ޕްރޮގްރެސިވް ކޯލިޝަނުން އަލްހާން ފަހުމީ އެންޑޯޒްކޮށްފި

ޕްރޮގްރެސިވް ކޯލިޝަންގެ ފަރާތުން މިއަހަރުގެ މަޖިލިސް އިންތިޚާބަށް އެންޑޯޒްކުރި ފަރާތްތަކުގެ ތެރޭގައި އަލްހާން ފަހުމީ ހިމެނިވަޑައިގެންފިއެވެ.

ޖޭޕީގެ ޓިކެޓްގައި ހެންވޭރު އުތުރު ދާއިރާއަށް ވާދަކުރައްވާ އަލްހާންއަށް އެ ކޯލިޝަނުން ތާއިދުކުރާކަން ހާމަކޮށްފައިވަނީ މިއަދު ކުރިއަށްދިޔަ ނޫސްވެެރިންގެ ބައްދަލުވުމެއްގައެވެ.

އަލްހާން ވަނީ އެކޯލިޝަނުން އަލްހާންއަށް ތާއިދުކުރެއްވިކަމަށްޓަކައި ޓްވިޓަރ މެދުވެރިކޮށް ޝުކުރުއަދާކުރައްވާފައެވެ.

ޕްރޮގްރެސިވް ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޕީއެންސީގެ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބުދުއްރަހީމް އަބުދުﷲ ވިދާޅުވީ، ޕީޕީއެމްއިން މަޖިލީހުގެ އިންތިޚާބުގައި ވާދަކުރާނީ 32 ދާއިރާއަކަށްކަމަށެވެ.

އަދި ޕީއެންސީ އަދި ޑީއާރްޕީން 13 ދާއިރާއަކަށް، ޖުމްހޫރީ ޕާޓީން 38 ދާއިރާއަކަށް ވާދަކުރާއިރު، އެމްޑީއޭއަށް ހަތަރު ދާއިރާއެއް ދޫކޮށްލާފައިވާނެކަމަށް އަދުރޭ ވަނީ ވިދާޅުވެފައެވެ.