ރައީސް ދެއްވާ ޚާއްސަ ސްކޮލާޝިޕް 19 ދަރިވަރަކު ޙާޞިލްކޮށްފި

މިދިޔަ އަހަރުގެ އޭ އެލެވެލް އިމްތިހާނުން އެންމެ މަތިން ފާސް ހޯދައިގެން ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕް މިއަހަރު 19 ދަރިވަރަކު ޙާޞިލްކޮށްފިއެވެ.

ރައީސްގެ ޚާއްސަ ސްކޮލަރޝިޕް ލިބުނު ދަރިވަރުންނަށާއި، ހައި އެޗީވާރސް ސްކޮލަރޝިޕްގެ ފުރުޞަތު ހޯދި 117 ދަރިވަރުންނަށް އެކަމުގެ ލިޔުން މިރޭ ވަނީ ޙަވާލުކޮށްފައެވެ.

މިލިޔުން ހަވާލުކޮށްފައިވާނީ އެކަމަށްޓަކައި، މިރޭ (18 ޖުލައި 2024، ބުރާސްފަތި ދުވަހުގެރޭ) 20:45 ގައި ބޭއްވި ހަފުލާއެއްގައެވެ.  ހަފްލާ ކުރިއަށް ގެންގޮސްފައިވަނީ ހުޅުމާލޭގައި ހުންނަ ހުރަވީ ސްކޫލްގެ ޖަލްސާކުރާމާލަމްގައެވެ. ހަފުލާ ޝަރަފްވެރިކޮއްދެއްވީ ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު އެވެ. ރައީސުލްޖުމްހޫރިއްޔާގެ އިތުރުން، އެ މަނިކުފާނުގެ އަނބިކަނބަލުން ސާޖިދާ މުޙައްމަދާއި ކެބިނެޓްގައި ހިމެނިވަޑައިގަންނަވާ ބައެއް މިނިސްޓަރުންނާއި، ދައުލަތުގެ އެހެނިހެން ބައެއް ވަޒީރުންނާއި ޢިއްޒަތްތެރިން ބައިވެރިވެވަޑައިނެވިއެވެ.

ރައީސުލްޖުމްހޫރިއްޔާ ދެއްވާ ޚާއްސަ ސްކޮލަރޝިޕަކީ، ރާއްޖޭގެ ސްކޫލުތަކުން މަތީސާނަވީ އިމްތިޙާނުތަކުގައި ބައިވެރިވާ ދިވެހި ދަރިވަރުންގެތެރެއިން އެ އިމްތިޙާނުތަކުގެ "އިސްލާމް" އާއި "ދިވެހި" ހިމެނޭގޮތަށް، 5 މާއްދާއަކުން "އޭ ސްޓާރ" ހޯދާ ދަރިވަރުންނަށް ދޭ ސްކޮލަރޝިޕެކެވެ. ހައިއެޗީވާރސް ސްކޮލަރޝިޕް ލިބެނީ އެ އިމްތިޙާންތަކުގެ"އިސްލާމް" އާއި "ދިވެހި" ހިމަނައިގެން 5 މާއްދާއަކުން "އޭ" ގްރޭޑް ނުވަތަ އެއަށްވުރެން މަތީ ގްރޭޑެއް ކާމިޔާބުކުރާ ދަރިވަރުންނަށެވެ.

މި ދިޔަ 2023 ވަނައަހަރު 136 ދަރިވަރަކުވަނީ މި ސްކޮލަރޝިޕްތައް ކާމިޔާބުކޮށްފައެވެ. އެއީ ރައީސުލްޖުމްހޫރިއްޔާ ދެއްވާ ޙާއްސަ ސްކޮލަރޝިޕުގެ ފުރުޞަތު ކާމިޔާބުކުރި 19 ދަރިވަރަކާއި، ހައި އެޗީވާރސް ސްކޮލަރޝިޕްގެ ފުރުޞަތު ހޯދި 117 ދަރިވަރުންނެވެ. މިއިން ކޮންމެ ސްކޮލަރޝިޕެއް ކާމިޔާބުކުރާ ކޮންމެ ދަރިވަރަކަށް، ދުނިޔޭގެ ނިސްބަތުން މަތީފެންވަރުގެ ޔުނިވާރސިޓީއަކުން ފުރަތަމަ ޑިގްރީ ފެންވަރަށް ކިޔެވުމުގެ ހުރިހާ ޚަރަދެއް ދިވެހި ސަރުކާރުން ހަމަޖައްސައިދެއެވެ. މިއީ ދިވެހި ސަރުކާރުން ޚަރަދުކޮށްގެން ދޭ އެންމެ ޝަރަފުވެރި ސްކޮލަރޝިޕްތަކެވެ.