ދައުރު ނިމުމުގެ ކުރިން ގޯއްޗާއި ފްލެޓް ހަވާލުކޮށްދޭނަން: ޑރ. މުއްޠަލިބު

މި ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ކުރިއަށް ގެންދާ "ޢާއިލީ ބޯހިޔާވަހިކަން" ޕްރޮގްރާމުން ދޫކުރުމަށް ހަމަޖެހިފައިވާ ފްލެޓްތަކާއި ގޯތިތައް މި ދައުރުގެ ތެރޭގައި ހަވާލުކޮށްދެއްވާނެ ކަމަށް ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުالله މުއްތަލިބު ވިދާޅުވެއްޖެއެވެ.

ބޯހިޔާވަހިކަން އެންމެނަށް ސިޔާސަތުގެ ދަށުން ދޫކުރުމަށް ހަމަޖެހިފައިވާ ފްލެޓަށާއި ގޯއްޗަށް އެދުމުގެ ފުރުސަތު މިއަދު ވަނީ ހުޅުވާލާފައެވެ.

އެކަމާގުޅޭ އިތުރު މައުލޫމާތު ދެއްވަމުން ވަޒީރު މުއްޠަލިބު ވިދާޅުވީ، 2008 ގެ ފަހުން އެއްވެސް ސަރުކާރަކަށް އެ ސަރުކާރަކުން ފެށި ޕްރޮޖެކްޓެއް ނިންމައި ފްލެޓަށް މީހުން ވެއްދިފައި ނުވާ ކަމަށެވެ. ނަމަވެސް މި ސަރުކާރުން އެކަން ބަދަލުކުރާނެ ކަމަށެވެ.

”މާތް الله ވާގިފުޅާއެކު އަޅުގަނޑުމެން މި ދައުރު ތެރޭގައި ގޯތިތައްދީ، ރެޖިސްޓްރީ ހަދައިދީ، އިން ވަކިކޮށްދީ ގޯތި ހަވާލު ކުރާނަން. އަޅުގަނޑުމެން އިއުލާން ކުރާ 7900 ފުކެޓަކީ، މިހާތަނަށް ފައިނޭސް ޔަގީންވެފައިވާ ޔުނިޓް ތަކުގެ އަދަދު. 2008 ފަހުން އެއްވެސް ސަރުކާރަކަށް އެ ސަރުކާރަކުން ފެށި މަޝްރޫއުއެއް ނިންމައި ފުލެޓް ތަކަށް މީހުން ވެއްދިފައެއްް ނެތް. އިރާދަކުރެއްވިއްޔާ މި ސަރުކާރުން އެކަން ބަދަލު ކުރާނަން. އަޅުގަނޑުމެންގެ އަމާޒަކީ މި ހުރިހާ ފްލެޓްތަކެއް މަސައްކަތްތައް ނިންމައި މީހުންނަށް ދިރިއުޅެވޭ ވަރުކުރުން."

ވަޒީރު މުއްޠަލިބު

ވަޒީރު އިތުރަށް ވިދާޅުވީ، މިއަދު އިއުލާނުކުރި ބޯހިޔާވަހިކަމުގެ ތެރޭގައި ނުފަށާ އެއްވެސް މަޝްރޫއެއް ނުހިމެނޭނެ ކަމަށެވެ.

އެގޮތުން، ރަސްމާލެ ހިއްކުމުގެ މަޝްރޫއު ވެސް މިހާރު ހަލުވި ސްޕީޑުގައި ކުރިއަށްދާ ކަމަށާ، 7،900 ފުލެޓަކީ ފައިނޭންސްވެސް ހަމަޖެހިފައިވާ ފުލެޓް ކަމަށެވެ. އަދި އެ 7900 ފުލެޓަކީ މިހާރު ޔަގީންވެފައިވާ ފުލެޓުތަކުގެ އަދަދު ކަމަށާއި ދައުރު ނިމޭއިރު އެ އަދަދު އިތުރުވާނެ ކަމަށާ، ދައުރު ނިމުމުގެ ކުރިން ފުލެޓްތައް ނިންމައި ފުލެޓް ދޫކުރާނީ އެތަނުގައި އުޅެވޭވަރު ކުރުމަށްފަހު ކަމަށް އޭނާ ވިދާޅުވިއެވެ.

މިއަދު ހުޅުވާލާ ފުރުސަތުގައި 1500 ގޯތި ދޫކުރާއިރު ގޯތި ދޫކުރުމަށް ހަމަޖެހިފައިވަނީ ދެ ކެޓަގަރީ އަކަށް ބަހާލައިގެންނެވެ.

އޭގެ ތެރެއިން މާލޭ ރަށްވެހިންނަށް އަދި ޚާއްޞަ އިސްކަންދެވޭ ކެޓަގަރީތަކަށް ގޯތި ދޫކުރުމަށް ހަމަޖެހިފައިވަނީ ގްރޭޓާ މާލޭ ސަރަހައްދުންނާއި ރަސްމާލެއިންނެވެ. އަދި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރަން ހަމަޖެހިފައިވަނީ ހަމައެކަނި ރަސްމާލެއިންނެވެ.