ގިރިފުށީގައި ބާއްވާ ތަމްރީންތަކުގައި ވަޒަން ބޭނުންކުރުން ވަގުތީގޮތުން ހުއްޓާލައިފި

ގިރިފުށީގައި ގާއިމްކޮށްފައިވާ ސިފައިންގެ ތަމްރީން މަރުކަޒުގައި ބާއްވާ ތަމްރީންތަކުގައި ވަޒަން ބޭނުންކުރުން ވަގުތީގޮތުން ހުއްޓާލައިފިއެވެ.

އެމްއެންޑީއެފްއިން މިކަން ހާމަކޮށްފައިވަނީ ގިރިފުށީގެ ތަމްރީނަކުން ޖެހި ވަޒަނެއްގެ ސަބަބުން ސަފާރީއެއްގައި ހުރި 41އަހަރުގެ ޖަރުމަނުވިލާތަށް ނިސްބަތްވާ ފަތުރުވެރިއަކަށް އަނިޔާވި މައްސަލައިގައި ނެރުނު ބަޔާނެއްގައެވެ.

އެ ބަޔާނުގައި ބުނީ އެމީހާއަށް އަނިޔާވި ވަޒަނަކީ ތަނެއްގައި ޖެހިފައި ދިޔަ ވަޒަނެއްކަމަށެވެ. އެމްއެންޑީއެފްއިން ބުނީ މިހާތަަނަށް ކުރި ތަހުގީގުން އެ ސަފާރީ ދަތުރުކުރަމުން ގެންދިޔައީ ވަޒަނެއް ސީދާ އަރާވަރަށްވުރެ ދުރުންކަމަށާއި އެމީހާއަށް ސިފައިންގެ ފުރަތަމަ އެހީތެރިންގެ ފަރުވާލިބި، އިތުުރު ފަރުވާއަށް ހުޅުމާލެ ޓްރީޓޮޕް ހޮސްޕިޓަލަށް ގެންދެވުނު ކަމަށެވެ.

ސިފައިންނާއި އާންމުންގެ ސަލާމަތާއި ރައްކާތެރިކަމަކީ ތަމްރީންތަކުގައި ހިމެނޭ މުހިންމުކަމެއްކަން ފާހަގަކުރަމުން އެމްއެންޑީއެފްއިން ބުނީ ބަޑި ޖެހުމުގެ ތަމްރީނަކީ މުހިންމު ކަމަކަށްވުމުން އެ ސަަރަހައްދުން ދަތުރުކުރާ ފަރާތްތަކަށް ގެއްލުންނުވާނެފަަދަ ގޮތަކަށް އެކަން ކުރުމަށް ސަމާލުކަންދޭ ކަމަށެެވެ.

އަދި މިކަމާއި ގުޅޭގޮތުން ވަގުތުން ތަހުގީގެއް ފަށައި، އެ ތަހުގީގު ނިމެންދެން ގިރިފުށީގައި އޮންނަ ތަމްރީންތަކުގައި ވަޒަން ބޭނުންނުކުރާނެކަމަށްވެސް ވަނީ ބުނެފައެވެ.

އެމްއެންޑީއެފްއިން ބަޔާން ނިންމާލަމުން ވަނީ މި ހާދިސާއަށް މައާފަށް އެދި، އެކަން ތަކުރާރުވިޔަ ނުދިނުމަށް ކުރެވެން ހުރި ހުރިހާ މަސައްކަތެއް ކުރާނެކަމަށް ބުނެފައެވެ.