މިއަދު ސުކޫކް ދައްކަން ޖެހުނަސް ދެއްކޭ ވަރަށް ފައިސާ އެބަހުރި: ރައީސް މުޢިއްޒު

ރާއްޖެއިން މިއަހަރު ދައްކަންޖެހޭ ދަރަނި 500 މިލިއަން ޑޮލަރުގެ ސްކޫކް މިހާރު ދައްކަން ޖެހިއްޖެ ނަމަވެސް އެ ދެއްކޭ ވަރަށް ފައިސާ އެބަހުރި ކަމަށް ރައީސް މުހައްމަދު މުއިއްުޒު މިއަދު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ މިއަދު ބޭއްވި ނުސްވެރިންގެ ބައްދަލުވުމުގައި ވާހަކަދައްކަވަމުންނެވެ.

ރައީސުލްޖުމްހޫރިއްޔާ މިއަހަރު ދެއްވި ރިޔާސީ ބަޔާނުގައިވެސް އެމަނިކުފާނު ވަނީ ސުކޫކް ޕޭމަންޓް ދެއްކުމަށް ކުރެވެމުންދާ މަސައްކަތްތަކާއި، ރާއްޖޭގެ ރިޒާވްގައި މިހާރު ފައިސާ ހުރި އަދަދުތަކަށް ވަރަށް ތަފްސީލުކޮށް އަލިއަޅުވާލައްވާފައެވެ.

އެކަން ފާހަގަކުރައްވައި އެމަނިކުފާނު ވިދާޅުވީ، މި އަހަރު އޭޕްރީލް 8 ގައި ދައްކަންޖެހޭ ބޮޑު ދަރަނި ދެއްކޭ މިންވަރަށް ފައިސާ ރައްކާ ކުރެވިފައިވާ ކަމަށެވެ.

ކުރު ގޮތަކަށް ދަންނަވާލަންޏާ މިއަދު ސުކޫކް ޕޭ ކުރަންޖެހުނަސް ޕޭ ކުރެވޭ ވަރަށް ފައިސާ އެބަހުރި. މިއަދު މިހާރު ޕޭކުރަންޖެހުނަސް ޕޭ ކިރެވޭ ވަރަށް ފައިސާ އެބަހުރި. އާދެ 500 މިލިއަން ޑޮލަރުގެ ސުކޫކް 8 އޭޕްރީލް 2026 ގައި ސަރުކާރުން ދައްކަން ވާނީ ނިންމާފައި. އެއީ ދައްކަންޖެހޭ ދުވަސް.

ރައީސް ޑރ. މުހައްމަދު މުޢިއްޒު

އެގޮތުން ރައީސް ވިދާޅުވީ، ސުކޫކް ދެއްކުމަށް 650 މިލިއަން ޑޮލަރަށްވުރެ ގިނައިން ފައިސާ ރައްކާ ކުރެވިފައިވާ ކަމަށާ، އޭގެތެރެއިން 320 މިލިއަން ޑޮލަރަކީ އެސްޑީއެފްގައި ރައްކާކުރެވިފައިވާ ފައިސާ ކަމަށެެވެ. އަދި އަނެއް 330 މިލިއަން ޑޮލަރަކީ ޔޫޒަބަލް ރިޒާވްގައި ހުރި ފައިސާ ކަމަށެވެ.

ސުކޫކް ދެއްކުމަށް މިހާރު ރައްކާކޮށްފައި އެބަހުރި 650 މިލިއަން ޑޮލަރަށްވުރެ ގިނަ ފައިސާ. 500 މިލިއަން ދައްކާފައި ބާކީވެސް އެހެންވީމާ 150 މިލިއަން ޑޮލަރަށްވުރެ ގިނައިން ހުންނާނެ. މި 650 މިލިއަން ޑޮލަރުގެ ތެރެއިން 320 މިލިއަން ޑޮލަރު ސޮވެރެއިން ޑިވޮލަޕްމަންޓް ފަންޑުގައި އެބަހުރި ރޭގެ ނިޔަލަށް. ރޭގެ ނިޔަލަށް 320 މިލިއަން ޑޮލަރަށްވުރެ ގިނައިން ރައްކާކޮށްފިން. އަދި ޔުޒަބަލް ރިޒާވްގައި 330 މިލިއަން ޑޮލަރަށްވުރެ ގިނައިން އެބަހުރި. އެހެންވީމާ ޖުމްލަ 650 މިލޮއަނަށްވުރެ ގިނަ ފައިސާ އެބަހުރި އަޅުގަނޑުމެން އަތުގައި

ރައީސް ޑރ. މުހައްމަދު މުޢިއްޒު

މީގެ އިތުރުން ރާއްޖޭގެ ތާރީޚްގައިވެސް ގްރޮސް ރިޒާވް މައްޗަށް ނުދާ ވަރަށް މިހާރު މައްޗަށް ގޮސްފައިވާ ކަމަށް ރައީސް ވިދާޅުވިއެވެ. އެގޮތުން 1.27 ބިލިއަން ޑޮލަރު ގްރޮސް ރިޒާވްގައި ހުރި ކަމަށް އެމަނިކުފާނު ވިދާޅުވިއެވެ.

މީގެ އިތުރުން އިތުރު ފައިސާ ހޯދުމަށް ކިރާ މަސައްކަތްތައްވެސް ކުރިއަށްދާ ކަމަށާ އެކަންވެސް ވަރަށް ކާމިޔާބު ކަމަށް ރައީސް ވިދާޅުވިއެވެ. އެހެންކަމުން ބޭރުގެ ދަރަނިތައް ދެއްކުމަށް އެއްވެސް ކަންބޮޑުވުމެއް ނެތް ކަމަށް އެމަނިކުފާނު ވިދާޅުވިއެވެ.