް ކުރަން ހަމަޖެހިފައި އޮތް ދަތުރެކެވެ.

ކަމާބެހޭ އިދާރާތަކުން ބުނީ ބޯޓްގައި ތިބީ 230 ފަސިންޖަރުންނާއި 12 ކްރޫން ކަމަށެވެ.

މީހުންގެ ހަށިތައް ހޯދުމުގެ މަސައްކަތް ކުރަމުންދާއިރު މިހާތަނަށް ގިނަ ބައެއްގެ ހަށިތައް ވަނީ ފެނިފަ އެވެ. އަދި ބޯޓުން ދަތުރުކުރި އެކަކު ސަލާމަތް ވި ކަމަށާ އޭނާއަށް ފަރުވާ ދެމުންދާ ކަމަށް އިންޑިއާގެ ސިއްހީ ވުޒާރާ އިން ވަނީ ޔަގީން ކޮށްދީފަ އެވެ. އިންޑިއާގެ ފުލުހުން ވެސް ވަނީ އެކަން ޔަގީންކޮށްދީފަ އެވެ.

އެ މީހާގެ ފޮޓޯއާ މައުލޫމާތު ވެސް ސޯޝަލް މީޑިއާގައި އެކި އެކައުންޓްތަކުން ވަނީ ޕޯސްޓްކޮށްފަ އެވެ. އޭނާ އަށް ފަރުވާ ދެމުންދާއިރު އޭނާ ސަލާމަތްވި ގޮތާއި އޭނާގެ ހާލަތެއް ސާފެއް ނުވެ އެވެ.

މި ހާދިސާގައި ބޯޓް ވެއްޓުނީ މެޑިކަލް ކޮލެޖް އިމާރާތުގެ މައްޗަށެވެ. އެ އިމާރާތުގައި ތިބި އެތައް ބަޔަކު ވެސް މަރުވެ ބޮޑެތި އަނިޔާތައް ލިބިފައިވާ ކަމަށް ބެލެވެ އެވެ. ނަމަވެސް އޭގެ ތަފްސީލެއް އަދި ހާމައެއް ނުކުރެ އެވެ.

ބޯޓް ވެއްޓެމުން ދިޔައިރު ބޯޓްގެ ތެރޭން ގަަދައަށް ދުން އަރަ އެވެ. އަދި ވެއްޓުމާއެކު ވަރުގަދައަށް ހުޅުހިފަ އެވެ. ރިޕޯޓްތައް. ބުނާ ގޮތުން ބޯޓް ވެއްޓެން ފެށިއިރު ދަތުރު ކުރަމުން އައީ 625 ފޫޓް މަތީންނެވެ. ބޯޓް ދުއްވަމުން ދިޔައީ ވަރަށް ތަޖުރިބާ ހުރި ޕައިލެޓެއް ކަމަށް ވެސް ވެ އެވެ.

ބޯޓްގައި ގިނައީ އިންޑިއާގެ ރައްޔިތުންނެވެ. އިންޑިއާގެ 169 މީހުން އެ ބޯޓުން ދަތުރުކުރި އެވެ. ދެން އެންމެ ގިނައީ ބޯޓް ދަތުރުކުރި އިނގިރޭސިވިލާތަށް ނިސްބަތްވާ މީހުންނެވެ. އެ ގައުމުގެ 53 މީހުން ދަތުރުކުރި ކަމަށްވެ އެވެ. މީގެ އިތުރުން ޕޯޗްގަލްގެ ހަތް މީހަކާއި ކެނެޑާ މީހަކު ވެސް މި ބޯޓުން ދަތުރުުކުރި ކަމަށް އެއާ އިންޑިއާ އިން ބުންޏެވެ.