މީހަކު ރަހީނުކޮށް، އިނގިލި ބުރިކޮށްލި މައްސަލައިގައި އެމްއެންޑީއެފްގެ ދެމީހުން ހިމެނޭ

މާލޭގައި މީހަކު ރަހީނުކޮށް، ޖިސްމާނީ ގޮތުން އަނިޔާދީ، އޭނާގެ އިނގިލި ބުރިކޮށްލި މައްސަލައިގައި ހައްޔަރުކުރެވުނު ފަސް މީހުންގެ ތެރޭގައި އެމްއެންޑީއެފްގެ ދެ އޮފިސަރުން ހިމެނޭ ކަމަށް ފުލުހުން މިއަދު ހާމަކޮށްފިއެވެ.

ފުލުހުން ހާމަކުރެއްވި ގޮތުގައި މި މައްސަލަ ހިނގާފައިވަނީ މިއަހަރުގެ މެއި 25 އިން ޖޫން 25 އާ ދެމެދުގެ މުއްދަތުގައެވެ. އަނިޔާ ލިބުނު ފަރާތަކީ 30 އަހަރުގެ ދިވެހި ފިރިހެނެކެވެ. މި މައްސަލައިގައި ހައްޔަރުކުރެވުނު ފަސް މީހުންގެ ތެރެއިން ހަތަރު މީހުން ވަނީ ޝަރީޢަތް ނިމެންދެން ބަންދުގައި ބޭތިއްބުމަށް ކޯޓުން އަމުރުކޮށްފައެވެ. އަނެއް މީހާ ބަންދުގައި ބަހައްޓާފައިވަނީ ތަޙުޤީޤު މަރުޙަލާ ނިމެންދެނެވެ.

ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިންޓެންޑެންޓް ހަސަން ޝިފާއު ވިދާޅުވީ މި މައްސަލައިގައި 18 އަހަރުން ދަށުގެ ތިން ކުދިން ހިމެނޭތީ، އެ ކަންވެސް ބަލަމުންދާ ކަމަށެވެ. އަދި ހައްޔަރުކުރެވުނު މީހުންގެ ތެރެއިން ދެ މީހަކީ އެމްއެންޑީއެފްގައި ވަޒީފާ އަދާކުރާ މީހުން ކަމަށާއި، މި މަޢުލޫމާތު އެމްއެންޑީއެފްއާ ހިއްސާކޮށް، އެ މުއައްސަސާއިން ވެސް އަޅަންޖެހޭ ފިޔަވަޅުތައް އަޅަމުންދާ ކަމަށް ޝިފާއު ވިދާޅުވިއެވެ.

"މިދެންނެވުނު ފަރާތަށް ޖިސްމާނީ ގޮތުން އެކިވަރުގެ ބޮޑެތި އަނިޔާތައް ދީފައިވާކަން އޭނާގެ ހަށިގަނޑު ބެލިބެލުމުން ފާހަގަ ކުރެވިފައިވޭ. އެގޮތުން އޭނާގެ ވައަތު ލޯމަތީގައި ޖަހައި މާރާމާރީ ހިންގުމުގެ ސަބަބުން ވައަތު ލޮލަށް ލޭއަރައި، ލޯކައިރި ވަރަށް ބޮޑަށް ދުޅަވެ، ނޫފައި ގަނެފަ ހުރިކަން ފާހަގަ ކުރެވޭ. އޭގެ އިތުރުން ހަށިގަނޑުގެ އެކި ތަންތަނުގައި އަލިފާން ޖެއްސުމުގެ ސަބަބުން ލިބިފައިވާ އަނިޔާތަކެއް ކަމަށް ބެލެވޭ ޒަހަމްތަކާއި އޭނާގެ ހަށިގަނޑު އެކިތަންތަނުގައި ތަޅާ މާރާމާރީ ހިންގުމުގެ ސަބަބުން ލިބިފައިވާ ޒަހަމްތަކެއް ކަމަށް ބެލެވޭ ޒަހަމްތަކެއް ވެސް ފެންނަން ހުރިކަން ފާހަގަ ކުރެވުނު. ތޫނު ހަތިޔާރެއް ބޭނުން ކޮށްގެން އޭނާގެ ވައަތު ކުޑަވާ އިނގިލީގެ ދެވަނަ ބަދައިން ފެށިގެން ބުރިކޮށްލާފަވާކަން ފާހަގަ ކުރެވުނު"

ޝިފާއު ވިދާޅުވިއެވެ.

މި މައްސަލައިގައި އަނިޔާ ލިބުނު މީހާއަށް އެކި ބާވަތުގެ އަނިޔާތައް ދީފައިވާކަން ފާހަގަކުރެވިފައިވާ ކަމަށާއި، އޭގެ ތެރޭގައި އަލިފާނުގެ އަނިޔާއާއި މާރާމާރީގެ އަނިޔާގެ އިތުރުން، އޭނާގެ ވާތު ކުޑަވާ އިނގިލި ބުރިކޮށްލާފައިވާ ކަމަށް ޝިފާއު ވިދާޅުވިއެވެ. މި މައްސަލައިގެ ތަޙުޤީޤު ދަނީ ކުރިއަށެވެ.