ދުންފަތް މަނާކުރުމުގެ ބިލު މިމަހު މަޖިލީހަށް ފޮނުވައި، ނޮވެމްބަރު 1އިން ފެށިގެން އަމަލުކުރަން ފަށަނީ

ވަކި ޢުމުރުފުރާއަކުން ފެށިގެން އުފަންވެފައިވާ މީހުން ދުންފަތުގެ އިސްތިޢުމާލުކުރުން މަނާކުރުމުގެ ބިލު މިމަހު ރައްޔިތުންގެ މަޖިލީހަށް ފޮނުވައި ފާސްކޮށް، ނޮވެމްބަރު މަހުންފެށިގެން ޢަމަލުކުރަން ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޖަނަވަރީ1, 2007 އިން ފެށިގެން އުފަންވެފައިވާ ހުރިހާ ކުދިން ދުންފަތުގެ ބާވަތްތައް ގަތުމާއި ވިއްކުމާއި، ދުންފަތުގެ އިސްތިއުމާލު ކުރުން މަނާކޮށް “ޖެނެރޭޝަނަލް ބޭން” އެއް ތަންފީޒުކުރަން ވަޒީރުންގެ މަޖިލީހުން ނިންމީ މިމަހު 13 ވަނަ ދުވަހު އެވެ.

އެކަމާއި ގުޅޭ ގޮތުން މިއަދުގެ "ރައްޔިތުންނާ އެކު" ޕޮޑްކާސްޓްގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ރާއްޖޭގެ ޖުމްލަ އާބާދީގެ 30 އިންސައްތައަކީ 2007 ވަނަ އަހަރުން ފެށިގެން އުފަންވެފައިވާ ކުދިން ކަމަށެވެ. އެހެންކަމުން އެ އާބާދީ ދުންފަތުގެ އިސްތިޢުމާލުކުރުމުގެ ނުބައި އާދައިން ދުރުކުރެވިއްޖެނަމަ، ރާއްޖޭގެ މުސްތަޤުބަލު ސަލާމަތްކުރެވޭނެކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި އެއީ ރައްޔިތުންގެ ސިއްހަތަށް ކުރެވޭ ބޮޑު އިންވެސްޓްމަންޓެއް ކަމަށްވެސް ވިދާޅުވިއެވެ.

”ސަބަބަކީ ރާއްޖޭގައި ގައިން ގަޔަށް ނާރާ ބަލިތައް ފެތުރޭ އެންމެ ބޮޑު އެއް ސަބަބަކަށް ވަނީ ދުންފަތުގެ އިސްތިއުމާލު ކުރުން.“ ރައީސް މުޢިއްޒު ވިދާޅުވިއެވެ.

ރައީސް ވިދާޅުވީ، ދުންފަތުގެ އިސްތިޢުމާލުކުރުމުން ޒުވާނުންނާއި އަދުގެ ކުޑަކުދިން ދުރުކުރެވުމުން، ކުރިއަށް އޮތްތަނުގައި ޤައުމަށް ޚިދުމަތްކުރާ ހަރުދަނާ ޖީލެއް ބިނާކުރެވޭނެކަމަށެވެ.

މީގެ އިތުރުން އެމަނިކުފާނު ވިދާޅުވީ، 18 ވަރަށް ގިނަ ޒުވާނުން، އަހަރުފުރުމާއެކީގައި ދުންފަތުގެ އިސްތިޢުމާލުކުރަން ފަށާ ކަމަށެވެ. އަދި އެ ކުދިން ދުންފަތުން ދުރުކުރެވިއްޖެނަމަ ދުންފަތުގެ އިސްތިޢުމާލުކުރުމުން މުޅި މުޖުތަމަޢު ދުރުކުރުމަށް ބޮޑު ބާރަކަށް ވާނެކަމަށެވެ.

ރައީސް ވިދާޅުވީ، ދުންފަތާއި ބެހޭ ބިލު މަޖިލީހަށް ފޮނުވަން މިހާރު ތައްޔާރުވަމުންދާ ކަމަށެވެ.

"ތަންފީޒު ކުރަން ފަށާ ތާރީޚަކީ މި އަހަރުގެ ނޮވެމްބަރު 1. އަޅުގަނޑުގެ ވިސްނުމަކީ މަޖިލީހުން މި މަސް ނިމެންވާއިރަށް ފާސްކޮށްފިއްޔާ އެބަ ލިބޭ ގާތްގަނޑަކަށް 6 މަސް ދުވަސް މި ގާނޫނު ތަންފީޒުވާން ފެށުމާ ހަމައަށް. އެއީ މިހާރު 18 އަހަރު ފުރިފައި ތިބި ކުދިންގެ ތެރެއިން ދުންފަތުގެ އިސްތިއުމާލު ކުރަން ފަށާފައި ތިބި ކުދިންނަށް ވެސް އެކަމުން ނުކުންނަން ލިބޭ ދުވަސް"، ރައީސް ވިދާޅުވިއެވެ.

.