ރާއްޖޭގައި ފުރަތަމަ ފަހަރަށް މަޖިލީހުން ދަށުކޯޓުގެ ފަނޑިޔާރަކު ވަކިކޮށްފި

ގދ.ތިނަދޫ މެޖިސްޓްރޭޓް ކޯޓުގެ ފަނޑިޔާރު އިބްރާހިމް ރަޝީދު، މެޖިސްޓްރޭޓްކަމުން ވަކިކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

އިިބްރާހިމް މަގާމުން ވަކިކުރުމަށް ނިންމީ މަޖިލީހުގެ 70މެންބަރުންގެ އިއްތިފާގުންނެވެ. މިއީ ރާއްޖޭގެ ދަށު ކޯޓެއްގެ  ފަނޑިޔާރަކު މަޖިލީހުން ވަކިކުރި ފުރަތަަމަ ފަހަރެވެ.

އޭނާ ވަނީ 2013ވަނަ އަހަރުގެ މެއި މަހު ޖޭއެސްސީއަށް ހުށައެޅުނު މައްސަލައަކާއި ގުޅިގެން ސަސްޕެންޑްކުރެވިފައެވެ. އެ ސަސްޕެންޝަނަށް މިހާރު ވަނީ ހަ އަހަރު ވޭތުވެގެން ގޮސްފައެވެ.

އިބްރާހިމް ސަސްޕެންޑްކޮށްފައިވަނީ އާންމު ތަނެއްގައި އަންހެނަކާ ޒުވާބުކޮށް ހަޑި ހުތުރުބަހުން ވާހަކަ ދެއްކުމުން މުހައްމަދު ލަތީފު ނަމަކަށް ކިޔާ އާންމު މީހަކު ހުށަހެޅި މައްސަލައަކާއި ގުޅިގެންނެވެ.

އެގޮތުން، އިބްރާހިމް، އާންމު ތަނެއްގައި ތިނަދޫގެ އަންހެނަކާ ދިމާލަށް ހަޑި ހުތުރު ބަހުން ހަޅޭއްލަވައި އަޑުގަދަކޮށް އެ އަންހެން މީހާ އަކީ ނަހަލާލަށް ބަލިވެ އިނދެ ދަރިވައްޓާފައި ހުރި މީހެއް ކަމަށް ބުނެފައިވާ ކަމަށް އެ މައްސަލައިގެ ރިޕޯޓުގައި ބުނެފައިވެއެވެ.

އޭނާ 2013 ވަނަ އަހަރުގެ ތެރޭގައި މަސްތުވާތަކެއްޗާ އެކު ހައްޔަރުވެސް ކުރެވުނެވެ. ނަމަވެސް ދޫކޮށްލާފައި ހައިކޯޓުގެ އަމުރެއްގެ ދަށުން އިބްރާހިމް ދޫކޮށްލެވުނެވެ.