ދިވެހިން ރޮއްވާލި ”ރޮއްވާފަ ލޯތައް“ ލަވައަށް އެއް މިލިއަން ވިއުސް

އިސްލާމިކް ރިދަމްގެ ފަރާތުން ނެރުނު އަސަރުގަދަ ލަވަ "ރޮއްވާފަ ލޯތައް" އަށް އެއް މިލިއަނަށްވުރެ ގިނަ ވިއުސް ލިބިއްޖެއެވެ.

2024 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ރިލީޒްކުރި މި ލަވައަށް މިހާތަނަށް 1,014,337 ވިއުސް ލިބިފައިވާއިރު، 2,500 އަށްވުރެ ގިނަ ލައިކްސް ވެސް ވަނީ ލިބިފައެވެ.

އެހީ ޖަމިއްޔާގެ އެހީތެރިކަމާއެކު އާންމުކުރި މި ލަވައިގެ އޯޑިއޯ ރިކޯޑިންގ ހަދާފައިވަނީ ހުސައިން ތައުފީޤެވެ. އަދި މި މަދަހައިގެ ފުރިހަމަ ވީޑިއޯ ތައްޔާރުކޮށްފައިވަނީ އޯކޭޒް އިންކްގެ ފަރާތުންނެވެ.

މޫސާ ޝިފާއުގެ އަސަރުގަދަ އަޑުން ކިޔާފައިވާ މި މަދަހައަކީ އިސްލާމިކް ރިދަމްގެ ފައުންޑަރު އަޙްމަދު ރިފާޢުގެ މަންމަ، އާބިދާ އަބްދުالله އަށް ޚާއްސަކޮށްފައިވާ މަދަހައެކެވެ. ރިފާޢުގެ މަންމަ ނިޔާވެފައިވަނީ އެ އަހަރުގެ ސެޕްޓެމްބަރު މަހުގެ ފަހުކޮޅުގައެވެ.

މި ލަވައިގެ ޅެމުން ކިޔައިދެނީ މަންމަ ވަކިވުމުން ދަރިންނަށާއި މުޅި އާއިލާއަށް ލިބިގެންދާ ފުން ހުސްކަމާއި ފަޅުކަމުގެ ވާހަކައެވެ. މަންމަ ވަކިވެދިޔަ ނަމަވެސް، މަންމަ ހުންނަ ކަމުގެ އިހްސާސް ކުރެވޭ ހިނދު، އެ މަންމަ ހަގީގަތުގައި ދުނިޔޭގައި ނެތްކަން ގަބޫލުކޮށް އެ ހަގީގަތާ ކުރިމަތިލާންޖެހޭ ވަގުތު ދަރިންނަށް ކުރެވޭ ފުން ހިތާމަ ޅެމުގައި ވަރަށް ރީތިކޮށް ސިފަކޮށްދީފައިވެއެވެ.

މީގެ އިތުރުން، މަންމަގެ ފަހު ވަގުތުތަކާއި، ބަލިހާލުގައި އެ މަންމަ ދެއްކި ކެތްތެރިކަމުގެ ނަމޫނާވެސް ޅެމުގައި ވަނީ ގެނެސްދީފައެވެ. މަންމަ ވަކިވުމުގެ ޚަބަރާއެކު ލިބުނު ވޭނާއި، ކަފުންކޮށް ވަޅުލީ ވަގުތު އާއިލާއިން ތަހައްމަލުކުރި ހިތްދަތިކަން ގެނެސްދީފައިވަނީ އަޑުއަހާލާ ކޮންމެ މީހަކުވެސް ހަގީގަތުގައި ރޮއްވާލާފަދަ އަސަރުގަދަ ގޮތަކަށެވެ.

ލަވައަށް އިތުރު ފުރިހަމަކަމެއް ގެނެސްދީފައިވަނީ މޫސާ ޝިފާއުގެ އަސަރުގަދަ ކިޔުމާއި ވީޑިއޯއިން ފެންނަ މަންޒަރުތަކެވެ.

ފާހަގަކޮށްލެވޭ ގޮތުގައި، ރިފާޢު ވަނީ މީގެ ކުރިންވެސް މަންމައާ ގުޅޭ މަގުބޫލު ގިނަ ޅެންތަކެއް ހަދާފައެވެ. އޭގެ ތެރޭގައި އަލީ ރަމީޒު ކިޔާފައިވާ "ނުވަމަސް ދުވަހުގެ ގަދަ ވޭނުގައި"، މޫސާ ޝިފާއުގެ "މަގޭ ލޯބި މަންމާ، މަށަށް މާފުދީ" އަދި ޝަލަބީގެ "މަންމާ ތިއީ އަސްލީ ހިތް މަގޭ" ހިމެނެއެވެ.