ރޯގާތައް ހަލުވި ކަމާއެކު ފެތުރެނީ؛ ޢީދު ބަންދުގައި ރައްކާތެރިކަމުގެ ފިޔަވަޅު އަޅާން އެދިއްޖެ

ރާއްޖޭގެ އެކި ހިސާބުތަކުގައި އަރިދަފުސް ރޯގާއާއި އިންފްލުއެންޒާ އާންމުކޮށް ފެންނަ މިންވަރަށް ވުރެ އިތުރުވަމުންދާތީއާއި، މާލެ ސަރަހައްދުން ހިމަބިހީގެ ކޭސްތަކެއް ފެނިފައިވާތީ ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން މިއަދު ނެރުނު ނޫސް ބަޔާނެއްގައި ބުނެފައިވަނީ، އެ އެޖެންސީގެ ތަފާސް ހިސާބުތަކުން ދައްކާ ގޮތުގައި މިދުވަސްވަރު ބަލިތައް ފެތުރުން އިތުރުވަމުންދާ ކަމަށެވެ.

އަދި ކުރިއަށް އޮތީ އީދު ބަންދުގެ ދުވަސްތައް ކަމަށްވެފައި، ރާއްޖޭން ބޭރަށާއި އަތޮޅުތެރެއަށް ދަތުރުފަތުރުކުރުން އިތުރުވާނެތީ، ބަލިތައް ފެތުރުން ކުޑަކުރުމަށްޓަކައި ހާއްސަ ސަމާލުކަމެއް ދިނުމަށް އެޗްޕީއޭއިން ވަނީ އެދިފައެވެ.

ބަލިތަކުން ރައްކާތެރިވުމަށް އެޗްޕީއޭއިން އިރުޝާދު ދީފައިވާ މުހިންމު ކަންތައްތަކުގެ ތެރޭގައި:

ބަލީގެ އަލާމާތްތައް ފެންނަނަމަ: ހުން އައުން ނުވަތަ ނޭވާލާ ނިޒާމުގެ ބަލީގެ އަލާމާތެއް ފެންނަނަމަ ގޭގައި މަޑުކުރުމާއި، އާންމު އެއްވުންތަކަށް ނުދިއުން.

ފަރުވާ ހޯދުން: ހާލަތު ގޯސްވާނަމަ ލަސްނުކޮށް ސިއްހީ ފަރުވާ ހޯދުމާއި، ޑޮކްޓަރަށް ދައްކަން ދާއިރު މާސްކް އެޅުމުގެ އިތުރުން އާންމު ދަތުރުފަތުރުގެ ވަސީލަތްތައް ބޭނުން ނުކުރުން.

ހިމަބިއްސަށް ސަމާލުވުން: ހިމަބިއްސަށް ޝައްކު ކުރެވިގެން ޓެސްޓު ހަދައިފިނަމަ، ނަތީޖާ ލިބެންދެން އެކަހެރިވެގެން ހުރުން.

މާސްކް އެޅުން: އެއާޕޯޓް ޓާމިނަލްތަކާއި، ފެރީ ލައުންޖް ފަދަ މީހުން ގިނަ ތަންތަނުގައި މާސްކް އެޅުން.

ސާފުތާހިރުކަން: ސައިބޯނި ލައިގެން އަތްދޮވުން ނުވަތަ ސެނިޓައިޒް ކުރުން އަދި ވެކްސިންގެ ޑޯޒްތައް ފުރިހަމަކުރުން.

މީގެ އިތުރުން، މަދިރީގެ ޒަރީއާއިން ފެތުރޭ ބަލިތަކުން ރައްކާތެރިވުމަށްޓަކައި މަދިރި ލޯޝަން ބޭނުންކުރުމަށާއި، ހަށިގަނޑު ނިވާވާނެހެން ހެދުން އެޅުމަށް އެޗްޕީއޭއިން ބާރުއަޅުއްވައެވެ. އަދި ގޭގެއާއި ގޯތިތެރޭގައި މަދިރި އާލާވާ ތަންތަން ނައްތާލުމަށްވެސް އެ އެޖެންސީން ވަނީ އިލްތިމާސްކޮށްފައެވެ.

އެޗްޕީއޭއިން އިތުރަށް ބުނެފައިވަނީ، އާންމު ސިއްހަތާ ގުޅުންހުރި މައުލޫމާތު ހޯދުމުގައި ރަސްމީ ވަސީލަތްތަކުން ލިބޭ މައުލޫމާތަށް ބަރޯސާވުމަށެވެ.