ވަޒީރުންނަށް ރުހުން ނުދޭން ދައްކާ ހުއްޖަތްތަކުގައި އެއްވެސް އަސާސެއް ނެތް: ނައިބު ރައީސް
ބައެއް ޕާޓީ ތަކުން ވަޒީރުންނަށް ރުހުން ނުދޭން ދައްކާ ހުއްޖަތްތަކުގައި އެއްވެސް އަސާސެއް ނެތްކަމަށް ނައިބު ރައީސް އަލްއުސްތާޒް ހުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވީ ދަ ޑިމޮކްރެޓްސް ގެ ޕާލަމެންޓްރީ ގްރޫޕުން ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ މި ސަރުކާރުގެ ކެބިނެޓްގެ ބައެއް ވަޒީރުންނަށް ރުހުން ނުދިނުމަށް ނިންމާފައިވާ ދަނޑިވަޅެއްގައި އެކްސް ގައި ކުރެއްވި ޕޯސްޓެއްގައެވެ.
ގައުމުގެ ނައިބު ރައީސް ކަމާއި ހަވާލުވެ ވަޑައިގަންނަވަންދެން ވެސް ރައްޔިތުންގެ މަޖިލީހުގެ މެމްބަރުކަން ކުރެއްވި ނައިބު ރައީސް ހުސައިން މުޙައްމަދު ލަތީފް ވަނީ ޑިމޮކްރެސީގެ އެންމެ ރިވެތި ހަމައަކީ ރައީސުލްޖުމްހޫރިއްޔާ އިޚްތިޔާރުކުރައްވާ ވަޒީރުންނަށް ރައްޔިތުންގެ މަޖިލީހުން ރުހުން ދެއްވުން ކަމަށް ވެސް ވިދާޅުވެފައެވެ.
"ޑިމޮކްރެސީގެ އެންމެ ރިވެތި ހަމައަކީ ރައީސުލްޖުމްހޫރިއްޔާ އިޚްތިޔާރުކުރައްވާ ވަޒީރުންނަށް ރައްޔިތުންގެ މަޖިލީހުން ރުހުން ދެއްވުން. މިކަމާ ދެކޮޅަށް ބައެއް ޕާޓީތަކުން ދައްކަވާ ހުއްޖަތްތަކަކީ އެއްވެސް އަސާސެއް ނެތް ކަމެއް ކަމަށް ގަބޫލުކުރަން."
ނައިބު ރައީސް ވިދާޅުވިއެވެ.
ނައިބު ރައީސް މިފަދައިން ވިދާޅުވެފައިވާއިރު ވަޒީރުންނަށް ރުހުން ނުދިނުމަށް ނިންމާފައިވަނީ ޑިމޮކްރެޓްސް ގެ ޕީޖީ ބައްދަލުވުމުގައި ބައިވެރިވި މެމްބަރުންގެ އިއްތިފާގުންކަމަށް އެޕާޓީން ވަނީ ބުނެފައެވެ.
މިއަދު ބޭއްވި ރައްޔިތުންގެ މަޖިލީހުގެ ދައުރުން ބޭއްވުނު ޖަލްސާގައި ވެސް ވަޒީރުންނަށް ރުހުން ނުދޭން ގޮވާލާ ފަދަ މޭރުމަކުން އިދިކޮޅު އެމްޑީޕީ އާއި ދަ ޑިމޮކްރެޓްސް ގެ ބައެއް މެމްބަރުން ވަނީ ވާހަކަފުޅު ދައްކަވާފައެވެ. މިކަމާއި ގުޅިގެން މަޖިލީހުގެ ތަޅުން ވަރަށް ބޮޑަށް ހޫނު ވެގެން ދިޔަ ކަން ވެސް ފާހަގަކޮށްލަންޖެހެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
