ތޫފާން މެލީސާ ކިއުބާއަށް، ދިވެހި ދަރިވަރުންނަށް ނުރައްކަލެއް އަދިނެތް

ކެރީބިއަންގެ ބައެއް ޤައުމުތަކަށް އަރަމުންދާ ބާރުގަދަ ތޫފާން ހަރިކޭން މެލީސާ، ކިއުބާއަށް އަރަން ފަށައިފިއެވެ.

ކިއުބާގެ ބައެއް ހިސާބުތަކަށް މެލީސާ އަރާފައިވާއިރު، މިހާތަނަށް އެންމެބޮޑު ގެއްލުމެއް ލިބުނުކަމަށް އެޤައުމުގެ ނޫސްތަކުން ބުނެފައިވަނީ، ސަންޓިއާގޯ ޑި ކިއުބާގެ ބައެއް ހިސާބުތަކަށެވެ.

ތޫފާން އެރި ތަންތަނުގައި ހުރި ގެތަކުގެ ފުރާޅު އެއްލާލާފައިވާއިރު، މަގުތަކުގެ އެއްފަޅީގައި ހުރި ގަސްތައް މުލުންލުހި ގެތަނުގެ މައްޗަށް ވަނީ ވެއްޓިފައެވެ. އެކަމުގެ ސަބަބުން ބައެއް ގޭބިސީތަކަށް ވަނީ ބޮޑެތި ގެއްލުންތަކެއް ލިބިފައެވެ.

ކިއުބާގެ އިރުމަތީ ހިސާބަށް އެރި މި ތޫފާނުގައި ގަޑިއަކު 140 މޭލު ބާރުމިނުގައި ވައިޖެހިފައިވާއިރު، ތޫފާނުގެ ނުރައްކާ އަދި އޮތީކަމަށް އެޤައުމުގެ މޫސުމާ ބެހޭ އިދާރާއިން ވަނީ ބުނެފައެވެ.

ތޫފާން މެލީސާ އެރުމާ ގުޅިގެން ކިއުބާ ސަރުކާރުން ވަނީ ބައެއް ކަންކަމަށް ސަމާލުވުމަށް އިލްތިމާސްކޮށްފައެވެ. އެގޮތުން ފަސޭހައިން އަތުޖެހޭގޮތަށް ކުއްލި ހާލަތުގައި ބޭނުންވާ ބޭސްފަދަ އެއްޗެހި އަތުޖެހޭ ހިސާބުގައި ބެހެއްޓުމާއި، މުއާސަލާތީ އާލާތްތައް ހިފައިގެން އުޅުމަށް ސަމާލްކަން ދިނުމަށް ވަނީ އެދިފައެވެ. މީގެ އިތުރުން ދުވަސްވީ މީހުންނާއި ކުޑަކުދިންނަށް އެހީވުމާއި އިދާރާތަކުން އަންގާގޮތަށް އަމަލުތައް ބެހެއްޓުމަށް ވަނީ އިލްތިމާސްކޮށްފައެވެ.

ކިއުބާއަށް މެލީސާ އަރާފައިވާއިރު، ތޫފާން އެރި ސަރަހައްދާ، ވެރިރަށް ހަވާނާ އެއީ މުޅިން ދެ ހިސާބެކެވެ. ކިއުބަން ޔުނިވަރސިޓީގައި ދިވެހި ދަރިވަރުން ކިޔަވަމުންގެންދާއިރު، ތޫފާންގެ ނުރައްކަލެއް އެހިސާބަކަށް އަދި ނެތެވެ. މިކަން އެ ޔުނިވަރސިޓީގައި ކިޔަވަމުންދާ ދަރިވަރަކު ވޮއިސްއަށް ވަނީ ކަށަވަރުކޮށްދީފައެވެ. ކިއުބަން ޔުނިވަރސިޓީގައި ދިވެހި 3 ދަރިވަރަކު ކިޔަވަންގޮސް އެބަތިއްބެވެ.

ކިއުބާގެ ކުރިން ހަރިކޭން މެލީސާ އަރާފައިވަނީ ޖެމެއިކާއަށެވެ. ތޫފާން އެރުމުގެ ސަބަބުން ޖެމެއިކާއަށް ވަނީ ބޮޑެތި ގެއްލުންތަކެއް ލިބިފައެވެ. އެގޮތުން މިއީ ތާރީހުގައިވެސް ތޫފާނެއްގައި އެޤައުމަށް މިހާބޮޑު ގެއްލުމެއް ލިބުނު ފުރަތަމަ ފަހަރުކަމަށް ޖެމެއިކާއިން ވަނީ ބުނެފައެވެ. ތޫފާނުގެ ސަބަބުން ބައި މިލިއަން މީހުން ކަރަންޓްގެ ހިދުމަތުން މަހްރޫމް ވެފައިވާކަމަށް ޖެމެއިކާ ސަރުކާރުން ވަނީ ބުނެފައެވެ.