ހުޅުމާލެ 3 ވަނަ ފިޔަވަހި ހިއްކުުމުގެ %50 ނިމިއްޖެ

ހުޅުމާލޭ 3 ވަނަ ފިޔަވަހީގެ ބިން ހިއްކުމުގެ މަސައްކަތުގެ %50 މަސައްކަތް ނިންމާލެވިއްޖެކަމަށް މޯލްޑިވްސް އެއާޕޯޓްސް ކޮންޕެނީ (އެމްއޭސީއެލް) އިން ބުނެފިއެވެ.

އެމްއޭސީއެލްއިން ސޯޝަލް މީޑިއާގައި މިއަދު ކުރި ޕޯސްޓެއްގައި ވާގޮތުން ހުޅުމާލެ ފޭސް 3 ބިން ހިއްކުމުގެ މަޝްރޫޢުގެ ދަށުން ހިއްކުމަށް ހަމަޖެހިފައިވާ ޖުމްލަ 63 ހެކްޓަރުގެ ތެރެއިން 31.5 ހެކްޓަރު ބިން ވަނީ މިހާރު ހިއްކާ ނިމިފައެވެ. އަދި ފެންގަނޑު ފުން ހިސާބުތަށް ހިއްކާ ނިމި، މިހާރު ހިއްކަމުންދަނީ އެއަށް ވުރެ ތިލަ ސަރަހައްދުތަކުގައި ކަމަށްވެސް މި ޕޯސްޓުގައި ބުނެފައިވެއެވެ.

އެމްއޭސިއެލްއިން ބުނީ މި މަޝްރޫއު ކުރިއަށްދާ މިންވަރަށް ބަލާ،  ނިންމަން ހަމަޖެހިފައިވާ މުއްދަތުގެ ތެރޭގައި ނިންމާލެވޭނެ ކަމަށެވެ.

ހުޅުމާލެ 3 ވަނަ ފިޔަވަހި ހިއްކުމުގެ މަސައްކަތް ކުރަމުން ދަނީ އެކި މަރުހަލާތަކަށް ބަހާލައިގެންނެވެ. އެގޮތުން ހުޅުމާލެ 3 ވަނަ ފިޔަވަހި ހިއްކުމުގެ މަސައްކަތުގެ ދަށުން ފުރަތަމަ މަރުހަލާގެ 10 ހެކްޓަރުގެ މަސައްކަތް ނިންމުމަށް ފަހު މިހާރު ކުރަމުން ދަނީ ދެވަނަ ފިޔަވަހީގައި ހިއްކަން ހަމަޖެހިފައިވާ ޖުމްލަ 29 ހެކްޓަރުގެ ބިން ހިއްކުމުގެ މަސައްކަތެވެ. އަދި ތިންވަނަ މަރުހަލާގައި ހިއްކުމަށް ހަމަޖެހިފައިވާ 24 ހެކްޓަރުގެ ބިމާއެކު ޖުމްލަ 63 ހެކްޓަރުގެ ބިން ހިއްކާނެއެވެ.