ފީސިބިލިޓީއަށްފަހު، މާލެ ސަރަހައްދުގެ މަގުތައް ހެދުމުގެ ދެވަނަ ފިޔަވަހީގެ އެއްބަސްވުމުގައި ސޮއިކޮށްފި

މާލޭގެ މަގުތައް ޒަމާނީ ފެންވަރަކަށް ތަރައްގީކުރުމުގެ މަސައްކަތުގެ ފީސިބިލިޓީ މަސައްކަތްތައް ނިމުނުތާ ގާތްގަޑަކަށް އަހަރެއް ފަހުން، އެ މަސައްކަތުގެ ދެވަނަ ފިޔަވަހީގެ އެއްބަސްވުމުގައި ދިވެހި ސަރުކާރުން ޗައިނާ ސަރުކާރާއި އެކު ސޮއިކޮށްފިއެވެ.

މިދިޔަ އަހަރުގެ ޖެނުއަރީ މަހު ރައީސް ޑރ. މުޙައްމަދު މުޢިއްޒު ޗައިނާއަށް ކުރެއްވި ރަސްމީ ދަތުރުފުޅުގެ ތެރެއިން ޗައިނާ ސަރުކާރުން ދޭ ހިލޭ އެހީގެ މަޝްރޫއުގެ ތެރޭގައި ހިމެނުމަށް ދެ ސަރުކާރުން ނިންމި މަޝްރޫއުގެ ޕްރީ ފީސިބިލިޓީ އަދި ފީސިބިލިޓީގެ މަސައްކަތްތައް ފަށައިފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގައެވެ. މަސައްކަތަށް ޗައިނާގެ ޓީމަކު ރާއްޖެއަށް އައިސް، 20 ދުވަސް ހޭދަކުރުމަށްފަހު އެ މަސައްކަތް ނިންމާފައިވަނީ އެ މަހުގެ 21 ވަނަ ދުވަހުއެވެ.

އެ މަސައްކަތަށް މިހާރު އަހަރެއްވާން ކައިރިވާއިރު، މިއަދު ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން "އެކްސް"ގައި ކުރި ޕޯސްޓެއްގައި ވަނީ މާލެ އާއި ވިލިމާލޭގެ މަގުތައް އަލުން ތަރައްގީކުރުމުގެ ދެވަނަ ފިޔަވަހީގެ އެއްބަސްވުމެއްގައި ޗައިނާ ސަރުކާރާއެކު މިއަދު އެއްބަސްވުމުގައި ސޮއިކޮށްފައިވާކަން ހާމަކޮށްފައެވެ.

އެއްބަސްވުމުގައި ރާއްޖޭގެ ފަރާތުން ސޮއެކުރެއްވީ ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވަޒީރު ޑރ. އަބްދުﷲ މުއްތަލިބްއެވެ. އަދި ޗައިނާ ސަރުކާރުގެ ފަރާތުން ސޮއެކުރެއްވީ ޗައިނާގެ ފަރާތުން ރާއްޖެއަށް ކަނޑައަޅުއްވާފައިވާ ސަފީރު ކޮންގް ޝިއަންހުއާ އެވެ.

ޖުމްލަ 130 މިލިއަން ޑޮލަރުގެ މި މަޝްރޫއުގެ މަސައްކަތް ނިންމުމަށް 4-3 އަހަރު ހޭދަވާނެ ކަމަށް ވަޒީރު މުއްތަލިބު މީގެ ކުރިން ވިދާޅުވެފައިވެއެވެ.