ޕާކިސްތާނު ސަފީރު އަފްޣާނު މަންދޫބާ ބައްދަލުކުރީ ހުއްދަ ނުހޯދައި: ޚާރިޖީ ވުޒާރާ

ޕާކިސްތާނަށް ކަނޑައަޅާފައި ހުރި ދިވެހި ސަފީރު އަފްޣާނިސްތާނުގެ މަންދޫބަކާ ބައްދަލުކުރީ ސަރުކާރުގެ ހުއްދަ ނެތިކަމަށް ޚާރިޖީ ވުޒާރާއިން މިއަދު ހާމަކޮށްފިއެވެ.

ތާލިބާނުންގެ މަންދޫބު ސަރުދާރު އަހުމަދު ޝަކީބާއި ސަފީރު ތޯހާއާ ޕާކިސްތާނުގައި ބައްދަލުކުރައްވާ މަންޒަރުގެ ފޮޓޯތަކެއް ބައިނަލްއަގުވާމީ މީޑިއާތަކުގައި މިދިޔަ ދެ ދުވަހު ރިޕޯޓުކޮށްފައިވެ އެވެ.

މިކަމާއި ގުޅިގެން ޚާރިޖީ ވުޒާރާއިން ނެރުނު ބަޔާނުގައި ބުނެފައިވަނީ، އިސްލާމާބާދުގައި ހުންނަ ދިވެހިރާއްޖޭގެ ހައި ކޮމިޝަނަރާއި އަފްޣާނިސްތާނުގެ މަންދޫބަކާ ދެމެދު ބޭއްވުނު ބައްދަލުވުމަކީ ދިވެހި ސަރުކާރުގެ ހުއްދަ ލިބިގެން ބޭއްވުނު ބައްދަލުވުމެއް ނޫން ކަމަށެވެ. އަދި މިކަމާ ގުޅިގެން ސަރުކާރުން އަޅަންޖެހޭ އެކަށީގެންވާ ފިޔަވަޅުތައް އަޅާފައިވާ ކަމަށްވެސް ބަޔާނުގައި ބުނެފައިވެއެވެ.

މީގެއިތުރުން، ރާއްޖޭން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި، އދ.ގެ ޖެނެރަލް އެސެމްބްލީން ޢަމަލުކުރާ އުސޫލުތަކަށް ދިވެހި ސަރުކާރުން ތަބާވާ ކަމަށް ބަޔާނުގައި ފާހަގަކޮށްފައިވެއެވެ.

މި އުސޫލާ އެއްގޮތްވާ ގޮތުގެ މަތިން، އދ.ގައި އަފްޣާނިސްތާނު ތަމްސީލުކުރާ ސަރުކާރަކީ އަފްޣާނިސްތާނުގެ ޝަރުޢީ ސަރުކާރު ކަމުގައި ދިވެހިރާއްޖެއިން ބަލާ ކަމަށްވެސް ބަޔާނުގައި ބުނެފައިވެއެވެ.

މި ކަމާއި ގުޅިގެން ސަރުކާރުން އެޅި ފިޔަވަޅުތަކުގެ ތަފްސީލު ހާމަކޮށްފައި ނުވެއެވެ.