ލުތުފީ ގެނައުމުން ޝެއިޚް އަލީ ޒައިދުގެ ތައުރީފު ސަރުކާރަށް

ހެންވޭރު ހާޖަރާގޭ އަބްދުﷲ ލުތުފީ ފިލައިގެން އުޅެނިކޮށް ރާއްޖެ ގެނައުމުން އައްޝެއިޚް އަލީ ޒައިދު ސަރުކާރަށް ތައުރީފު ކުރައްވައިފިއެވެ.

ރޭގެ ވަގުތެއްގައި ލުތުފީ ރާއްޖެ ގެނައުމާއެކު، ޝެއިޚް އަލީ ޒައިދު ކުރެއްވި ޓްވީޓޓެއްގައި ވިދާޅުވީ، ހުކުމަށް ފިލައިގެން އުޅޭ މީހުން ގެނައުމުގައި ކުރި ހޯއްދެވި އެންމެހާ ބޭފުޅުންނަށް މަރުހަބާ ދަންނަވާ ކަމަށެވެ. ރައްޔިތުންގެ ކުރިމަތީގައި ވައުދުވެފައި، އެވައުދު ފުއްދުމަކީ ރައްޔިތުން ވަރަށް ބަލައިގަންނަ ކަމެއް ކަމަށްވެސް ޝެއިޚް ވަނީ ވިދާޅުވެފައެވެ.

ޝެއިޚް އަލީ ޒައިދު އިތުރަށް ވިދާޅުވީ، އެފަދަ ހެޔޮ ކަންކަމަށް ހުރިހާ އެންމެންވެސް އަބަދުވެސް ތަރުހީބު ދޭން ޖެހޭނެ ކަމަށެވެ.

ލުތުފީ ރާއްޖެ ގެނެސްފައިވާތީ ރައްޔިތުންގެ މަޖިލީހުގެ ރައީސް، އަދި ކުރީގެ ރައީސް މުޙައްމަދު ނަޝީދުވެސް ވަނީ ސަރުކާރަށް ތައުރީފު ކުރައްވާފައެވެ.

ލުތުފީ ރާއްޖެ ގެނެސްފައިވަނީ، މިރޭ 21:15 ހާއިރު، އެމިރޭޓްސްގެ އީކޭ-653 ފްލައިޓުންނެވެ. އޭނާ ރާއްޖެ ގެނެސްފައިވަނީ ފުލުހުންގެ ހާއްސަ ޓީމެއްގެ ބެލުމުގެ ދަށުންނެވެ.