ޒުވާނުން މުޒާހަރާކުރީ ސުލްޙަވެރިކަމާއެކު ގާނޫނީ އިމުގެތެރޭގައި؛ ހައްޔަރުކުރި މީހުން ދޫކޮށްލާ: އެމްޑީޕީ

މާލޭ ހެންވޭރުގައި ހުރި ގުދަނެއްގެ މައްޗަށް އަންހެނަކު ވެއްޓުނު ހާދިސާއާއި ގުޅިގެން، އެ އަންހެން މީހާއަށް އިންސާފު ހޯދައިދިނުމަށް ކަމަށް ބުނެ، ސިލްސިލާކޮށް ޒުވާނުން ކުރަމުންދިޔަ މުޒާހަރާ، ފުލުހުން ރޫޅާލުން އިދިކޮޅު އެމްޑީޕީން ކުށްވެރިކޮށްފިއެވެ.

އެމްޑީޕީން ނެރުނު ނޫސްބަޔާނެއްގައި ބުނެފައިވަނީ، 18 އޭޕްރީލް 2024 ގައި ހިނގި ހިތާމަވެރި ހާދިސާއާ ގުޅިގެން ފުލުހުން ތަޙުޤީޤު ކުރިއަށް ގެންދިޔަ ގޮތާމެދު ހިތްހަމަނުޖެހިގެން އިންސާފަށް ގޮވާލުމަށާއި ފުލުހުން ޖަވާބުދާރީ ކުރުވުމަށް މުޒާހަރާތަކެއް ކުރަމުންދާއިރު، ފާއިތުވި ހަފުތާގައި ސަތޭކަ އަކަށް ޒުވާނުން ބައިވެރިވެގެން ކުރި މުޒާހަރާތައް ކުރީ މުޅިން ސުލްޙަވެރިކަމާއެކު، ގާނޫނީ އިމުގެ ތެރެއިން ކަމަށެވެ.

ނަމަވެސް، 1 މެއި 2024 ގައި ބޭއްވުނު އެންމެ ފަހުގެ މުޒާހަރާގައި، އެއްވެސް އުނދަގުލެއް ނެތި ފުލުހުންގެ ބެރިކޭޑްތަކުގެ ފަހަތުން އަޑުއުފުލަމުންދިޔަ މުޒާހަރާކުރާ ފަރާތްތަކާ ދެކޮޅަށް ފުލުހުން ވަނީ އެއްވެސް ސަބަބެއް ނެތި އަނިޔާވެރި ގޮތަކަށް ހަރުކަށިކޮށް ބާރުގެ ބޭނުންކޮށްފައި ކަމަށް އެމްޑީޕީން ތުހުމަތުކުރެއެވެ.

މިގޮތުން މުޒާހަރާކުރާ މީހުންގައިގައި ތަޅައި، ޕެޕަރ ސްޕްރޭ ޖަހައި، އެމީހުންގެ އާލާތްތައް އަތުލައި، އަދި މުޒާހަރާ އިންތިޒާމުކުރި ދެ މީހަކު ހައްޔަރުކޮށްފައިވާ ކަމަށް އެމްޑީޕީން ބުނެފައިވެއެވެ.

އަދި މި ހާދިސާގައި ގިނަ ބަޔަކަށް ބޮޑެތި އަނިޔާތައް ލިބި، އެއް ފަރާތެއް އައިޖީއެމްއެޗްގެ އިމަޖެންސީގައި ފަރުވާ ދެމުންދާ ކަމަށްވެސް ބުނެފައިވެއެވެ.

މިއާއެކު އެމްޑީޕީން ބުނެފައިވަނީ، ހައްޔަރުކުރެވުނު ފަރާތްތަކަށް ވަކީލުންނާ ބައްދަލުކުރުމުގެ ފުރުސަތު ނުދީ ޑިޓެންޝަން ފެސިލިޓީއަށް ގެންގޮސްފައިވާ ކަމަށާއި، އަދި ލިބިފައިވާ ބޮޑެތި އަނިޔާތަކަށް ބޭސްފަރުވާ ކުރުމުގެ ފުރުސަތުވެސް ދީފައިނުވާ ކަމަށެވެ.

މިއީ ހައްޔަރުކުރެވިފައިވާ ފަރާތްތަކުގެ އިންސާނީ ޙައްޤުތަކަށް ކުރެވޭ ބޮޑު އަނިޔާއެއް ކަމަށާއި، މިކަން ވަގުތުން ރަނގަޅުކުރަންޖެހޭ ކަމަށް އެމްޑީޕީން ބުނެފައިވެއެވެ.

މީގެ އިތުރުން، އެމްޑީޕީން ވަނީ ހައްޔަރުކުރެވުނު މީހުން އެއްވެސް ޝަރުތަކާއި ނުލައި ދޫކޮށްލުމަށް ގޮވާލާފައެވެ. އަދި ފުލުހުންނާއި ދާޚިލީ ވަޒީރު، ބާރުގެ ބޭނުން ނަހަމަ ގޮތުގައި ހިފި މައްސަލާގައި ޖަވާބުދާރީ ކުރުވުމަށްވެސް ވަނީ ގޮވާލާފައެވެ.