ދޮގު މަޢުލޫމާތެއް ފަތުރަން ނަގަނީ ކުޑަ ވަގުތުކޮޅެއް؛ ރަނގަޅު މިހާވެސް ބަދުނާމުވާ ފަހަރުއާދޭ: އިހްސާން

މިޒަމާނުގައި ދޮގު މަޢުލޫމާތެއް ފަތުރަން ނަގަނީ ކުޑަވަގުތު ކޮޅެއް ކަމަށާ، ނަމަވެސް އޭގެ ސަބަބުން ބޮޑެތި ގެއްލުންލިބި، ރަނގަޅު މިހާވެސް ބަދުނާމުވާ ފަހަރު އަންނަ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ދިވެހި ރާއްޖޭގެ ޤައުމީ ޔުނިވަރސިޓީގެ ބެޗްލަރ އޮފް އާރޓްސް އިން މީޑިއާ އެންޑް ޕަބްލިކް ރިލޭޝަންސްގެ ދަރިވަރުންގެ ކުރިއަށް ގެންދިޔަ "ނޯ ކެޕް ޖަސްޓް ފެކްޓްސް" ކެމްޕެއިންގައި ވާހަކަދައްކަވަމުން އިހްސާން ވިދާޅުވީ، ދޮގު މައުލޫމާތު ފެތުރުމަކީ ރަސޫލު ޒަމާނުންފެށިގެންވެސް ކުރަމުން އަންނަ ކަމެއް ކަމަށެވެ. ނަމަވެސް، އެކަމުގައި އެ ޒަމާނާއި މިޒަމާނާ އެކަމުގައި ވަރަށް ތަފާތު ކަމަށެވެ.

އެހެނީ އެ ޒަމާނުގައި ދޮގު މައުލޫމާތު ފެތުރުމަށް ވަރަށް ގިނަ ވަގުތު ނަގާއިރު، މިޒަމާނުގައި އެފަދަ މައުލޫމާތެއް ފަތުރަން ނަގަނީ އެންމެ ސުކުންތެއްކަން އިހްސާން ފާހަގަކުރެއްވިއެވެ.

ކުރީގައި އެއްލައްކަ މީހުންނަށް (ދޮގު މައުލޫމާތު) ފަތުރަން އެ ނަގާ އެއް އަހަރު ނަގާއިރު، އެ އަހަރުތެރޭގައި ހަގީގަތް ހާމަކޮށް، އެ މައުލޫމާތު ރަނގަޅު ކުރުމަށާ އެއަށް ޓެކްލް ކުރުމަށް އެބަލިބޭ އެއް އަހަރު. މިހާރު ޓެކްލްކުރާ މީހާއަށް މައުލޫމާތު ލިބޭއިރު އެއްލައްކަ މީހުންނަށް ފެތުރިފައި އޮންނަނީ. ކިހިނެއް ރަނގަޅު ކުރާނީ.

ވަޒީރު އިހްސާން

”ދޮގުވާހަކައާއި، މިސްއިންފޮމޭޝަން، ޑިސްއިންފޮމޭޝަން، މަލްއިންފޮމޭޝަން ސްޕެރެޑްވެގެންދާ ސްޕީޑް، އަދި ސްޕްރެޑްކުރުމުގައި ބައިވެރިވާ މީހުންނާ އެބައިވެރިވާ ރޫހު މާގިނަ ހަގީގަތް ފަތުރަންދާ މީހުންނަށްވުރެ.“ ވަޒީރު އިހްސާން ވިދާޅުވިއެވެ.

ކަންމިހެން ހުރުމުން، ތެދު މަޢުލޫމާތު ގެނެސްދިނުމަކީ އެންމެންގެ ޒިންމާއަކަށް ހަދަން ޖެހޭކަމަށާ، އަދި ދޮގު މަޢޫލޫމާތު ފަތުރާކަމުގައި ވަނީނަމަ އެކަމަށް ހައްލެއް ގެނައުމުގެ ގޮތުން ޤާނޫނުތަކުން ފިޔަވަޅު އެޅުމާ ގުޅޭގޮތުން ގޮތެއް ނިންމަން ޖެހޭކަމަށްވެސް ވަޒީރު ވިދާޅުވިއެވެ.

"އަޅުގަނޑުމެންގެ ކަރިކިއުލަމްގެ ތެރެއަށްވެސް ނުވަތަ އެހެން ދިމާލަކަށްވެސް އެބަ އަންނަން ޖެހޭ ތަޢުލީމާ އެކުގައި އަންނަން ޖެހޭ ތަރުބިއްޔަތުގެ ބައި. އެޑިއުކޭޝަންއާ އެއްވަރަށް އަޅުގަނޑުމެން މިކިޔާ ތަރުބިއްޔަތު އަންނަން ޖެހޭ. އޯލެވެލްއިން 8 ފާސް ހޯދައިގެން އަންނަ މީހާ އަނެކާއަށް އިޚްތިރާމް ކުރަން ނޭގެންޏާ އެ ފާހުގެ ބޭނުމެއް ނެތް. 9 ވަނަފަސް ކޮންމެވެސް ގޮތަކުން ފަހަތަށް ގޮސްފަ އެވީ. މިވަގުތު ތިބި ކުދިންނަށް ދޮގު މަޢޫލޫމާތު ފެތުރުމުން ސަލާމަތް ކުރުމަށް ގޮތްތަކެއް ކިޔައިދޭނީ "

ވަޒީރު އަލީ އިޙްސާން

މާލޭގެ އެކި ސްކޫލުތަކާއި އެމްއެންޔޫގެ އެކި ކޯސްތަކުގެ ދަރިވަރުންނާއެކު 100 އަށްވުރެ ގިނަ މީހުން ބައިވެރިވި، މި ފޯރަމްގައި ވަނީ ނޭނގި ފަތުރާ ދޮގު މައުލޫމާތާއި ގަސްތުގައި ފަތުރާ ދޮގު މައުލޫމާތުގެ ތަފާތާއި އެ ފަދަ މައުލޫމާތުތައް ދެނެގަންނާނެ ގޮތްތައް ކިޔާދީފައެވެ.

ދިވެހި ރާއްޖޭގެ ޤައުމީ ޔުނިވަރސިޓީގެ ބެޗްލަރ އޮފް އާރޓްސް އިން މީޑިއާ އެންޑް ޕަބްލިކް ރިލޭޝަންސްގެ ދަރިވަރުންގެ ކުރިއަށް ގެންދިޔަ "ނޯ ކެޕް ޖަސްޓް ފެކްޓްސް" ކެމްޕެއިން ކުރިއަށް ގެންގޮސްފައިވަނީ ދޮގު މައުލޫމާތު ފެތުރުން މަދުކުރުމަށް ސްކޫލު ނިންމާ ދަރިވަރުންނާއި ކޮލެޖު/ޔުނިވާސިޓީތަކުގައި ކިޔަވަމުން އަންނަ ދަރިވަރުން ހޭލުންތެރިކުރުވުމެވެ.