ލިބުނު ފުރުސަތުގެ ބޭނުންނުކުރެވި ޖޯޖިއާއި ޗެކް ރިޕަބްލިކްގެ ކުރިމަތިލުން އެއްވަރު

ޔުއެފާ ޔޫރޯ 2024 ގެ ގުރޫޕް އެފްގައި ޗެކް ރިޕަބްލިކާއި ޖޯޖިއާ ވާދަކުރި މެޗުގައި ލިބުނު ފުރުސަތުތަކުގެ ބޭނުން ނުކުރެވި 1-1 ގެ ނަތީޖާއަކުން ދެޓީމު އެއްވަރުވެއްޖެއެވެ.

މުބާރާތުގައި ޗެކް ރިޕަބްލިކް ކުޅުނު ފުރަތަމަ މެޗުގައި 2-1 ގެ ނަތީޖާއަކުން ޕޯޗުގަލް އަތުން އެޓީމު ބަލިވެފައިވާއިރު، ޖޯޖިއާގެ ފުރަތަމަ މެޗުގައި ތުރުކީ އަތުން އެޓީމު ބަލިވީ 3-1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ 23 ވަނަ މިނެޓުގައި ޗެކް ރިޕަބްލިކުން ލަނޑެއް ކާމިޔާބުކުރި ނަމަވެސް ވީއޭއާރުން ބެލުމަށްފަހު ރިފްރީ ނިންމީ ޗެކްގެ އެޑަމް ލޮޒެކް އަތުގައި ބޯޅަޖެހިފައިވާތީ އެއީ ރަނގަޅު ލަނޑެއް ނޫން ކަމަށެވެ.

ޖޯޖިއާ އިން މެޗުގެ ލީޑު ހޯދީ ފުރެތަމަ ހާފުގެ އިތުރުވަގުތުގެ ހަތަރުވަނަ މިނެޓުގައެވެ. މިލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ފޯވާޑް ޖޯޖެސް މިކައުޓަޑްޒޭ އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖައަކުން ޖޯޖިއާ ކުރީގައި އޮވެގެންނެވެ.

މެޗުގެ ދެވަނަ ހަފުގައި ޗެކް ރިޕަބްލިކުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖައެއްގެ ގޮތުން ދެވަނަ ހާފުގެ 59 ވަނަ މިނެޓުފައި އެޓީމުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ.

މީގެ އުތުރުން ވެސް މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި މެޗުގެ އިތުރުވަގުތުގެ އެންމެ ފަހު މިނެޓުގައި މެޗުގެ ލީޑު ހޯދުމަށް ޖޯޖިއާއަށް ވަނީ ވަރަށް ހުސް ފުރުސަތެއް ލިބި ބޭނުންކުރެވޭ ގޮތް ނުވެފައެވެ.

ޖޯޖިއާއިން އުފެއްދި ކައުންޓާ އެޓޭކެއްގައި ޗެކްގެ ޕެނަލްޓީ އޭރިއާ ތެރޭގައި މުޅިން ހުސްކޮށްހުރެ ސަބާ ލޮބްޒަނިޑްޒޭ ފޮނުވާލި ހަމަލާދިޔައީ ގޯލާއި އަމާޒުނުވެ ހުރަސް ދަނޑިމަތިން ބޭރަށެވެ. މިއާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިނަތީޖާއެކު ކުޅު ދެމެޗުން މިދެޓީމަށް ވެސް އެއް ޕޮއިންޓް ލިބިފައިވާއިރު، ގުރޫޕްގެ ފަހުމެޗުގައި ޖޯޖިއާ އިން ޕޯޗުގަލް އާއި ދެކޮޅަށް ނުކުންނައިރު، ޗެކް ރިޕަބްލިކު ނުކުންނާ ނީ ތުރުކީ އާއި ދެކޮޅަށެވެ.