ޑެޕިއުޓީ މިނިސްޓަރު ޖަލީލު، ދޮގު ލިޔެކިޔުން ތަކެއް ތައްޔާރުކުރި ކަމަށް ތުހުމަތުވާ މައްސަލަ ފުލުހުން ބަލަން ފަށައިފި

މިހާރުގެ އިސްލާމިކް މިނިސްޓްރީގެ ނާއިބު، ސަލްމާން މިސްކިތުގެ އިމާމް ޢަބްދުލް ޖަލީލު އިސްމާއީލުގެ މައްޗަށް ކުރެވޭ ސީރިއަސް ތުހުމަތުތަކާ ގުޅިގެން މޯލްޑިވްސް ޕޮލިސް ސަރވިސްއިން ތަޙުޤީޤު ފަށައިފިއެވެ.

މި މައްސަލައިގައި ޖަލީލަށް ކުރެވޭ މައިގަނޑު ތުހުމަތަކީ ދޮގު ލިޔެކިޔުންތަކެއް ތައްޔާރުކޮށް، ނިޔާވެފައިވާ ވިޔަފާރިވެރިއެއް ކަމަށްވާ، ހއ. ހޯރަފުށީ ހާޝިމް މުހައްމަދުގެ މުދަލަށް އަތްގަދަކޮށްފައިވާ ކަމަށެވެ.

ފުލުހުންގެ މަޢުލޫމާތު ދޭގޮތުގައި މި މައްސަލައާ ގުޅޭ ފޯޖަރީގެ ރިޕޯޓެއް 19 ސެޕްޓެމްބަރު 2023 ގައި ވަނީ ހުށަހެޅިފައެވެ.

މީގެ އިތުރުން، 23 ސެޕްޓެމްބަރު 2023 ގައި ފިހާރައެއްގެ ތެރޭގައި ދެ ފަރާތެއްގެ މެދުގައި (ޖަލީލު އާއި ހާޝިމްގެ ވާރުތަވެރިންގެ މެދުގައި) ހިނގި ހަމަނުޖެހުމެއްގެ މައްސަލައެއްވެސް ވަނީ ރިޕޯޓުކުރެވިފައެވެ.

މި ދެ މައްސަލައިގައިވެސް ފުލުހުން ދަނީ ތަޙުޤީޤު ކުރަމުންނެވެ.

ޖަލީލުގެ މައްޗަށް ކުރެވޭ ތުހުމަތުތަކުގެ ތެރޭގައި، މީގެ ދެ އަހަރެއްހާ ދުވަސް ކުރިން ޝައްކުކުރެވޭ ގޮތަކަށް ނިޔާވެފައި އޮއްވާ ފެނުނު ވިޔަފާރިވެރިޔާ ހއ. ހޯރަފުށީ ހާޝިމް މުހައްމަދުގެ ވިޔަފާރިތަކަށް އަތްގަދަކުރުން ހިމެނެއެވެ. އެ ވިޔަފާރިތައް ޖަލީލުގެ ނަމުގައި ރަޖިސްޓްރީކޮށްފައިވާ ކުންފުންޏަކަށް ބަދަލުކޮށްފައިވާ ކަމަށާއި، މިކަމަށްޓަކައި ހާޝިމްގެ ދަރިފުޅުގެ ސޮއި ފޯޖުކޮށް ލިޔެކިޔުން ތައްޔާރުކޮށްފައިވާ ކަމަށްވެސް ތުހުމަތުކުރެވެއެވެ.

ހާޝިމް މުހައްމަދަކީ 2022 ވަނަ އަހަރުގެ ޖެނުއަރީ މަހު ގެއެއްގެ ތެރޭގައި މަރުވެފައިވާ އޮއްވާ ފެނުނު މަޝްހޫރު ވިޔަފާރިވެރިއެކެވެ. އޭނާއަކީ "ފޯއެލް" ގެ ނަމުގައި ގިނަ ވިޔަފާރިތަކެއް މާލެ ސަރަޙައްދުގައި ހިންގަމުން ދިޔަ ފަރާތެކެވެ.

ހާޝިމްގެ އާއިލާއިން ”ވޮއިސް“އަށް މަޢުލޫމާތު ދީފައިވާ ގޮތުން، ޖަލީލް ވަނީ ހާޝިމްގެ ހުރިހާ މުދަލެއް އަތުލާފައެވެ. މި ޖަރީމާ ހިންގާފައިވަނީ ހަދީއުލް އިސްލާމް ނަމަކަށް ކިޔާ ބަންގްލަދޭޝް މީހަކާ ގުޅިގެން ކަމަށްވެސް ހާޝިމްގެ އާއިލާއިން ބުނެފައިވެއެވެ.

ފުލުހުން މަޢުލޫމާތު ދޭގޮތުގައި މުދަލާއި ގޯތިގެދޮރުގެ މައްސަލަ ސިވިލް ކޯޓު މެދުވެރިކޮށް ކުރިއަށް ގެންދިއުމަށް ދެ ފަރާތަށްވެސް ވަނީ އިރުޝާދު ދެވިފައެވެ. މި މައްސަލައިގައި ތަޙުޤީޤު ކުރިއަށްދާ ގޮތުގެ އިތުރު މަޢުލޫމާތު ފުލުހުން ހާމަކުރާނެ ކަމަށް ބުނެފައިވެއެވެ.