ސަރުކާރު ކުންފުނިތައް ބަނގުރޫޓްވަމުންދަނިކޮށް، ހާލަތު ރަނގަޅުކޮށްދިނީ މި ސަރުކާރުން: އާދަމް ޝަރީފު ‏⁦

ދިވެހި ސަރުކާރުގެ ކުންފުނިތައް ބަނގުރޫޓް ވަމުންދަނިކޮށް އިޤްތިސާދީ ހާލަތު ރަނގަޅުކޮށް، ކުންފުނިތަކަށް ކުރިއެރުންތައް މި ސަރުކާރުން ގެނެސްދީފައިވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

މޯލްޑިވިއަންގެ ފްލީޓަށް އިތުރު އޭޓީއާރު ބޯޓެއް ގަނަައުން ފާހަގަކުރުމަށްޓަކައި ވެލާނާ އިންޓަރނޭޝަނަލް އެއަރޕޯޓުގައި ބޭއްވި ހާއްސަ ރަސްމިއްޔާތުގައި ބައިވެރިވެވަޑައިގެން ދެއްކެވި ވާހަކަފުޅުގައި އާދަމް ޝަރީފް ވިދާޅުވީ، ސަރުކާރު ވެރިކަމާއި ހަވާލުވިއިރު އައިލެންޑު އޭވިއޭޝަން އަދި އެހެންވެސް ކުންފުނިތައް އޮތީ ބަންގުރޫޓުވުމާއި ދިމާއަށް މިސްރާބް ޖަހާފައިވާ ކަމަށެވެ. އެހެންނަމަވެސް މިވީ މަދު ދުވަސްކޮޅުގެ ތެރޭގައި ރާއްޖޭގެ އިޤްތިސާދީ ހާލަތު ރަނގަޅުކޮށް، ކުންފުނިތަކަށް ކުރިއެރުންތައް އަންނާނެ މަގު ސަރުކާރުން ފަހިކޮށްދީފައިވާކަމަށް އޭނާ ވިދާޅުވިއެވެ.

އައިލެންޑު އޭވިއޭޝަންވެސް އަދި އެހެން ކުންފުނިތައްވެސް، ރައީސް މުޢިއްޒުގެ ޒަޢާމަތާއި ހަމައަށް އައި އިރުގައި އޮތީ ވަރަށް ބޮޑަށް ބަނގުރޫޓްވުމުގެ މަގަށް މުޅި ކުންފުނިތައް ގާތްގަޑަކަށް ސޮއްސާލާފައި. އެހެން އެކަން އޮއްވާ، މިވީ މަދު ދުވަސްކޮޅުގެ ތެރޭގައި ރާއްޖޭގެ އިގްތިޞާދީ ހާލަތު ވަރަށް ބޮޑަށް ރަނގަޅު ކުރައްވައި، އަދި ކުންފުނިތަކަށް މިވަރުގެ ބޮޑު ކުރިއެރުންތައް އަންނާނެ މަގު ފަހިވެގެން ދިޔުން އެއީ އަޅުގަނޑު ދެކޭ ގޮތުގައި ރައީސް ޑރ މުހައްމަދު މުޢިއްޒުގެ ސިޔާސީ ވިސްނުންފުޅާ އެމަނިކުފާނުގެ އިގްތިޞާދީ ސިޔާސަތު އަޅުގަނޑުމެން ހީނުކުރާހާ ހަރުދަނާވެ، އަދި އަޅުގަނޑުމެންނަށް ވަރަށް ބޮޑު އުއްމީދުތަޖެއް އޭގެ ސަބަބުން ލިބިގެންދިޔަ ކަމެއް.

ވަޒީރު އާދަމް ޝަރީފް

މިއާއެކު އާދަމް ޝަރީފް ވިދާޅުވީ މިއަދު ރާއްޖޭގެ ރައްޔިތުންނަށްވެސް އަދި ބައިނަލްއަޤްވާމީ ދުނިޔޭގައި ރާއްޖޭގައި އިންވެސްޓުކުރަން ތިބި ފަރާތްތަކަށްވެސް އެނގިގެންދަނީ ހަޤީގީ މާނައިގައި ރާއްޖޭގެ އިޤްތިސާދީ ހާލަތު ރަނގަޅުވެގެންދާކަމަށެވެ. އަދި ބޮޑެތި އިންވެސްޓްމަންޓް ކުރުމުގެ ގާބިލްކަން ރާއްޖޭގަައި އުފެދިގެންދާ ކަންވެސް ފެންނަމުންދާ ކަމަށް ވިދާޅުވުއެވެ.

“ދިވެހި ރުފިޔާ ޗާޕް ނުކުރަން ނިންމި ނިންމުމާއި އެކު އިޤްތިސާދަށް އައި ބަދަލުތަކާއި އެކު، އިޤްތިސާދު މިއަދު ކޮޅަށް ހިންދެމިލައިގެން ތެދުވެ، ކުރިއަށްދާން މި ފެއްޓެނީ، އާއްމު ބަހުރުވައިން ދަންނަވާކަމުގައިވާ ނަމަ، އިޤްތިސާދުވެސް މުޢިއްޒު ސްޕީޑުގައި ކުރިއަށްދާތަން ފެނިގެންދާނެ،" ވަޒީރު އާދަމް ޝަރީފް ވިދާޅުވިއެވެ.

މި ކުރިއެރުންތައް އަންނަމުންދަނީ ސިޔާސީ ހިކުމަތްތެރި ވެރިއެއްގެ ލީޑަރޝިޕްގެ ދަށުން މަސައްކަތްކުރަމުންދާތީކަމަށްވެސް އޭނާ ވިދާޅުވިއެވެ.