އައްޑޫ ކަައުންސިލުން ކުރީ އުނދަގޫ، އެކަހަލަ ކައުންސިލެއް ދެން ނުހޮވާ: އިހްސާން

މި ސަރުކާރުން އައިސް މިވީ ދެ އަހަރުތެރޭ އައްޑޫ ސިޓީ ކައުންސިލުން ކުރީ "އުނދަގޫ" ކަމަށް ވިދާޅުވެ އެފަދަ ކައުންސިލެއް ދެން އިންތިހާބު ނުކުރަން ހޯމް މިނިސްޓަރު އަލީ އިހްސާން އެދިވަޑައިގެންފަ އެވެ.

އައްޑޫ ސިޓީ ފޭދޫއަށް ނިސްބަތްވާ މިނިސްޓަރު އިހްސާން މިހެން ވިދާޅުވީ އައްޑޫ ސިޓީ ފޭދޫ މަގުއްދޫ ދާއިރާގެ ކެމްޕޭނު އޮފީސް ހުޅުވުމަށް ފަހު ދެއްކެވި ވާހަކަގައި އެވެ. އިހްސާން ވިދާޅުވީ މިދިޔަ ދެ އަހަރު މިހާރު އޮތް އައްޑޫ ކައުންސިލުން ސަރުކާރަށް އެކަށީގެންވާ އެއްބާރުލުން ދީފައިނުވާ ކަމަށެވެ. އޭގެ ބަދަލުގައި އުނދަގޫ ކުރި ކަމަށް ވިދާޅުވި އެވެ.

މިނިސްޓަރު ވިދާޅުވީ ސަރުކާރަށް އުނދަގޫކުރާ އަދި އެއްބާރުލުން ނުދޭ ކައުންސިލެއް އޮތުމަކީ އެ ރަށެއް ނުވަތަ ސިޓީއެއްގެ ތަރައްގީއަށް ހުރަސް އެޅި މަޝްރޫއުތައް ހުއްޓި މަޑުޖެހޭ ކަމެކެވެ. އެހެން އެކަން ވަނީ ކައުންސިލުތަކުން ސަރުކާރަށް އުނދަގޫ ކުރުމުގެ ގޮތުން އެއްބާރުލުން ނުދޭތީ ކަމަށް ވިދާޅުވި އެވެ.

މިސާލެއްގެ ގޮތުން ފާހަގަ ކުރެއްވީ މަރަދޫގައި ޕޮލިސް ސްޓޭޝަނަށް އެޅުމަށް ކުރަމުންދާ މަސައްްކަތެވެ. މިނިސްޓަރު ވިދާޅުވީ އެ މަސައްކަތް ފެށުމަށް ސަރުކާރުން ބޭނުންވިތާ ކިތަންމެ ދުވަހެކެވެ. ނަމަވެސް ކައުންސިލުން ބިން ކަނޑައަޅާ ބިން ދިނުމުގައި ލަސް ކުރަމުންދާ ކަމަށެވެ. މިފަދަ ކޮންމެ ކަމަކުން ދެރައާ ގެއްލުން ލިބެނީ ރައްޔިތުންނަށް ކަމަށް ވިދާޅުވި އެވެ.

މީގެ ކުރީން ވެސް ރައީސް ޔާމީންގެ ވެރިކަމުގައިވެސް އޭރު އޮތް ކައުންސިލުން އަމަލުކުރީ އެގޮތަށް ކަމަށް ވިދާޅުވި އެވެ.

އައްޑޫގައި އަބަދުވެސް އެމްޑީޕީއަށް ބޮޑު ތާއީދެއް އޮންނަ ސިޓީ އެކެވެ. ނަމަވެސް ނިމިިދޔަ ރިޔާސީ އިންތިހާބާއި މަޖިލީސް އިންތިހާބުގައި އެ ތާއީދު ދަށްވެފައި އޮތް މިންވަރު ފެނުނެވެ. މިނިސްޓަރު އިހްސާން ވަނީ ކުރިއަށް އޮތް ކައުންސިލް އިންތިހާބުގައި މިހާރު އޮތް ފަދަ ކައުންސިލެއް އިންތިހާބު ނުކުރަން އެދިވަޑައިގެންފަ އެވެ.

އޭގެ ބަދަލުގައި ސަރުކާރާއި ގުޅިގެން މަސައްކަތް ކުރާ ބަޔަކު ސިޓީއާ ރަށްރަށުގެ ވެރީންގެ ގޮތުގައި އިންތިހާބު ކުރުމަށް އެދިވަޑައިގަތެވެ.

މިފަހަރު އޮންނަ ލޯކަލް ކައުންސިލް އިންތިހާބުގައި ހުޅުދޫއާ މީދޫގައި އިންތިހާބު ކުރާނީ ވަކި ދެ ކައުންސިލެކެވެ. ދެން އޮތް ރަށްތަކަށް ސިޓީ ކައުންސިލެކެވެ.