އައްޑޫގައި ވެލި ފުންޏަކަށް ސައިކަލެއް އަރައި، އަނިޔާވި މީހަކު މާލެ ގެންނަނީ
އައްޑޫ ސިޓީ ހިތަދޫގައި ރޭ ހިނގި ސައިކަލް އެކްސިޑެންޓެއްގައި އަނިޔާވި 23 އަހަރުގެ ފިރިހެނަކު އިތުރު ފަރުވާއަށް މާލެ ގެނައުމުގެ މަސައްކަތް ކުރަމުންދާ ކަމަށް ފުލުހުން މަޢުލޫމާތު ދީފިއެވެ.
ފުލުހުން ބުނާ ގޮތުގައި މި ހާދިސާ ހިނގާފައިވަނީ ރޭ 11:39 ގައި ހިތަދޫގެ ފެން ހިންދާ ނިޒާމް ގާއިމްކުރުމަށް މަގު ކޮނެފައިވާ ހިސާބުގައި ހުރި ވެލި ފުންޏަކަށް ސައިކަލެއް އަރައިގެންނެވެ. ސައިކަލް ދުއްވަމުން ދިޔައީ ބާރު ސްޕީޑެއްގައި ކަމަށާއި، ކޮންޓްރޯލް ގެއްލިގެން ވެލި ފުންޏަށް އަރާފައިވާ ކަމަށް ފުލުހުން ބުނެފައިވެއެވެ.
މި ހާދިސާގައި އަނިޔާވި 23 އަހަރުގެ ދިވެހި ފިރިހެނާއަށް މިހާރު ފަރުވާ ދެމުން ގެންދަނީ އައްޑޫ އިކުއަޓޯރިއަލް ހޮސްޕިޓަލުގައެވެ. އަދި އިތުރު ފަރުވާއަށް އޭނާ މާލެ ގެނައުމަށް ހަމަޖެހިފައިވާ ކަމަށް ހޮސްޕިޓަލުން ފުލުހުންނަށް މަޢުލޫމާތު ދީފައިވާ ކަމަށް ފުލުހުންގެ މީޑިއާ ގްރޫޕުން ހާމަކޮށްފައިވެއެވެ.
ފުލުހުން އިތުރަށް ބުނެފައިވަނީ މި ހާދިސާއާ ގުޅިގެން ބަލަންޖެހޭ ކަންކަން އެ މުއައްސަސާއިން ބަލަމުން އަންނަ ކަމަށެވެ. މި ހާދިސާއާ ގުޅޭ އިތުރު ތަފްސީލެއް މިވަގުތު ލިބިފައެއް ނުވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
