އިސްރާއީލް ޕާސްޕޯޓު މައްސަލައިގައި ފަލަސްތީނާއި އަރަބި ގައުމުތަކުގެ ލަފާހޯދަން ޖެހޭ: ފަލާހް

ރާއްޖެއިން އިސްރާއީލު ޕާސްޕޯޓް މަނާކުރުމާއި ބެހޭ މައްސަލައިގައި ފަލަސްތީނާއި އަރަބި އެހެން ގައުމުތަކާއި ދުނިޔޭގެ ބޮޑެތި ގައުމުތަކުގެ ލަފާ ހޯދަން ޖެހޭކަމަށް ރައްޔިތުންގެ މަޖިލީހުގެ އިބގުރައިދޫ ދާއިރާގެ މެމްބަރު އަދި ޕީއެންސީ ޕީޖީ ގްރޫޕްގެ ލީޑަރު އިބްރާހިމް ފަލާހް ވިދާޅުވެއްޖެއެވެ.

ފަލާހް މިފަދައިން ވިދާޅުވީ، އިޒްރޭލްގެ ޕާސްޕޯޓްގައި ރާއްޖެއަށް އެތެރެވުން މަނާކުރުމަށް ރާއްޖޭގެ އިމިގްރޭޝަންގެ ގާނޫނަށް ހުށަހެޅި އިސްލާހުގެ ބިލްގެ ދިރާސާކުރާ ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ، 241 ކޮމިޓީގެ ބައްދަލުވުމުގައި ވާހަަކަފުޅު ދައްކަވަމުންނެވެ.

މިގޮތުން ފަލާހް ވިދާޅުވީ، ޕާސްޕޯޓް މަނާކުރުމުން ފަލަސްތީނަށް އޮތް ފައިދާއެއް ބަލަންޖެހޭ ކަމަށާއި، އިސްރާއީލުގައިވެސް މުސްލިމުން އުޅޭކަމަށާއި، އިސްރާއީލް ޕާސްޕޯޓް މަނާކުރާއިރު އަރަބި ގައުމުތަކުގެ ލަފާވެސް ހޯދަން ޖެހޭ ކަމަށެވެ.

"ފަލަސްތީނުގެ އިތުރުން، މި މައްސަލައިގައި އަރަބި އެހެން ގައުމުތަކާއި ދުނިޔޭގެ ބޮޑެތި އެހެން ގައުމުތަކުގެ ކަމާ ގުޅުން ހުރި އިދާރާތަކުގެ ލަފާ ވެސް ހޯދަން ޖެހޭ. އެއީ އިސްރާއީލްގައި ވެސް އެތައް ސަތޭކަ މުސްލިމުން ވެސް އެބަ އުޅޭ. އިސްރާއީލް ޕާސްޕޯޓު މަނާ ކުރާއިރު މިއީ އަވަސް އަރުވާލައިގެން ނިންމޭ ކަހަލަ މައްސަލައެއް ނޫން. އެހެންވީމާ ވަރަށް ފުޅާ ދާއިރާއެއްގައި މި މައްސަލަ ދިރާސާކޮށްފައި ނޫނީ ގޮތެއް ނިންމައިގެން ނުވާނެ."

ފަލާހް ވިދާޅުވިއެވެ.

އިސްރާއީލް ޕާސްޕޯޓުގައި ރާއްޖެއަށް އެތެރެވުން މަނާކުރުމަކީ ވަރަށް މުހިންމު އިސްލާހެއް ކަމަށާއި، ފަލަސްތީނުގެ ރައްޔިތުންނާ މެދު އިސްރާއީލުން ހިންގަމުންގެންދަނީ އަނިޔާވެރި އަމަލުތަކެއްކަން ފާހަގަކުރައްވަމުން ފަލާހް ވިދާޅުވީ، އިސްރާއީލް ޕާސްޕޯޓް މަނާކުރުމަށް ނިމިދިޔަ އެމްޑީޕީ މެޖޯރިޓީ މަޖިލީހުގައި ވެސް ހުށަހެޅި ނަމަވެސް ސަރުކާރު ނިމިގެން ދިޔައިރު އެކަމުގައި ގޮތެއް ނުނިންމުނީ އެއީ ކޮންމެވެސް ސަބަބެއް އޮތުމުން ކަމަށެވެ.

ހަމައެއާއިއެކު، މިއީ ސިޔާސީ ގޮތުން ގައުމަށް ގެއްލުން ހުރި ކަމަކަށް ވެގެން ނުވާނެ ކަމަށާއި، މި މައްސަލައާއިމެދު ފުޅާ ދާއިރާގައި މަޝްވަރާ ކުރަން ޖެހޭ ކަމަށް ވެސް ފަލާހް ވަނީ މިއަދުގެ ބައްދަލުވުމުގައި ވިދާޅުވެފައެވެ.