ގާމަގު ކެފޭގައި ހިނގި އަލިފާނުގެ ހާދިސާ: 37 މީހުން ހާލުގައި ޖެހިފައިވޭ

ސޯސަންމަގުކޮޅުގައި ހުންނަ ހެންވޭރު ދޫހިމެރިގޭ ތިރީބައިގަ ހުންނަ ހޮޓަލުގައި މިއަދު ހިނގި އަލިފާނުގެ ހާދިސާގައި އެ އިމާރާތް ބޭނުން ނުކުރެވޭވަރަށް އަނދައި ބޮޑެތި ގެއްލުންތަކެއް ލިބިފައިވާއިރު، އެ ހާދިސާގައި ޖުމްލަ 37 މީހުން ހާލުގައިޖެހިއެއްޖެއެވެ.

ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެން ޑީއެމް އޭ) އިން މައުލޫމަތު ދެއްވި ގޮތުގައ ހާލުގައި ޖެހުނު މީހުންގެ ތެރޭގައި 22 ދިވެހިންނާއި 15 ބިދޭސީން ހިމެނޭކަމަށެވެ.

މޯލްޑިވްސް ނެޝަނަލް ޑިފެންސްފޯސް (އެމްއެންޑީއެފް) އިން ބުނީ މި ހާދިސާގެ މައުލޫމާތު އެފަރާތަށް ލިބިފައިވަނީ 14:47 ހާއިރުކަމަށެވެ. އަލިފާނުގެ ހާދިސާ ހިނގިކަމުގެ ރިޕޯޓް ލިބުމާއެކު، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން އެސަރަހައްދަށްގޮސް އަލިފާންގަނޑު ނިއްވުމުގެ މަސައްކަތް ފެށިކަމަށް އެމްއެންޑީއެފުން ބުނެއެވެ.

މި ހާދިސާހިނގި ސަރަޙައްދުގައި ހަރަކާތްތެރިވި ވޮއިސްގެ ރިޕޯޓަރު ބުނެފައިވަނީ ކެފޭގައި އަލިފާންގަނޑު ރޯވިތާ މާ ގިނައިރުތަކެއް ނުވެ މުޅި އިމާރާތުގައި އަލިފާން ހިފިކަމަށެވެ. އަލިފާންގަނޑު ރޯވެ ބޮޑަށް ހުޅުގަނޑު ފަޅައިގެން ގޮސްފައިވަނީ ގޭސްފުޅީގައި ރޯވި ހިސާބުންކަމަށްވެސް ރިޕޯޓަރު ބުންޏެވެ.

ހާދިސާ ހިނގުމާއެކު ކުޑަ ވަގުތުކޮޅެއްގެ ތެރޭގައި ރޯވެފައިވާ އިމާރާތާ ޖެހިގެންހުރި ގޭތަކުން ވަނީ މީހުން ހުސްކޮށްފައެވެ.

އަލިފާންގަނޑު ކޮންޓްރޯލްވިއިރު، ކެފޭހުރި އިމާރާތުގެ އިތުރުން ޖެހިގެންހުރި އިމާރާތުގައިވެސް އަލިފާން ހިފިއެވެ. މިހާދިސާގައި ކެފޭގައި ހުރި ހުރިހާ އެއްޗެއް އަނދާފައިވާއިރު، މުޅި އެ އިމާރާތްވަނީ އަލުން ބޭނުން ނުކުރެވޭވަރަށް އަނދާފައެވެ.

މިއަދު މެންދުރު 14:47ހާއިރު ހިނގި އެ އަލިފާނުގެ ހާދިސާއާ ގުޅިގެން ދެ އަންހެނަކު އޭޑީކޭ ހޮސްޕިޓަލަށް ގެންދިޔައެވެ. އޭގެ ތެރޭގައި ހިމެނުނީ 30 އަހަރުގެ ބޭރު އަންހެނަކާއި 48 އަހަރުގެ ދިވެހި އަންހެނެކެވެ. އޭގެ ތެރެއިން ބޭރު މީހާ ދޫކޮށްލާފައިވާއިރު، ދިވެހި މީހާގެ ހާލު ރަނގަޅު ކަމަށް އޭޑީކޭ ހޮސްޕިޓަލާ ހަވާލާދީ އެމްއެންޑީއެފުން ބުނެފައިވެއެވެ.