ހަނީމޫން ފަސްކޮށް މެސީ ބަލަން ދަނޑަށް ދިޔަ ދެމަފިރިންނަށް ލިބުނީ ލަނޑެއް!

ހަނީމޫން ފަސްކޮށް އާޖެންޓީނާގެ ފުޓްބޯޅަ ލެޖެންޑް، ލިއޮނެލް މެސީ ދެކިލުމަށް ކަލްކަތާގެ ސްޓޭޑިއަމަށް ދިޔަ ދެމަފިރިއަކަށް ހިތުން ނުފިލާވަރުގެ ލަނޑެއް ލިބިއްޖެއެވެ.

މިއަދަށް އިރުއަރައިގެން އާއިރު މުޅި މީޑިއާގެ އެންމެ ހިނގާ ހަބަރެއްގެ ގޮތުގައި ދައުރުވަމުން ދިޔައީ، އިންޑިއާގެ ކަލްކަތާގެ ސްޓޭޑިއަމަށް މެސީ ބަލާލުމަށް ވަތް މީހުންނަށް މެސީ ނުފެނުމުން ދަނޑުގައި ހިނގާދިޔަ ހަމަނުޖެހުމުގެ ވާހަކައެވެ. މެސީއަށް ސަޕޯޓްކުރާ އެތައް ހާސް ފޭނުންނެއް މިއަދު އުއްމީދުކުރީ އެމީހުންނަށް ހަމަލޮލުން މެސީ ފެންނާނެ ވަގުތަކަށެވެ.

ނަމަވެސް ދަނޑަށް މެސީ އައުމަށްފަހު 10 މިނެޓްވެސް ނުވަނީވެސް ސަލާމަތީ ސަބަބުތަކަށްޓަކައި މެސީ ވަނީ ސްޓޭޑިއަމް ދޫކޮށް ގޮސްފައެވެ. މެސީ ދަނޑުގައި ހޭދަކުރި ވަގުތުކޮޅުގެ ތެރޭގައިވެސް ގިނަ މީހުންނަކަށް އޭނާ ނުފެނެއެވެ. ސަބަބަކީ މެސީ ވަށައިގެން އޮފިޝަލުންނާއި ގިނަ އަދަދެއްގެ ސެކިއުރެޓީ އޮފިސަރުން ތިބުމެވެ. އަދި ފަހުން މެސީ ވަނީ އެނބުރި ގޮސްފައެވެ.

އެކަމާ ހިތްހަމަ ނުޖެހިގެން މެސީ ބަލާލުމަށް ދަނޑަށް ވަތް މީހުންގެ ތެރެއިން ބައެއް މީހުން ވަނީ ދަނޑުތެރެއަށް ފުޅިއާއި ގޮނޑިފަދަ ތަކެތި އުކާފައެވެ. އެންމެފަހުން ދަނޑުގައި ހަމަނުޖެހުންބޮޑުވެ، އެއްވެފައިތިބި މީހުން ހަމަޔަކަށް އަޅުވަންޖެހުނީ ސަލާމަތީ ބާރުތައް މެދުވެރިކޮށްވެ.

މެސީ ބަލާލުމަށް ދަނޑަށްވަތް ގިނަ މީހުން ވަނީ އެތައް ހާސްރުފިޔާއެއް ހޭދަކޮށްފައެވެ. މީގެ ތެރެއިން އެކަކު އޭއެންއައި ޓީވީއަށް ދިން އިންޓަވިއުއެއްގައި އޭނާ މެސީ ބަލާލުމަށް ސްޓޭޑިއަމަށް އައީ ހަނީމޫން ފަސްކޮށް އެތައް އިރަކު ކިއުގައި މަޑުކުރުމަށްފަހު ކަމަށެވެ.

" އަހަރެމެން ކައިވެނިކުރީ މިދިޔަ ހުކުރުދުވަހު. ހަނީމޫނުވެސް ފަސްކޮށް އަހަރުމެން ނިންމީ މެސީ ބަލާލުމަށް ސްޓޭޑިއަމަށް އަންނަން. އެއީ އެތައް ދުވަހަކަށްފަހު މެސީ އަހަރެމެންގެ އަވަށަށް އަންނާތީވެ. މިއީ ވަރަށް މަދުން ނޫނީ ނުލިބޭނެ ފުރުސަތެއް" އަންހެންމީހާ ބުންޏެވެ.

ގިނަ މީހުން ވަނީ މެސީ ބަލާލުމަށް ދަނޑަށް ވަނުމަށް ޓިކެޓަށް އެކަނިވެސް 4،000 ހާހަށްވުރެ ގިނަ ރުޕީސް ހޭދަކޮށްފައެވެ.

މެސީ ފެންނާނެކަމުގެ އުއްމީދުގައި ދަނޑަށް ވަތް މީހުންނަށް ގެއްލުނީ އެމީހުން ގަތް ޓިކެޓް ގަތުމަށްކުރި ހޭދަ އެކަންޏެއް ނޫނެވެ. ބައެއް މީހުން ދުރު ހިސާބުތަކުން ދަތުރުހަދައިގެން އައިސް ސްޓޭޑިއަމް ބޭރުގައި 4 ގަޑިއިރަށްވުރެ ގިނަ ވަގުތު ކިއުހަދައިގެންވެސް  ތިއްބެވެ.

ކަލްކަތާއަކީ މަސީއަށް ސަޕޯޓްކުރާ އެންމެ ގިނަ ފޭނުންތިބި އެއް ސިޓީއެވެ. ކަލްކަތާ ސްޓޭޑިއަމްގައި މިއަދު ހިނގާދިޔަ ހާދިސާ، އިންޑިއާގެ ކަމާބެހޭ ފަރާތްތަކުން ދަނީ ތަހްގީގް ކުރަމުންނެވެ. މިއަދު އެ ހާދިސާ ހިނގާފައިވަނީ އިވެންޓްގެ އިންތިޒާމުތައް ދޯހަޅިކަމުންކަމަށް ކަލްކަތާގެ މޭޔަރު ވަނީ  މަމަތާ ބަނެޖީ ވަނީ ވިދާޅުވެފައެވެ.