އެއް މައްސަލައެއްގައި ދެކޮޅަށް ވެސް ޕެޓިޝަން ހުށަހެޅޭ ގޮތަށް ހަދައިފި

ރައްޔިތުންގެ މަޖިލީހަށް ޕެޓިޝަނެއް ހުށަހަޅާފައިވަނިކޮށް އެ ޕެޓިޝަނާ ދެކޮޅަށްވެސް އިތުރު ޕެޓިޝަނެއް ހުށަހެޅޭގޮތަށް ރައްޔިތުންގެ މަޖިލީހުގެ އާންމު ކޮމިޓީން މިއަދު ނިންމައިފިއެވެ.

އާންމު ކޮމިޓީގައި މިއަދު ބޭއްވި ބައްދަލުވުމުގައި ވަނީ މިކަމާ ގުޅޭ އިސްލާހް ކޮމިޓީ މެމްބަރުންގެ އިއްތިފާގުން ފާސްކޮށްފައެވެ. އެއްމައްސަލައެއްގައި ތަކުރާރުކޮށް މަޖިލީހަށް ޕެޓިޝަން ނޭޅޭގޮތަށް އޮންނަ އޮތުން މިހާރު ވަނީ އިސްލާހްކޮށްފައެވެ. މިކަމަށް ހަތް މެމްބަރުން ވަނީ ފެންނަކަމަށް ވޯޓުދީފައެވެ. އިސްލާހް ހުށަހެޅީ ސަރުކާރަށް ނިސްބަތްވާ ޕީއެންސީގެ ފުނަދޫ ދާއިރާގެ މެންބަރު މުހައްމަދު މަމްދޫހެވެ.

މަޖިލީހުގެ އާންމު ކޮމިޓީން މިފަދަ އިސްލާހެއް ގެނެސްފައިމިވަނީ ލާމަރުކަޒީ ޤާނޫނަށް ސަރުކާރުން ހުށަހެޅި އިސްލާހަކާ ދެކޮޅަށް ޕެޓިޝަނެއް ހުށަހެޅިފައިވަނިކޮށެވެ. އެ ޕެޓިޝަނަށް ދެހާހަށްވުރެ ގިނަ މީހުންގެ ސޮއި ވަނީ ލިބިފައެވެ.

ރަށްރަށާއި ސިޓީ ކައުންސިލްތަކުގެ އިހުތިސާސްގެ ތެރޭގައި ހިމެނޭ ބިންތަކާއި ތަންތަން، ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި ސަރުކާރަށް ނެގޭގޮތަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް މުހިންމު އިސްލާހުތަކެއް ވަނީ ހުށަހަޅާފައެވެ. ސަރުކާރުގެ ފަރާތުން އެ އިސްލާހް ހުށަހަޅާފައިވަނީ ތުޅާދޫ ދާއިރާގެ އަމިއްލަ މެންބަރު ޢަބްދުލްޙަންނާނު އަބޫބަކުރެވެ.

މި ބިލު ހުށަހެޅުމުގެ މައިގަނޑު މަގުސަދަކީ ސަރުކާރުގެ ތަރައްގީގެ މަޝްރޫއުތައް ހަލުވި ދުވެއްޔެއްގައި ކުރިއަށް ގެންދިއުމަށްޓަކައި، ކައުންސިލްތަކުގެ ފުރިހަމަ އެއްބާރުލުން ގާނޫނީ އޮނިގަނޑެއްގެ ތެރެއިން ކަށަވަރުކުރުމެވެ. އަދި ދައުލަތުގެ މަޝްރޫއުތަކަށް ބޭނުންވާ ބިންތަކާ ގުޅޭ އިޖުރާއާތުތައް ހަރުދަނާކުރުމަކީ ވެސް މި ބިލުގެ މަގުސަދެކެވެ.