ވަކި ވޯޓެއްގައި ބައިބެރިވާން ބޭނުން ނުވާ ނަމަ އެ ކަރުދާސް ނުދޭނެ، އެކަން އިއުލާންވެސް ކުރާނެ

މިއަދު ތިން އިންތިޚާބެއްގެ ވޯޓުލުން ކުރިއަށްދާއިރު، އެތަނުން ވަކި އިންތިޚާބެއްގައި ވޯޓުލާން ބޭނުން ނޫން މީހުންނަށް އެ އިންތިޚާބެއްގެ ކަރުދާސްކޮޅު ނުދޭނެ ކަމަށާ، އަދި އެކަން އިއުލާންވެސް ކުރެވޭނެ ކަމަށް އިލެކްޝަންސް ކޮމިޝަނުން ރޭ ބުނެފިއެވެ.

ލޯކަލް ކައުންސިލް އިމްތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން، ރިޔާސީ އިންތިޚާބާއި މަޖިލިސް އިންތިޚާބު އެއްދުވަހަކު ބޭއްވުމާމެދު ރައްޔިތުންނަށް ފެންނަ ގޮތެއް ބެލުމަށް ނަގާ ފެންނަ ނުފެންނަ ވޯޓު ހިމެނޭހެން މިއަދު ތިން އިންތިޚާބެއްގެ ވޯޓުލުން ކުރިއަށްދާނެއެވެ. ވޯޓުލުން ފެށޭނީ 8:00 ގައެވެ. ވޯޓު ކިޔު ބަންދުކުރާނީ 4:00 ގައެވެ.

އެ އިންތިޚާބުތަކާ ބެހޭގޮތުން މަޢުލޫމާތު ދިނުމަށް އީސީއާއި ފުލުހުން ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އީސީގެ ރައީސް އެ ކޮމިޝަނުގެ ރައީސް މުޙައްމަދު ޒާހިދު ވިދާޅުވީ، ވޯޓުލާން ދާ ކޮންމެ މީހަކަށް ތިން ކަރުދާސްކޮޅު ދޭނެ ކަމަށެވެ.

ނަމަވެސް ވޯޓުލާންދާ މީހާ ވަކި އިންތިހާބެއްގައި ބައިވެރިވާން ބޭނުން ނުވާ ނަމަ އެ ކަރުދާސް ނުދޭނެ ކަމަށާ، އެމީހަކަށް ދޭނީ ވޯޓުލާ އިނތިޚާބުގެ ކަރުދާސް އެކަނި ކަމަށް ކަމަށް ޒާހިދު ވިދާޅުވިއެވެ. އަދި އެމީހާ އެ ވޯޓެއްގައި ބައިވެރި ނުވާކަން އިއުލާންވެސް ކުރާނެ ކަމަށް ވިދާޅުވިއެވެ.

"ތިން ކަރުދާސްކޮޅު އަޅުގަނޑުމެން އޭނާއަށް ދޭނެ. ދެން އެއްވެސް މީހަކު ވަކި ލާން ބޭނުން ނޫން ކަމަށްވަންޏާ އެ ކަރުދާސްކޮޅެއް ނުދޭނެ. ނުދީ އަޅުގަނޑުމެން އިއުލާންކުރާނެ އިނގޭތޯ. އަޅުގަނޑމެން އިއުލާންކުރާނެ މިވެނި މީހަކު އެ ކަރުދާސްކޮޅު ބޭނުންނޫން ކަމަށް. މި ހާމަކޮށްފައި އިއުލާންކުރާނެ. ސޯ އޮބްޒާވަރުންނާއި ހުރިހާ އެންމެނަށް އޭތި ނޯޓު ކުރެވި ފަހުން އޭތި ކެރީކުރުމުގައި އިންތިޒާމުތައް ހަމަޖެހިގެންދާނެ،"

އީސީގެ ރައީސް ޒާހިދު

ޒާހިދު ވިދާޅުވީ، އެންމެ ފަހުން ބޭއްވި ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައިވެސް ކަންކުރީ އެފަދައިން ކަމަށާ، މި އިންތިޚާބުގައިވެސް އެފަދައިން ޢަމަލުކުރުމަށްފަހު، ހާދިސާ ރިޕޯޓުގައި ވެސް އެކަން ލިޔާނެ ކަމަށެވެ. އެހެންކަމުން، އޮބްޒާވަރުންނާއި ހުރިހާ އެންމެނަށް ވެސް އެ ކަރުދާސްކޮޅެއް ބޭނުންނުކުރާކަން އެނގޭނެ ކަން އޭނާ ފާހަގަކުރެއްވިއެވެ.