ނާދެވުނު އުމްރާވެރިން ހޮނިހިރު ދުވަހު ރާއްޖެ ގެންނަނީ!
ލިޔުންތެރިޔާ
އަބްދުﷲ ހުސައިން
މިފަހަރު އުމުރާއަށްގޮސް އުޅެނިކޮށް މައްކާގައި ތާށިވި އުމްރާވެރިން، އަންނަ ހޮނިހިރުދުވަހު ރާއްޖެ ގެނައުމަށް ހަމަޖެހިފައިވާކަމަށް އިސްލާމިކް މިނިސްޓްރީން ބުނެފިއެވެ.
އުމްރާއަށްގޮސް އުޅެނިކޮށް ރާއްޖެ ނާދެވުނު އުމްރާވެރިންނަކީ އަލް ހިޖުރަ ޖަމާއަތުގެ ހަވާލުގައި މިފަހަރު އުމްރާކުރަންދިޔަ މީހުންނެވެ. އެކަން އިސްލާމިކް މިނިސްޓްރީގެ ސަމާލުކަމަށް އައުމުން މިނިސްޓްރީން ވަނީ އެކަން ހިނގާދިޔަގޮތް ބަލައި، ރާއްޖެ ނާދަވުނު ދިވެހިން ގެނައުމުގެ މަސައްކަތް ހައްޖު ކޯޕަރޭޝަނާ ހަވާލުކޮށްފައެވެ. އަދި ހައްޖު ކޯޕަރޭޝަނުން ވަނީ އެމީހުންގެ ކަންތަކާ ހަވާލުވެ، ރާއްޖެ ގެނައުމުގެ އިންތިޒާމުތައް ހަމަޖައްސާފައެވެ.
މިކަމާ ގުޅޭގޮތުން އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު އެކްސްގައި ވިދާޅުވީ، ހިޖުރަ ކުންފުނީގެ ޙަވާލުގައި ދިޔަ އުމްރާވެރިން މިހާރުވަނީ، މިނިސްޓްރީގެ އިރުޝާދުގެ ދަށުން ޙައްޖު ކޯޕަރޭޝަންގެ އުމްރާވެރިން ތިބި ހޮޓަލަށް ބަދަލުކޮށްފައި ކަމަށެވެ. އެގޮތުން އަންނަ ހޮނިހިރުދުވަހު ހެނދުނު 8.10 ގައި ޤަތަރު އެެއަަވޭސް އިން އެމީހުން މާލެ އަންނާނޭކަމަށް މިނިސްޓަރު ވިދާޅުވިއެވެ.
އުމްރާއަށް ގެންދިޔަ މީހުނަށް އިހުމާލުވުމުން، އިސްލާމިކް މިނިސްޓްރީން ވަނީ އަލް ހިޖުރަ އުމްރާ ގްރޫއްޕު 100،000 ރުފިޔާއިން ޖޫރިމަނާކޮށް، އުމްރާއަށް މީހުން ގެންދިއުމުގެ ހުއްދަ ހިފެހެއްޓިކަން މިއަދު އިއުލާންކޮށްފައެވެ.
އަލް ހިޖުރަ ގްރޫޕަށް އެޅި ފިޔަވަޅުތަކުގެ ތެރޭގައި، އެކުންފުނި ޖޫރިމަނާކުރުމާއި ހުއްދަ އަތުލުމުގެ އިތުރުން، ސަރުކާރުން ކުރަންޖެހުނު ހަރަދުތައް އަނބުރާ ދައްކަންޖެހުން ހިމެނެއެވެ. މީގެ އިތުރުން އަލް ހިޖުރަ ކުންފުނީގެ އެއްވެސް ހިއްސާދާރަކަށް މީހުން އުމްރާއަށް ގެންދިއުމުގެ ހުއްދަ ނުދިނުން ހިމެނެއެވެ.
މިފަހަރު ރާއްޖެއިން އުމްރާއަށްދިޔަ މީހުންގެ ތެރެއިން, އަލްހިޖްރަ ކުންފުނީގެ ހަވާލުގައި ދިޔަމީހުން މައްކާއިން ނުފުރުނީ، ރިޓާން ޓިކެޓް ނުލިބުމުންނެވެ.. އެމީހުން ރާއްޖެ އަންނަގޮތަށް އޮތީ މިމަހު 5 ވަނަ ދުވަހުއެވެ. މައްކާގައި އުމްރާވެރިން ތާށިވި މައްސަލާގައި މިނިސްޓަރު ޝަހީމްރޭ ވިދާޅުވެފައިވަނީ، އެމީހުން އުމްރާއަށްގެންދިޔަ ކުންފުނިން އެކަމުގެ ޒިންމާނަގަން ޖެހޭއިރު، އުމްރާގެ އަޅުކަން އަދާކުރުމަށް ދޭ ފައިސާ އެހެންކަންކަމަށް ބޭނުންކޮށް އުމްރާވެރިން ހާލުގައިޖެހެން ޖެހޭގޮތް މެދުވެރިވުމަކީ ވަރަށްބޮޑު މައްސަލައެއްކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
